އިމްސޯ ގައި ދިވެހިރާއްޖެއިން ބައިވެރިވުމަށް މަޖިލީހުން ފާސްކޮށްފި
14 މާރިޗު 2023 | އަންގާރަ 13:08ރާއްޖެ އަށް އިމްސޯގައި ބައިވެރިވުމަށް އައި.އެމް.އޯ މެންބަރ ސްޓޭޓް އޮޑިޓްގައި ވަނީ ލަފާދީފަ
އިމްސޯގެ ބައްދަލުވުމެއްގެ ތެރެއިން
"އިންޓަރނޭޝަނަލް މޯބައިލް ސެޓްލައިޓް އޯގަނައިޒޭޝަން (އިމްސޯ)" ގައި ދިވެހިރާއްޖެއިން ބައިވެރިވުމަށް މަޖިލީހުން ފާސްކޮށްފިއެވެ.
އިންޓަރނޭޝަނަލް މޯބައިލް ސެޓްލައިޓް އޯގަނައިޒޭޝަން (އިމްސޯ)" ގައި ދިވެހިރާއްޖެއިން ބައިވެރިވުމާމެދު، ރައްޔިތުންގެ މަޖިލީހުގެ ރުހުން ހޯއްދެވުމަށް ރައީސުލްޖުމްހޫރިއްޔާ ފޮނުއްވާފައިވާ މައްސަލަ، ޚާރިޖީ ގުޅުންތަކުގެ ކޮމިޓީން ދިރާސާކޮށް ނިންމި ގޮތުގެ ރިޕޯޓު ފާސްކޮށްފައި ވަނީ މަޖިލީހަށް ހާޒިރުވި 59 މެމްބަރުންގެ ތެރެއިން 49 މެމްބަރުންގެ ވޯޓާއި އެކުގައެވެ. އެ ރިޕޯޓް ފާސްކުރަން ނުފެންނަ ކަމަށް ވޯޓުދެއްވި މެމްބަރަކު ވެސް އަދި ވަކިކޮޅަކަށް ވޯޓު ނުދެއްވާ މެމްބަރަކުވެސް ނެތެވެ.
ދިވެހި ދައުލަތުގެ ނަމުގައި، ވެރިކަން ހިންގާ ފަރާތުން ބައިވެރިވާ ބައިނަލްއަޤުވާމީ މުއާހަދާތަކުގެ މައްޗަށް އަމަލުކުރަން ވާނީ ރައްޔިތުންގެ މަޖިލީހަށް ފާސްކުރުމަށް ހުށަހަޅާ މަޖިލީހުން ފާސް ކުރާ ގޮތެއްގެ މަތީން ކަމަށް ރާއްޖޭގެ ޤާނޫނު އަސާސީގެ 93 މާއްދާގެ (ހ)ގައި ވަނީ ބަޔާންކޮށްފައި ވެއެވެ. އެހެންކަމުން "އިންޓަރނޭޝަނަލް މޯބައިލް ސެޓްލައިޓް އޯގަނައިޒޭޝަން (އިމްސޯ)"ގައި ބައިވެރިވުމަށް މަޖިީލީހުން މި މައްސަލަ އަށް ރުހުން ދިނުމާއި މެދު ނިންމާ ގޮތެއް އެދިވަޑައިގެން ރައީސް އިބްރާހިމް މުހައްމަދު ޞާލިހު މަޖިލީހަށް ސިޓީފުޅެއް ފޮނުއްވާފައި ވަނީ 31 ޖެނުއަރީ 2023 ވަނަ ދުވަހުއެވެ.
ދިވެހިރާއްޖެއަކީ ބައިނަލްއަޤްވާމީ ކަނޑުދަތުރުފަތުރާއިބެހޭ ޖަމްޢިއްޔާ އިންޓަރނޭޝަނަލް މެރިޓައިމް އޯގަނައިޒޭޝަން (އައި.އެމް.އޯ)ގެ މެންބަރު ޤައުމެކެވެ.
"އިންޓަރނޭޝަނަލް މޯބައިލް ސެޓްލައިޓް އޯގަނައިޒޭޝަން (އިމްސޯ)" ވުޖޫދަށް އައީ 1979 ވަނަ އަހަރު އައި.އެމް.އޯގެ އެހީތެރިކަމާއެކު އެ ޖަމްޢިއްޔާއަށް އެހީތެރިކަން ފޯރުކޮށްދިނުމުގެ ގޮތުންނެވެ. އިމްސޯގެ މަގްސަދުތަކުގެ ތެރޭގައި ގްލޯބަލް މެރިޓައިމް ޑިސްޓްރެސް އެންޑް ސޭފްޓީ ސިސްޓަމް (ޖީ.އެމް.ޑީ.އެސް.އެސް) އާއި ލޯންގް ރޭންޖު އައިޑެންޓިފިކޭޝަން އެންޑް ޓްރެކިންގ އޮފް ޝިޕްސް (އެލް.އާރު.އައި.ޓީ)ގެ އެންމެހާ ކަންކަން ކުރުމަށް މަގުފަހިކުކުރުން ހިމެނެއެވެ.
ޖީ.އެމް.ޑީ.އެސް.އެސް އަދި އެލް.އާރު.އައި.ޓީ އަކީ އިންޓަރނޭޝަނަލް މެރިޓައިމް އޯގަނައިޒޭޝަން (އައި.އެމް.އޯ)ގެ މުއާހަދާ އެއް ކަމަށްވާ، "އިންޓަރނޭޝަނަލް ކޮންވެންޝަން ފޯ ދަ ސޭފްޓީ އޮފް ލައިފް އެޓް ސީ (ސޯލާސް) 1974"ގެ ދަށުން، މި މުއާހަދާގައި ބައިވެރިވާ ޤައުމުތަކަށް ލާޒިމުކުރާ ކަމެކެވެ. ރާއްޖެވެސް ހިމެނެނީ އައި.އެމް.އޯ އަދި ސޯލާސްގައި ބައިވެރިވެފައިވާ ޤައުތަކުގެ ތެރޭގައެވެ. ރާއްޖެ އަށް އިމްސޯގައި ބައިވެރިވުމަށް އައި.އެމް.އޯ މެންބަރ ސްޓޭޓް އޮޑިޓްގައި ވަނީ ލަފާދީފައެވެ.
