މާލެ ސިޓީ ކައުންސިލުން އެ ސިޓީގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މެމްބަރުންނާ ދޭތެރޭ އަމަލު ކުރަމުން އަންނަ ގޮތާމެދު ނުރުހުން ފާޅުކޮށްފިއެވެ.

މާލެ ސިޓީގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ހެންވޭރު ހުޅަނގު ދާއިރާގެ މެމްބަރު ފާތުމަތު ޝަހުލާ ކުރެއްވި ޓްވީޓެއްގައި ވިދާޅުވީ ސިޓީ ކައުންސިލުން އަންހެނުންގެ ދުވަސް ފާހަގަކުރުމަށް ބޭއްވި ހަފްލާއަށް އެ ކޮމިޓީގެ މެމްބަރުންނަށް ދައުވަތު ދީފައިވަނީ ހަފްލާގެ އެންމެ ތިން ގަޑިއިރު ކުރިން ކަމަށާއި އެއީ އެ ކޮމިޓީގެ މެމްބަރުންނާ މެދު ނިކަމެތިކޮށް ކަންކަން ކުރުން ކަމަށެވެ. އަދި މިއީ ކޮންމެ ކަމެއްގައި ވެސް އެ ކޮމިޓީގެ މެމްބަރުންނާ މެދު ކަންކަން ކުރަމުން އަންނަ ގޮތްކަން އޭނާ ފާހަގަކުރިއެވެ.

ޝަހުލާގެ ޓްވީޓަށް ރައްދު ދީ ބައެއް ފަރާތްތަކުން އެއީ ސަޕްރައިޒް އިވެންޓެއް ކަމަށާއި އެހެންކަމުން އޭގައި ގޯހެއް ނެތް ކަމަށް ބުނެފައިވެއެވެ. މިކަމާ ގުޅޭގޮތުން "ރާއްޖެ އެމްވީ" އާ ވާހަކަދައްކަވަމުން ޝަހުލާ ވިދާޅުވީ އެއީ ސަޕްރައިޒް އިވެންޓެއް ނޫން ކަމަށެވެ. އޭނާ ވިދާޅުވީ އަންހެނުންގެ ދުވަސް ފާހަގަ ކުރުމަށް ބާއްވާހަފްލާގެ މައުލޫމާތު މާކުރިން ކައުންސިލްގެ އަންހެނުންގެ ކޮމިޓީ މެމްބަރުން ފިޔަވައި އެހެން ހުރިހާ އަންހެނުންނަށް އަންގާފައިވާ ކަމަށެވެ. އެއީ މިދިޔަ އަހަރު ވެސް ބޭއްވި ހަފްލާއެއް ކަމަށާއި ދައުވަތު އެރުވުމުން ހާޒިރުވި ކަމަށް އޭނާ ވިދާޅުވިއެވެ.

ޝަހުލާ ހިއްސާ ކުރެއްވި ސްކްރީންޝޮޓުން ފެންނަ ގޮތުގައި ކައުންސިލުން އަންހެނުންގެ ކޮމިޓީ މެމްބަރުންނަށް ދައުވަތު ދިނީ ހުކުރު ދުވަހުގެ ހަވީރު 5:06ގައެވެ. ހަފްލާ ބާއްވާފައިވަނީ އެ ރޭ 8:30ގައެވެ. އަދި ކުލައެއްގެ ގޮތުގައި ދަނބު ކުލަ ކަނޑައަޅާފައިވާއިރު ކުއްލިއަކަށް އެ ކުލަ ހޯދައިގެން ކުޑަ ވަގުތުކޮޅެއްގެ ތެރޭގައި ޖަލްސާއަށް ހާޒިރުވާން ދަތިވާނެ ކަން ކައުންސިލަށް ވެސް އެނގޭނެކަން އޭނާ ފާހަގަކުރެއްވިއެވެ.

ޝަހުލާ މައުލޫމާތު ދެއްވި ގޮތުގައި މިފަދަ ގިނަ ކަންކަމުގައި ސިޓީ ކައުންސިލުން އެ ކޮމިޓީ މެމްބަރުންނާ މެދު ކަންކަން ކުރަނީ އެގޮތަށެވެ. އެއީ ކޮމިޓީގައި ވެރިކަން ކުރާ މައި ޕާޓީ އެމްޑީޕީއަށް ނިސްބަތްވާ މެމްބަރުންގެ މެޖޯރިޓީ އޮތުމުން ކުރާ ކަމެއް ކަމަށް ވެދާނެ ކަމަށް އޭނާ ވިދާޅުވިއެވެ.

އަންހެނުންގެ ކޮމިޓީގެ ޕޭޖުތަކުގެ ފުރިހަމަ އެކްސެސް އަދިވެސް ކޮމިޓީއަށް ނުލިބޭ ކަމަށާއި އޭގެ އެކްސެސް އިންނަނީ ކައުންސިލްގައި މިހާރު ނޫޅޭ މީހެއްގެ އަތުގައި ކަމަށް ވެސް ޝަހުލާ ވިދާޅުވިއެވެ. އަދި ކައުންސިލްގެ ނަމުގައި ނަގާފައިވާ ނަންބަރެއްގައި އެ ކޮމިޓީގެ ފޭސްބުކް އެކައުންޓް ހުޅުވާފައިވާއިރު އެ އެކައުންޓް ހެކުކޮށް، އޭގެ ނަން ބަދަލުކޮށްގެން ވިޔަފާރި ކުރަމުންދާކަން ވެސް އޭނާ ފާހަގަކުރެއްވިއެވެ. މި ޝަކުވާ ހުށަހެޅުމުން އެ ނަންބަރު މިހާރު ކައުންސިލުން ބޭނުން ނުކުރާ ކަމަށް ބުނި ނަމަވެސް އެއީ ކުރިން ކޮމިޓީއަށް އެނގިފައި އޮންނަ ޖެހޭ ކަމެއް ކަމަށް އޭނާ ވިދާޅުވިއެވެ.

ޝަހުލާ ވިދާޅުވީ ކޮމިޓީގެ ހަތަރުވަނަ ދައުރުގައި މިހާތަނަށް ސިޓީ ކައުންސިލް މެމްބަރުންނާއެކު ބައްދަލުވުމެއް ބޭއްވުނީ އެންމެ ފަހަރަކު ކަމަށެވެ. ބައްދަލު ކުރަން އެދުމުން ތަނެއް ނެތިގެން ބައްދަލުވުން ނުބޭއްވޭނެ ކަމަށް ބުނާ ކަމަށާއި ބޭއްވި ހަމައެކަނި ބައްދަލުވުން ވެސް ބާއްވާފައިވަނީ އަންހެނުންގެ ކޮމިޓީން ތަނެއް ހިފައިގެން ދައުވަތު ދީގެން ކަމަށްއޭނާ ވިދާޅުވިއެވެ. އަދި އެ ބައްދަލުވުމަށް ވެސް ގިނަ މެމްބަރުން ވަޑައިނުގަންނަވާކަން އޭނާ ފާހަގަކުރެއްވިއެވެ.

މީގެ އިތުރުން މަޝްވަރާތައް ކުރުމަށް ނުވަތަ ކަންބޮޑުވުންތައް ހިއްސާ ކުރަން ކައުންސިލްގެ އެސްޖީއަށް އަދި މޭޔަރަށް ގުޅުމުން ވެސް ފޯނަށްޖަވާބު ނުދޭ ކަމަށާއި މެސެޖަށް ވެސް ރިޕްލައި ނުކުރާ ކަމަށް ޝަހުލާ ވިދާޅުވިއެވެ. ޝަހުލާ ވިދާޅުވީ މިއީ ގުޅިގެން މަސައްކަތް ކުރަން ޖެހޭ ފަރާތްތަކުން ކަންކަން ކުރަން ޖެހޭނެ އުސޫލެއް ނޫން ކަމަށާއި މިފަދަ ކަންކަމުގެ ސަބަބުން މަސައްކަތް ކުރަން ޖެހެނީ އުނދަގޫ މާހައުލެއްގައި ކަމަށެވެ.