ތާލިބާނުންނަށް މަރުހަބާކީ އަންހެނުންވެސް މިއަދު ބުނަނީ އެހެން ވާހަކައެއް!

އަފްޣާނިސްތާނުގެ ކޮންޓްރޯލް ނަގާފައިވާ ހަތިޔާރު އެޅި ހަނގުރާމަވެރި ތާލިބާން ޖަމާއަތުން، އަންހެނުންގެ ހައްގުތަކަށް ހުރަސް އަޅަމުން ދާކަމުގައި ވަނީނަމަ، އަފްޣާނިސްތާނަށް ލިބޭ އެހީއާއި ތަރައްގީގެ ފަންޑަށް ބޮޑެތި ހުރަސްތަކެއް ކުރިމަތިވެދާނެ ކަމުގެ އިންޒާރު، އދ.ން އަފްޣާނިސްތާނަށް ކަނޑައަޅާފައި ހުންނަވާ މަންދޫބު، ރޯޒާ އޮތުންބަޔޭވާ ދެއްވީ، ބައިނަލްއަގުވާމީ ފެންވަރުގައި ފާހަގަކުރާ އަންހެނުންގެ ދުވަސް ކަމުގައިވާ މާރޗް 8 ވަނަ ދުވަހުއެވެ.

އަފްޣާނިސްތާނުގެ ވެރިކަމާ ތާލިބާނުން އަމިއްލައަށް ހަވާލުވީފަހުން، އަންހެނުންގެ ދިރިއުޅުމަށް ތަފާތު އެކި ގޮތްގޮތުން ހުރަސްތައް ކުރިމަތި ކުރަމުން ދާއިރު، އިންތިހާ ވޭނުގައި މަރުވެދާން ޖެހުމާ އެއްފަދަ ބިރެއް، މުޖުތަމައުން ބާކީކޮށްފާނެކަމާމެދު އަފްޣާން އަންހެނުންގެ ހިތްތަކުގައި އުފެދިފައިވާކަން ރޯޒާ ވަނީ ފާހަގަކުރައްވާފައެވެ.

އެހީގެ ގޮތުގައި އަފްޣާނިސްތާނަށް 4.6 ބިލިއަން ޑޮލަރު ބޭނުންވާކަމަށް، އދ.ން މިއަހަރު ބުނެފައިވާއިރު، މިއީ އެންމެ ގައުމަކަށް ޚާއްޞަކޮށްގެން އދ.ން މިހާތަނަށް ގޮވާލި އެންމެ ބޮޑު އަދަދެވެ. އަފްޣާނިސްތާނުގެ އާބާދީގެ 3 ބައިކުޅަ 2 ބައި (ނުވަތަ 28 މިލިއަނެއްހާ) މީހުންނަކީ ދިރިހުރުމަށްޓަކައި މި އެހީއަށް ބޭނުންޖެހިފައި ވާ ބައެއްކަން ރޯޒާ ވަނީ ފާހަގަކުރައްވާފައެވެ.

ކަން މިހެން އޮތްނަމަވެސް، އދ.ގެ ސަލާމަތީ މަޖިލީހުގައި ވާހަކަފުޅހދައްކަވަމުން ރޯޒާ ވިދާޅުވީ، މި އެހީ އަފްޣާނިސްތާނަށް ފޯރުކޮށްދިނުމަކީ ނުރައްކަލެއް ކަމުގައި ތާލިބާނުން ހަދާފައިވާކަމަށެވެ. އެގޮތުން، އަންހެނުނަށް ހައި ސްކޫލާއި ޔުނިވަރސިޓީތަކަށް ދިއުން މަނާކޮށްފައިވާއިރު، ޕާކުތަކަށް ޒިޔާރަތްކުރުމާއި، އެހީދޭ ޖަމްއިއްޔާތަކުގައި މަސައްކަތްކުރުންވެސް އަންހެނުންނަށް މަނާކޮށްފައިވާކަން އޭނާ ވަނީ ފާހަގަ ކުރައްވާފައެވެ. އަދި މަހުރަމަކާނުލައި އެއްވެސް ގޮތަކަށް ބޭރަށް ނުދެވުމާއި، ބޭރަށް ނުކުންނައިރު މުޅި މޫނު ނިވާކޮށްގެން ނޫނީ ނުނިކުމެވޭ ގޮތަށް އަމުރުކޮށްފައި އޮންނަ ކަންވެސް އދ.ގެ މަންދޫބު ވަނީ ފާހަގަކުރައްވާފައެވެ.

އެކުވެރި އަރަބި އިމާރާތުން އދ.ށް ކަނޑައަޅާފައި ހުންނަވާ މަންދޫބު، ލާނާ ނުސައިބީ ވިދާޅުވީ، ތާލިބާނުންގެ ނިންމުންތަކަކީ އިސްލާމް ދީނާއި އަފްޣާނިސްތާނުގެ ސަގާފަތާ ގުޅޭ ނިންމުންތަކެއް ނޫންކަމަށެވެ.

20 އަހަރަށް ދެމިގެން ދިޔަ ހަނގުރާމަ ހުއްޓާލުމަށްފަހު އެމެރިކާ ސިފައިން އަފްޣާނިސްތާނުގެ ފަސްގަނޑު ދޫކޮށްލުމާއެކު، ތާލިބާނުން އަފްޣާނިސްތާނުގެ ކޮންޓްރޯލް ނެގީ އޯގަސްޓް 2021ގައެވެ. އަފްޣާނިސްތާނުގެ ވެރިކަމާ ދެވަނަ ފަހަރަކަށް ތާލިބާނުން އަމިއްލައަށް ހަވާލުވީ، މިއަދު އެއީ ބަދަލުވެފައިވާ ފިކުރެއް ކަމުގެ ދަޅަ ދައްކައިގެންނެވެ. އަންހެނުންގެ ހައްގުތަކަށް އިހުތިރާމް ކުރާނެ ކަމަށް ބުނެ، އެތައް ދޮގެއް ހަދައިގެންނެވެ.