ރާއްޖޭގައި މިހާތަނަށް ހަދާފައިވާ އެންމެ ބޮޑު ކޮރަޕްޓް އެއްބަސްވުން ހަދާފައި އޮތީ މިނިސްޓަރ އިހުސާނުގެ ބެލުމުގެ ދަށުން: ޝަމްހީދު
3 އޮކްޓޯބަރު 2025 | ހުކުރު 08:07ރާއްޖޭގައި މިހާތަނަށް ހަދާ އެންމެ ބޮޑު ކޮރަޕްޓް އެއްބަސްވުން ހަދާފައި އޮތީ ހޯމް މިނިސްޓަރ އަލީ އިހުސާނުގެ ބެލުމުގެ ދަށުން
ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ.އަހްމަދު ޝަމްހީދު
ދިވެހިރާއްޖޭގައި މިހާތަނަށް ހަދާ އެންމެ ބޮޑު ކޮރަޕްޓް އެއްބަސްވުން ހަދާފައި އޮތީ ހޯމް މިނިސްޓަރ އަލީ އިހުސާނުގެ ބެލުމުގެ ދަށުން ކަމަށް ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ.އަހްމަދު ޝަމްހީދު ވިދާޅުވެއްޖެ އެވެ.
ރާއްޖެ ޓީވީގެ ޓީވީ ޓޯކް ޕްރޮގްރާމުގައި ވާހަކަދައްކަވަމުން ޝަމްހީދު ވިދާޅުވީ ކޮރަޕްޝަންގެ މައްސަލަތައް ބައްލަވަން ޖެހޭނީ މަގާމުގައި ތިއްބަވާއިރުގައި ކަމަށް ވިދާޅުވެ، މި ސަރުކާރުގެ ހޯމް މިނިސްޓަރ އަލީ އިހުސާނު އެކްސްގައި ޕޯސްޓެއް ކުރައްވާފައިވާ ކަމަށާއި އެފަދައިން ވިދާޅުވެ ޕޯސްޓު ކުރައްވާއިރު، މި ސަރުކާރު އުފެދިގެން ކޮރަޕްޝަނެއްގެ މައްސަލައިގައި އެންމެ ފުރަތަމަ ސުވާލުކުރެވުނު އެއްބޭފުޅަކީ މިނިސްޓަރ އިހުސާން ކަމަށެވެ.
ޝަމްހީދު ވިދާޅުވީ މިނިސްޓަރ އިހުސާނާއި ސުވާލުކުރެއްވީ އެމްޑީޕީގެ ޕީޖީ ލީޑަރު ކަމަށާއި ސުވާލުކުރެވުނީ ދުނިޔޭގެ އެންމެ ބޮޑެތި ބްލެކް ލިސްޓެޑް ކުންފުނިތަކުގެ ތެރޭގައި ހިމެނޭ ބެސްޓެޓް ނަކަމަށް ކިޔާ ކުންފުންޏެއް ހައްދަވައިގެން ދައުލަތަށް އަހަރަކު 500 މިލިއަން ރުފިޔާ ގެއްލުންވާ ގޮތަށް ހަދާފައިވާ އެއްބަސްވުމަކާއި ގުޅޭގޮތުން ކަމަށެވެ.
އަދި އެސުވާލާއި އެކު ދެއްކެވީ ސިޓީތަކެއް ކަމަށާއި އަދި އެ ކުންފުނިން 13 މިލިއަނެއްހައި ރުފިޔާ ދޭން އޮތުމުން އެ ފައިސާ ހޯދުމުގެ މަސައްކަތް ކުރަމުން ގެންދާކަމަށް މިިނިސްޓަރ އިހުސާން ވިދާޅުވި ކަމަށް އޭނާ ވިދާޅުވި އެވެ.
އަޅުގަނޑުމެން މި ސަރުކާރު އުފެދިގެން ކޮރަޕްޝަނެއްގެ މައްސަލައިގައި އެންމެ ފުރަތަމަ ސުވާލުކުރެވުނު އެއްބޭފުޅަކީ މިނިސްޓަރ އިހުސާން. އިހުސާން އާއި މި ސުވާލުކުރަނީ، އަޅުގަނޑުމެންގެ ޕީޖީ ލީޑަރ އިނގޭތީ ސުވާލު ކުރެއްވީ ވެސް. ސުވާލުމިކުރަނީ ބެސްޓެޓް ކިޔާ ކުންފުންޏަކާއި އެކީގައި އެއްބަސްވުމެއް ހަދައިގެން ދައުލަތަށް އަހަރަކު 500 މިލިއަން ރުފިޔާ ގެއްލުންވާކަހަލަ އެއްބަސްވުމެއް މަނިކުފާނު އެބަ ހައްދަވަން ހެއްޔޭ. ބުނީމަ ދައްކަނީ ސިޓީތަކެއް. އެބޭފުޅުން އެބައިނޭ 13 މިލިއަން ޑޮލަރެއް ކަންނޭންގެ ބަދަލުގެ ގޮތުގައި ހޯދަން، އެހެންވީމަ ތިމަންނަމެން އެކަން އެބ ކުރަމޭރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ.އަހްމަދު ޝަމްހީދު
މީގެ އިތުރުން ޝަމްހީދު ވިދާޅުވީ ދިވެހިރާއްޖޭގައި މިހާތަނަށް ހަދާ އެންމެ ބޮޑު ކޮރަޕްޓް އެއްބަސްވުން ހަދާފައި އޮތީ މިނިސްޓަރ އިހުސާނުގެ ބެލުމުގެ ދަށުން ކަމަށެވެ.
އަދި އެ އެއްބަސްވުން ހައްދަވައިގެން އަމަލީގޮތުން އެމަސައްކަތް ކުރިޔަށް ގެންދަވާކަން ފާހަގަކުރައްވަމުން ޝަމްހީދު ވިދާޅުވީ މިފަދަ ބޭފުޅުން ކޮރަޕްޝަނުގެ ވާހަތައް ދައްކާތީ ހައިރާންވާ ކަމަށެވެ. އަދި މިއީ ކޮރަޕްޝަނޭ ވިދާޅުވެ ވާހަތައްދެއްކޭ ފެންވަރުހުރި ބޭފުޅުން ނޫން ކަމަށް ވެސް ޝަމްހީދު ވިދާޅުވި އެވެ.
ޝަމްހީދު ވިދާޅުވީ މި މައްސަލާގައި މި ސަރުކާރުގެ ބަންޑާރަނައިބު އަހުމަދު އުޝާމް ގާނޫނީ އެއްވެސް ލަފައެއް ދެއްވިތޯ ވެސް މިނިސްޓަރ އިހުސާނުކުރެން ސުވާލުކުރެއްވި ކަމަށެވެ. އެހެން ނަމަވެސް އެކަމަށް އެއްވެސް ޖަވާބެއް އަދި މިހާތަނަށް ދެއްވާފައި ނުވާކަމަށް އޭނާ ވިދާޅުވި އެވެ.
އަދި ބަންޑާރަ ނައިބަށް ވެސް މި މައްސަލާގައި މަޖިލީހަށް ވަޑައިގެން ޖަވާބުދާރީވާ 14 ދުވަހުގެ މުހުލަތެއް ދިން ނަމަވެސް ހަ މަސްވެގެން ދިޔައިރުގައި ވެސް އަދި މިހާތަނަށް އެ މައްސަލައިގައި ޖަވާބުދާރީ ވުމަށް މަޖިލީހަށް ވަޑައިގެންފައި ނުވާކަން ޝަމްހީދު ފާހަގަކުރެއްވި އެވެ.
ޝަމަހީދު ވިދާޅުވީ ބެސްޓޭޓް ކުންފުންޏަށް ބަލާއިރު މި ކުންފުންޏަކީ ދުނިޔޭގައި ބްލެކް ލިސްޓެޑް ކުންފުންޏެއް ކަމަށެވެ. އަދި އެކުންފުންޏާއި އެކު އެއްބަސްވުމެއް ހަދައިގެން އެ ކުރައްވަނީ ވަރަށް ނުރައްކާތެރިކަމެއް ކަމަށް ވެސް އޭނާ ވިދާޅުވި އެވެ.
ޝަމްހީދު ވިދާޅުވީ މިނިސްޓަރ އިހުސާން އެ ވިދާޅުވާ 13 މިލިއަން ޑޮލަރެއްގެ ބަދަލު ހޯދަން މިހާތަނަށް އެއްވެސް ކޯޓަކަށް ވެސް ގޮސްފައިނުވާކަމަށެވެ.
