ބިދޭސީ މަސައްކަތްތެރިންނަށް ދޫކޮށްފައިވާ ހުއްދަތަކާ ގުޅިގެން، ވަޒީފާދޭ ފަރާތުން ދައުލަތަށް ދައްކަންޖެހި ނުދައްކާ ހުރި ފީތަކާއި ޖޫރިމަނާތަކުގެ ޢަދަދު އެއް ލައްކަ ރުފިޔާ އަށްވުރެ އިތުރުވާ ފަރާތްތަކުގެ ތަފްޞީލް ހިމެނޭ ލިސްޓެއް މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީން އާންމު ކޮށްފިއެވެ.
ހޯމް މިނިސްޓްރީން ބުދަ ދުވަހުގެ ރޭ އާންމު ކުރި ލިސްޓުގައި 1026 ފަރާތެއްގެ ނަން ހިމަނާފައިވެއެވެ. މީގެ ތެރޭގައި ރާއްޖޭގެ ނަން މަޝްހޫރު ބައެއް ކުންފުނި ތަކާއި އާންމު ފަރުދުންވެސް ހިމެނެއެވެ.
![](https://dyncz33htw1ec.cloudfront.net/posts/c8830186-77d8-4457-a950-7ad810076b05.png)
ހޯމް މިނިސްޓްރީން ކޮށްފައިވާ އިއުލާނުގައި ބުނެފައިވަނީ މި ލިސްޓަކީ 23 ޖުލައި 2024 ވަނަ ދުވަހުގެ ނިޔަލަށް އެކްސްޕެޓް ސިސްޓަމް އިން ނަގާފައިވާ ރިޕޯޓެއްގެ މައްޗަށް ތައްޔާރު ކޮށްފައިވާ ލިސްޓެއް ކަމަށެވެ.
![](https://dyncz33htw1ec.cloudfront.net/posts/8050f7ed-e5d2-4a9e-b432-d07f241d0a86.png)
މި ފަރާތްތަކުން ދައުލަތަށް ދައްކަންޖެހޭ ފައިސާ 2024 އޮގަސްޓް 12 ވަނަ ދުވަހުގެ ކުރިން ދައްކާ ޚަލާސްކުރުމަށް ހޯމް މިނިސްޓްރީން އަންގާ ކަމަށް ވެސް އިއުލާނުގައި ވެއެވެ. އަދި މި މުއްދަތުގެ ތެރޭގައި މި ފައިސާ ދައްކާ ޚަލާސް ނުކޮށްފިނަމަ އެފަރާތްތަކަށް އެކްސްޕެޓް ސިސްޓަމް މެދުވެރިކޮށް އައު ހުއްދަ ދިނުން ހުއްޓާލެވޭނެ ކަންވެސް އިއުލާނުގައި ބުނެފައިވެއެވެ.
![](https://dyncz33htw1ec.cloudfront.net/posts/1772b9d6-562b-4451-a6aa-037686765aa9.png)
ހޯމް މިނިސްޓްރީން ހާމަ ކުރި ލިސްޓުގައި އެންމެ ބޮޑު އަދަދެއް ދައްކަން ޖެހޭ ކުންފުނީގެ ގޮތުގައި ފުޓްސަން އިންޓަނޭޝަނަލް ޕްރައިވެޓް ލިމިޓެޑް އޮތް އިރު އެ ކުންފުނިން ވޯކް ޕާމިޓް ފީ އާއި ކޯޓާ ފީގެ ގޮތުގައި 26.8 މިލިއަނަށް ވުރެ ގިނަ ފައިސާ ދައުލަތައް ދައްކަން ޖެހޭ ކަމަށް ލިސްޓުގައިވެއެވެ.
![](https://dyncz33htw1ec.cloudfront.net/posts/77eafcc1-d662-49fb-bf86-f280d2fe807b.png)
މިލިއަނަކަށް ވުރެ ގިނައިން ފައިސާ ދައްކަން ޖެހޭ 123 ކުންފުންޏެއް ލިސްޓުގައި ހިމެނޭ އިރު މީގެ ތެރޭގައި 11 މިލިއަނަށް ވުރެ ގިނަ ފައިސާ ދައްކަން ޖެހޭ 6 ކުންފުނި ހިމެނޭކަން ފާހަގަ ކުރެވެއެވެ.