ރައީސް މުޢިއްޒުގެ ސަރުކާރުން އީޕީއޭ އުވާލުމުން ޝާހިދު ފާޑު ވިދާޅުވި
އެމްޑީޕީގެ ނޫސްވެރިންގެ ބައްދަލުވުމުގައި އެ ޕާޓީގެ ރައީސް ޝާހިދު ވާހަކަ ދައްކަވަނީ
އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ) އުވާލުމަކީ ލަދުވެތިކަމެއް ކަަމަށާއި، މޫސުމީ ބަދަލުތަކާ ގުޅޭގޮތުން ބައިނަލްއަޤްވާމީ މައިދާނުގައި ދިވެހިރާއްޖެއިން ކުރަމުން އައި މަސައްކަތްތަކަށް ބަލާއިރު، އީޕީއޭ އުވާލުމަކީ ރާއްޖޭގެ މިހާތަނަށް ގެންގުޅެފައިވާ ސިޔާސަތުތަކާ ފުށުއަރާ ކަމެއް ކަމަށް އެމްޑީޕީގެ ރައީސް އަދި ކުރީގެ ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.
އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ) އުވާލަން ރައީސް ޑރ.މުހައްމަދު މުއިއްޒު ވަނީ ނިންމަވާފައެވެ. ރާއްޖޭގެ ނާޒުކު ތިމާވެށި ހިމާޔަތްކޮށް ދެމެހެއްޓުމުގެ މުހިންމު ޒިންމާ މަތި ކުރެވިފައިވާ އީޕީއޭ އުވާލުމަށްފަހު، އެތަނުގެ މަސައްކަތްތައް މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓް ގެ ބެލުމުގެ ދަށަށް ބަދަލު ކުރުމަށް ވެސް ރައީސް މުހައްމަދު މުއިއްޒު ވަނީ ނިންމަވާފައެވެ.
ޝާހިދު އެކްސްގައި ހިއްސާކުރެއްވި ޕޯސްޓެއްގައި ވިދާޅުވީ ދިވެހިރާއްޖެއަކީ އެތައް އަހަރެއް ވަންދެން ތިމާވެށި ރައްކާތެރިކުރުމަށް މަސައްކަތްކޮށް، ބައިނަލްއަޤްވާމީ މައިދާނުގައި މިކަމަށް އަޑުއުފުލާފައިވާ ޤައުމެއް ކަމަށެވެ.
އަންނަން އޮތް ޖީލުތަކަށް ރައްކާތެރި ތިމާވެއްޓެއް ދެމެހެއްޓުމަށްޓަކައި ކުރެވިފައިވާ އެތައް މަސައްކަތްތަކެއްގެ މުހިއްމުކަން މި ނިންމުމުގެ ސަބަބުން ކުޑަވެގެންދާނެކަމަށް ވެސް ޝާހިދު ވަނީ ވިދާޅުވެފައެވެ.
ތިމާވެށި ޙިމާޔަތްކުރުމާއި ތަރައްޤީއާ ދެމެދު ރަނގަޅު ބެލެންސެއް ހޯދުމަކީ ދިވެހިރާއްޖެއިން އަބަދުވެސް މުހިއްމުކަން ދީފައިވާ ކަމެއް ކަމަށް ޝާހިދު ވަނީ ވިދާޅުވެފައެވެ. އެގޮތުން، ތަރައްޤީގެ މަޝްރޫޢުތައް ކުރިއަށް ގެންދިއުމުގައި ތިމާވެށްޓަށް ލިބޭ ގެއްލުން ކުޑަކުރުމަށް ގިނަގުނަ މަސައްކަތްތަކެއް ކުރެވިފައިވާކަން ޝާހިދު ފާހަގަކުރެއްވިއެވެ.
މިކަމުގެ ސަބަބުން ރާއްޖެއިން މިދާއިރާއިން ހޯދާފައިވާ އިތުބާރާއި ރަނގަޅު ނަން ގެއްލިގެންދާނެކަމަށް ޝާހިދު ފާހަގަކުރެވެއެވެ.
