މަޖިލީހުގެ އަންހެން މެންބަރުންގެ ދައުރު އިތުރުކުރަން ޖެހޭ: ރައީސް ނަޝީދު
8 މާރިޗު 2023 | ބުދަ 07:01އަންހެން މެމްބަރުން އިތުރުކުރުމުގެ އިސްލާހެއް ރަސްމީކޮށް ހުޅަހަޅާފައެއް ނުވޭ
މުހައްމަދު ނަޝީދު
ރައްޔިތުންގެ މަޖިލީހުގައި އަންހެނުންގެ ދައުރު އިތުރުކުރަން ޖެހޭ ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ބުދަ ދުވަހު ރައްޔިތުންގެ މަޖިލީހުގެ ރިޔާސަތުގައި ވާހަކަދައްކަވަމުން ރައީސް ނަޝީދު ވަނީ ބައިނަލްއަޤުވާމީ އަންހެނުންގެ ދުވަހާއި ގުލިގެން ވާހަކަދައްކަވާފައެވެ. އަދި މަޖިލީހުގައި އަންހެނުންގެ ދައުރު ފުޅާކުރުމާއި މެދު އެމަނިކުފާނު ވަނީ ވާހަކަދައްޖަވާފައެވެ. އެގޮތުން މަޖިލީހުގައި އަންހެނުން ހިމެނޭނެގޮތާއި ގުޅޭގޮތުން ރައްޔިތުން ވިސްނާނެކަމަށް ޤަބޫލުކުރައްވާ ކަމަށް ރައީސް ނަޝީދު ވަނީ ވިދާޅުވެފައެވެ.
އެހެންކަމުން މިހާރު މަޖިލިސް އެކުލެވިގެންވާ ގޮތް ބަދަލުކުރުމަށް ގާނޫނު އަސާސީއަށް އިސްލާހު ގެނައުމަކީ ސިޔާސީ ޕާޓީތަކުގެ ޒިންމާއެއް ކަމަށް ރައީސް ނަޝީދު ވިދާޅުވިއެވެ. ހަމައެހެންމެ މަޖިލީހުގައި އަންހެނުންގެ ދައުރު ފުޅާކޮށް، މަޖިލީހުގައި ތަމްސީލްކުރުމަށް ފަހި ގޮތެއް ހޯދައި ދޭން އެންމެން އަޒުމް ކަނޑައަޅަން ޖެހޭ ކަމަށް ވެސް އެމަނިކުފާނު ވިދާޅުވިއެވެ.
މަޖިލީހުގައި މިހާރު ޖުމުލަ 87 މެންބަރުން ތިއްބަބަވައެވެ. އޭގެ ތެރޭގައި ތިބީ ހަތަރު އަންހެން މެމްބަރުންނެވެ. އެއެ މެމްބަރުންނަކީ މަޖިލީހުގެ ނާއިބު ރައީސް އަދި ގަލޮޅު އުތުރު ދާއިރާގެ މެންބަރު އީވާ ޢަބްދުﷲ، ހިންނަވަރު ދާއިރާގެ މެންބަރު ޖީހާން މަޙްމޫދު، އައްޑޫ މީދޫ ދާއިރާގެ މެންބަރު ރޮޒައިނާ އާދަމް އަދި ތުޅާދޫ ދާއިރާގެ މެންބަރު ޙިސާން ޙުސައިންއެވެ. މަޖިލީހުގައި އަންހެނުންގެ ދައުރު އިތުރުކުރުމަށް ޤާނޫނަށް އިޞްލާހު ގެނައުމުގެ ވާހަކަތައް މެންބަރުން މަޖިލީހުގައި ދެއްކެވި ނަމަވެސް އަދި އެފަދަ އިސްލާހެއް ރަސްމީކޮށް ހުޅަހަޅާފައެއް ނުވެއެވެ.
