މިއަހަރު ތެރޭ ތިން އެއާޕޯޓެއްގެ މަސައްކަތް ނިމި، ހަތަރު އެއާޕޯޓެއް ތަރައްގީކުރަން ފެށޭނެ: ރައީސް

މ. މުލި، ފ. މަގޫދޫ އަދި ރ. އަލިފުށީގައި ގާއިމުކުރާ ވައިގެ ބަނދަރުގެ މަސައްކަތް މިއަހަރު ތެރޭގައި ނިމި ޚިދުމަތް ދޭންފެށޭނެކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ގދ. ފަރެސްމާތޮޑާ އެއަރޕޯޓް ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުން ރައީސް ވިދާޅުވީ ނ. މާފަރު ވައިގެ ބަނދަރު އިތުރަށް ތަރައްޤީކޮށް، ފެންވަރު މަތިކުރުމަށް މިހާރު ކުރަމުން އަންނަ މަސައްކަތްތައް ވެސް، އަންނަ އަހަރުގެ ކުރީކޮޅުގައި ނިންމައި ޚިދުމަތް ދޭން ފެށޭނެކަމަށެވެ. މިސަރުކާރުން އެއާޕޯޓް ހެދުމަށް ހުޅުވާލި 6 ރަށުގެ މަޝްރޫޢު ގޮސްފައިވާ ހިސާބާގުޅޭގޮތުން ވާހަކަފުޅުދައްކަވަމުން ރައީސް ވިދާޅުވީ އެތަނުން ހަތަރު ރަށެއްގައި އެއާޕޯޓް ތަރައްގީކުރުމުގެ މަސައްކަތް މިއަހަރު ތެރޭގައި ފެށޭނެކަމަށް އުންމީދުކުރައްވާކަމަށެވެ.

Advertisement

އެގޮތުން ހދ. މަކުނުދޫ، ށ. ބިލެތްފަހި، ބ. ތުޅާދޫ، އަދި ތ. ވިލުފުށީގައި ޤާއިމުކުރާ ވައިގެ ބަނދަރުތައް ހެދުމަށް ބޭނުންވާ ބިން ހިއްކުމުގެ މަސައްކަތް މިހާރު އޮތީ ބީލަމުގެ އެންމެފަހު މަރުހަލާގައިކަމަށް ރައީސް ވިދާޅުވިއެވެ.

ރައީސް ވިދާޅުވީ މި ވައިގެ ބަނދަރުތައް ޤާއިމުކޮށް ނިމޭއިރު، އެތެރޭގެ އުދުހުންތަކުގެ ވިއުގަ ވަރަށް ބޮޑަށް ގެތި ލާމެހިގެންދާނެކަމަށެވެ. އަދި އެއީ ވަޒީފާގެ އިތުރު ފުރުޞަތުތައް އުފެދި، އިޤްތިޞާދީ ޙަރަކާތްތަކަށް ލިބިގެންދާނެ ވަރަށް ބޮޑު ދިރުމަކަށް ވެގެންދާނެކަމަށެވެ. މީގެއިތުރުން ރާއްޖެއަށް ޒިޔާރަތްކުރާ ފަތުރުވެރިން، ރާއްޖޭގެ އެކި ކަންކޮޅުތަކަށް ދަތުރުކުރުމަށް ލިބޭ ރަނުގެ ފުރުޞަތުތަކަށްވެސް ވެގެންދާނެކަމަށް ރައީސް ވިދާޅުވިއެވެ.

ސަރުކާރުން އެއާޕޯޓް އަޅަން ހުޅުވާލީ ހދ. މަކުނުދޫ އާއި ށ. ބިލަތްފަހި އާއި ބ. ތުޅާދޫ އާއި ތ. ވިލުފުއްޓާއި ފ. މަގޫދޫ އާއި ރ. އަތޮޅު ދެކުނު ބިތުގެ ރަށެކެވެ. އެތަނުން މަގޫދޫގައި އެއާޕޯޓް އެޅުމުގެ މަސައްކަތް މިހާރު ކުރަމުންދާއިރު މިމަޝްރޫޢުތައް ކުރިޔަށްގެންދިޔުމަށް ސަރުކާރުން ވަނީ ފައިސާގެ ބަދަލުގައި ރިސޯޓު ހަދާނެ ރަށެއް ލިބޭ އުސޫލުން، އެއާޕޯޓު ހަދަން ބޭނުންވާ ފައިސާގެ ތެރެއިން ބައެއް ހޯދަން ކުންފުނިތަކަކާއެކު ސޮއިކޮށްފައެވެ.