ފަލަސްޠީނުގެ ތިމާވެށީގެ ދިފާޢުގައި އެކަނިވެރިމައެއް

ބަލާބެލުމަށް އެއީ ހިރަފުސް ވެއްޔާ ކުޅެން ތިބި ކުދި ބައެއް ކަމުގައި ހީވި ނަމަވެސް، އެ ކުދިން ކުރަމުން އެ ދަނީ އެއަށްވުރެ މާ ޙިކުމަތްތެރި ކަމެކެވެ. ފަލަސްޠީނަށް ނިސްބަތްވާ މި ކުދިންނަކީ ތިމާވެއްޓާ ބެހޭ ހާއްސަ، މަސައްކަތު ބައްދަލުވުމެއްގެ ބައިވެރިންނެވެ. ތިމާވެށީގެ ތަޖުރިބާކާރެއް ކަމަށް ވާ މުނާ ޝަހީންގެ ހާއްސަ ވޯކްޝޮޕްތަކުގެ އެހީގައި މި ކުދިން ދަސް ކުރަމުން އެދަނީ ޤުދުރަތީ ވެށީގެ މުއްސަނދިކަމުން އުފާ ހާސިލު ކުރުމަށެވެ. އަދި އެ އެވެށި، އޭގެ އަސްލު ނުގެއްލޭނެހެން ފަހަށް ރައްކާ ކުރުމަށެވެ.

ޢުމުރުން 46 އަހަރުގެ މުނާގެ ވޯކްޝޮޕްތައް ކޮންމެ ހަފުތާއަކުވެސް ކުރިއަށް ދެއެވެ. ހާއްސަކޮށްފައި ވަނީ ޢުމުރުން 6 އަހަރާއި 10 އަހަރާ ދެމެދުގެ ކުދިންނަށެވެ. މި ކުދިންނަކީ ޖަންގަލިތަކުގެ ކައިރި ހިސާބުތަކުގައި ދިރިއުޅޭ ކުދިންނެވެ.

މުނާގެ ވޯކްޝޮޕްތަކުން ކުދިން ދަސްކުރާ ކަންކަމުގެ ތެރޭގައި، ގަސްގަހާގެހީގެ މުހިންމު ކަމާ، ޖަންގަލިތަކުން ފެންނަ ގަސްގަހާގެހީގެ ތެރެއިން، ގޭގައި ކައިބޮއެ ހަދަން ބޭނުން ކުރެވިދާނެ ބާވަތްތައް ދެނެގަތުން ފަދަ ކަންކަން ހިމެނެއެވެ.

އެހާ ހިސާބުން ނިންމާލަނީއެއް ނުނެވެ. ޕާކުތައް ސާފުކުރުމާ، ހިކިގެން ވެއްޓިފައި ހުންނަ އޮފިތަކާއި ގޮފިގަނޑުތައް ނަގާ ސާފު ކުރުމުގެ މަސައްކަތްވެސް މި ކުދިން ކުރެއެވެ. އަދި އެ ސަރަޙައްދުގައި ދިރިއުޅޭ ޖަނަވާރުތަކާ ބެހޭ ކަންކަންވެސް އެކުދިން ދަސްކުރެއެވެ.

މުނާގެ ވޯކްޝޮޕްތައް ފަރުމާކޮށްފައި ހުންނަނީ ޤުދުރަތީ ވެށި ސާފުކޮށް ބާއްވާނެ އެންމެ އަސާސީ އުކުޅުތަކުން ފެށިގެން، ތިމާވެއްޓަށްޓަކާ ކޮންމެ ކުއްޖެއްގެ ކޮނޑުގައި އެޅިފައިވާ މައްސޫލިއްޔަތުވެސް ދަސްވެގެން ދާ ފަދަ ގޮތަކަށެވެ.

ޝާހީންގެ މަސައްކަތުގެ ބައްދަލުވުންތަކުގެ އެއް ދުވަސް ހާއްސަކޮށްފައި އޮންނަނީ، ޖަންގަލިން ލިބެން ހުންނަ މާމެލާމެލި ބޭނުންކޮށްގެން ލޯޝަން ތައްޔާރު ކުރަން ދަސްކޮށްދިނުމަށެވެ.

ޤުދުރަތީ ވެށީގައި ކުދިންގެ ވަޤުތުތައް ހޭދަ ކުރުމަކީ އެކުދިންގެ ހެދިބޮޑުވުމާއި ދުޅަހެޔޮ ސިއްހަތަށް އެދެވޭ ބަދަލުތަކެއް ގެނުވާ  ކަމެއް ކަން، ފަހުގެ ހޯދުންތަކުން ސާބިތުވާ ކަން، އެކަނިވެރި މައެއްގެ ގޮތުގައި ހަރަކާތްތެރިވާ ހީވާގި މުނާ ފާހަގަ ކުރެއެވެ.