ރާއްޖޭގެ ގިނަ މުއައްސަސާތަކަކީ ކޮރަޕްޝަންގެ ހާއްޔަކަށް ވެފައިވާކަމަށް ހޯމް މިނިސްޓަރ އަލީ އިޙްސާން ވިދާޅުވެއްޖެއެވެ.
މިނިސްޓަރ އިޙްސާން އެފަދައިން ވިދާޅުވީ ހުކުރު ދުވަހުގެ ރޭ އޮޕަރޭޝަން "ކުރަނގި" ފޭސް އިފްތިތާހްކުރުމަށާއި "ނާރެސް" އިފްތިތާހްކުރުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.
މިނިސްޓަރ ވިދާޅުވީ، ހޯމްލޭންޑް ސެކިއުރިޓީ މިނިސްޓްރީގެ ދަށުން ހިންގާ ބައެއް އިދާރާތަކުންވެސް ކޮރަޕްޝަންގެ މައްސަލަތައް ފެނިފައިވާ ކަމަށާއިި، އެ ކަންކަމަކީ ޒީރޯ ޓޮލެރެންސް ހިމެނޭ ކަންކަން ކަމަށެވެ. އެހެންކަމުން މިނިސްޓްރީގެ ދަށުން މަސައްކަތް ކުރާ މުވައްޒަފުންގެ ނަޒާހަތްތެރިކަން ކަށަވަރު ކުރުމަށް ކުރަންޖެހޭ ކަންކަން ކުރައްވާނެކަމަށް މިނިސްޓަރު ވިދާޅުވިއެވެ.
އަމާޒަކީ ހާއްސަކޮށް ޔުނިފޯމް އެޅި މުއައްސަސާތަކުގެ ތެރޭގައި މިފަދަ އެއްވެސް ކަމެއްގެ ޒައްރެއްގެ މިންވަރުވެސް ނުބޭއްވުން.ހޯމް މިނިސްޓަރ އަލީ އިޙްސާން
އިޙްސާން ވަނީ ރާއްޖޭގެ ގިނަ މުއައްސަސާތަކަކީ ކޮރަޕްޝަންގެ ހާއްޔަކަށް ވެފައި އޮތުމަކީ ޤާނޫނޫ ތަންފީޒު ކުރުމަށްވެސް އޮތް ގޮންޖެހުމެއްކަން ފާހަގަ ކުރައްވާފައެވެ.
ޔުނިފޯމް އެޅި މުވައްޒަފުންގެ ނަޒާހަތްތެރިކަމާމެދު ސުވާލު އުފެދޭ ފަދަ ކަމެއް ހިނގައިގެން ނުވާނެ ކަމަށާއި، ޔުނިފޯމް ވިއްކާލުމަކީ ބަލައިގަނެވޭނެ ކަމެއް ނޫން ކަމަށް އިޙްސާން މީގެ ކުރިންވެސް ވިދާޅުވެފައިވެއެވެ.
އަދި އެފަދަ މައްސަލަތައް ސީރިއަސް މައްސަލައެއްގެ ގޮތުގައި ބައްލަވާނެކަމަށް އިޙްސާން ވިދާޅުވިއެވެ.
އިޙްސާން ވަނީ ޖަލަށް ފޯނާއި މަސްތުވާތަކެތި ވެއްދުމާ ގުޅޭ މައްސަލައަށްވެސް އަލިއަޅުވާލައްވާފައެވެ.
އެ މައްސަލައިގައި ހައްޔަރުކުރި މުވައްޒަފުންގެ ލޮކަރުތަކުންވެސް ގިނަ އަދަދެއްގެ ފޯނާއި ޗާޖަރުތައް ފެނިފައިވާއިރު، މިފަހުން މި މައްސަލައިގައި އިތުރު އޮފިސަރަކުވެސް ވަނީ ހައްޔަރު ކޮށްފައެވެ.
