މީސް މީޑިއާ "އިންފްލުއެންސަރ" އަކަށްވުރެ ވިދާދްއަށް 'ލައިކް' ޙައްޤު ނޫންތޯއެވެ؟

ދެމީހަކީ އެއްގޮތް މީހެއް ނޫނެވެ. އެއްމާބަނޑު ދެންގެ މެދުގައި ކަމަށް ވީ ނަމަވެސްއެވެ. ހަމަ އެ ފަދައިން، އެކި މީހުން ދެކެމުންދާ ހުވަފެންތައްވެސް ވަރަށް ތަފާތެވެ. ލީބިޔާއަށް ނިސްބަތްވާ ވިދާދް އަލް ޝްވިހްދީއަކީވެސް، އެފަދަ ތަފާތު ހުވަފެންތަކެއް، ދެކި، އެ ހުވަފެންތަކުގައި މިއަދު ޙަޤީޤީ ކުލަތައް ޖައްސަމުންދާ ލާމަސީލު ކަނބަލެކެވެ. ހާއްސަ އެހީއަށް ބޭނުންވާ މީހުންގެ ނަފްސާނީ ދުޅަހެޔޮ ކަމާއި ދުޅަހެޔި ކަމަށް މަސައްކަތް ކުރުމަކީ ވިދާދް ދެކެމުން ދިޔަ ހުވަފެނެކެވެ. އަދި މިއަދު އޭނާ އެކަމެއް ކުރުމަށް އެންމެ ލޯބި ކުރާ ކަންތައްވެސްމެއެވެ.

ހާއްސަ އެހީއަށް ބޭނުންވާ އަންހެނުންނަށް ޢަބުރުވެރި ދިރިއުޅުމެއް ހޯދާދީ، އަމިއްލަ މަސައްކަތުން ދިރިއުޅުމުގެ ކަންކަން ހަމަޖެއްސުމުގެ މަގު ތަނަވަސް ކޮށްދިނުމުގެ ގޮތުން، ހާއްސަ އެހީއަށް ބޭނުންވާ އަންހެނުންނަށް ފަހާ ފޮއްޓާއި، ފެހުމާ ގުޅޭ އެނޫންވެސް ސަމާނުތައް ހޯދާ ދިނުމުގެ މަސައްކަތް ވިދާދް ފެށީ 2015 ވަނަ އަހަރުގެ ތެރޭގައެވެ. އޭރު އޭނާ ދެކެމުން ދިޔަ އެއް ހުވަފެނަކީ ހާއްސަ އެހީއަށް ބޭނުންވާ އަންހެނުން އެއްތަނަކަށް ޖަމާވެ، މަސައްކަތުގެ މާޙައުލުގެ ތެރެއިން އެކަކު އަނެކަކާ ގުޅުން ބަދަހިކޮށް އިޖުތިމާޢީ ގުޅުން ވަރުގަދަ ވެގެންދާނެ ފަދަ ތަނެއް ހޯދާދިނުމެވެ.

އޭގެ އަހަރުތަކެއް ފަހެވެ. ލީބިޔާގައި ކުރަމުން ދިޔަ ހަނގުރާމައިގެ ތެރޭގައި ވިދާދްގެ ފިރިހެން ދަރިފުޅު މަރުވިއެވެ. ދަރިފުޅު މަރުވުމާއެކު، އެ ދަރިފުޅު ވޯކްޝޮޕް ހިންގި ތަން، ވިދާދްގެ އެންޖީއޯގެ މަރުކަޒަކަށް ބަދަލު ކުރަން އޭނާ ނިންމިއެވެ. ވިދާދްގެ އެންޖީއޯއަށް އޭނާ ދިން ނަމަކީ "ތަޙާދީ" ނުވަތަ "ގޮންޖެހުން" އެވެ.

މިއަދު އެ ވޯކްޝޮޕްއަކީ ފެހުމާއި މާޖެހުމާއި އެނޫންވެސް އަތްތެރި މަސައްކަތްތައް ކުރުމުގެ އިތުރުން، ހާއްސަ އެހީއަށް ބޭނުންވާ އަންހެނުން އެއްތަނަކަށް ޖަމާވެ، އެކަކު އަނެކަކު ދަސްކޮށް، އެކަކު އަނެކަކަށް އެއްބާރުލުމާއި، އޯގާތެރިކަމާއި އެހީ ފޯރުކޮށްދޭ ހިތްގައިމު މަންޒިލެކެވެ.

"ތަޙާދީ"ގެ މެންބަރުން އެކުގައި ދަތުރުގޮސް ހަދައެވެ. އާ ކަންކަން ދަސްކުރެއެވެ. ތަފާތު އެކި ކަހަލަ ގޮންޖެހުންތައް ގިރާ ކުރަނީ ސާބިތުކަމާ އެކީގައެވެ.

ވިދާދްގެ އެންޖީއޯގެ މެންބަރުން މިއަދު ތިބީ، ލިބެމުންދާ ޚިދުމަތްތަކާ މެދު ހިތްހަމަ ޖެހިފައެވެ.

ވިދާދްގެ ފަރާތުން ޚިދުމަތް ލިބޭ އަންހެނުންގެ ޢަދަދު 46 އަށް އަރައެވެ. އޭނާ އަމާޒު ހިފާފައި ހުރީ އަދިވެސް މި ޚިދުމަތް އިތުރަށް ފުޅާ ކުރުމަށެވެ. އެގޮތުން ޖިމްއާއި ކެފޭގެ ޚިދުމަތްތަކުގެ އިތުރުން، ދޮށީ ޢުމުރުގެ މީހުންނަށް ލިޔަންކިޔަން ދަސްކޮށްދޭ ކުލާސް ހިންގުމަކީ މިއަދު ވިދާދް ދެކެމުންދާ، ޢުއްމީދީ ހުވަފެންތަކެކެވެ.

ބައިނަލްއަޤުވާމީ ފެންވަރުގައި އަންހެނުންގެ ދުވަހެއް ފާހަގަ ކުރަމުން ދާ އިރު، މީސް މީޑިއާގެ ޕްލެޓްފޯމްތަކުގައި ހާސް ހާހުން ލައިކް ހޯދަން މޮޅު ޕޯސްޓެއް ޖަހާލާ މީހަކަށް ވުރެ، އެންމެ ބޮޑަށް ބޭނުން ޖެހިފައި ވާ އަންހެނުންގެ ދިރިއުޅުން ކޮޅަށް ޖަހައިދިނުމަށް މަސައްކަތް ކުރާ ވިދާދް ފަދަ، ޙަޤީޤީ ޝަޚްސުންނަށް ސެލިއުޓް ޙައްޤު ނޫންތޯއެވެ!