ރާއްޖޭގެ ސިޔާސީ ހަޔާތަށް ބަލާއިރު ސާޅީސް ދެޔަކުން ފެށިއްޖެ ނަމަ އެކަމެއް ކާމިޔާބު ވާނެ ކަމަށް، ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެ އެވެ.

މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ މައްސަލަ މަޖިލީހަށް ވެއްދުމަށް ފަހު، ޕާޓީތަކުން ކުނޫޒުގައި މިރޭ ބޭއްވި ޖަލްސާގައި ގާސިމް ވިދާޅުވީ ރައީސް މައުމޫން އަބްދުލް ގައްޔޫމްގެ ވެރިކަމުގައި ސިޔާސީ ޕާޓީތައް އުފެއްދުމަށް ހުށަހެޅި ލިސްޓްގައި ވެސް ސޮއިކުރެއްވީ 42 މެމްބަރުން ކަމަށެވެ.

"މިއީ ކޮން ކަހަލަ ފާލެއް ކަމެއް އަޅުގަނޑަކަށް ނޭނގެ. ނަމަވެސް ސާޅީސް ދެއަކުން ފެށިއްޖެތަ އެކަމެއް ކާމިޔާބު ވާނެ،" މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ފާސްކުރަން 42 މެމްބަރުންގެ ސޮއި ބޭނުންވާ ގޮތަށް މަޖިލީހުގެ ގަވާއިދަށް ގެނައި ބަދަލަށް އިޝާރަތް ކުރައްވައި ގާސިމް ވިދާޅުވި އެވެ.

މަސީހުގެ އިތުބާރު ނެތްކަމުގެ މައްސަލަ ވެއްދުމަށް 45 މެމްބަރުން ސޮއިކުރައްވާފައިވާއިރު، މަޖިލީހުގެ މެމްބަރުންނަށް ގާސިމް ވަނީ ޝުކުރު އަދާކުރައްވައިފަ އެވެ.

މަޖިލީހުގެ ޖަލްސާތައް މެދުކަނޑާލާފައިވާއިރު، އެއީ ކިހާ މުއްދަތެއްކަން ނޭނގޭ ކަމަށާއި ކިތަންމެ ލަސްކުރިއަސް އަޅުގަނޑުމެން މިތިބީ ސާބިތުކަމާއެކުގައި ކަމަށެވެ.

ގާސިމް ވިދާޅުވީ މަސީހުގެ އިތުބާރު ނެތްކަމުގެ މައްސަލަ ހުށަހަޅުއްވާފައިވަނީ އެ މަނިކުފާނު އެ މަގާމަށް ހޮވިވަޑައިގެންނެވި ވޯޓަށް ވުރެ އެއް ވޯޓް އިތުރަށް ކަމަށެވެ. މަސީހާ ދެކޮޅަށް ސޮއިކުރެއްވީ 45 މެމްބަރުން ތިއްބެވި ނަމަވެސް، ޖުމުލަ އަދަދަކީ އެ އަދަދެއް ނޫން ކަމަށް ވެސް ގާސިމް ވިދާޅުވި އެވެ.

ގާސިމް ވިދާޅުވީ، ދޮން ދަނގަޑުން ބިރު ދެއްކިޔަސް، ދެން ބިރު ނުގަންނަނެ ކަމަށާއި ޖަލަށް ވެސް ދެން ނުގެންދެވޭނެ ކަމަށެވެ.

"ﷲ އިރާދަކުރެއްވިއްޔާ ދެން އަޅުގަނޑެއް ނުގެންދެވޭނެ،" އޭނާ  ވިދާޅުވި އެވެ.  

މަޖިލީހުގެ ޖަލްސާތައް މެދުކަނޑާލާފައިވާއިރު، އެއީ ކިހާ މުއްދަތަކަށް ނޭނގޭ ކަމަށާއި ކިތަންމެ ލަސްކުރިއަސް އަޅުގަނޑުމެން މިތިބީ ސާބިތުކަމާއެކުގައި ކަމަށް ވެސް ގާސިމް ވިދާޅުވި އެވެ.

މަސީހުގެ އިތުބާރު ނެތްކަމުގެ މައްސަލަ ހުށަހެޅުއްވުމުގައި އިސްދޫ ދާއިރާގެ މެމްބަރު އަހްމަދު ރަޝީދުގެ ސޮއި ހިމަނާފައިވި ނަމަވެސް އެއީ ސައްހަ ސޮއެއް ނޫން ކަމަށް އަހްމަދު ރަޝީދު ވިދާޅުވެފައިވާއިރު، އެކަމަށް ރައްދު ދެއްވައި ގާސިމް ވިދާޅުވީ އެއީ އިތުރުފުޅެއް ކަމަށެވެ. 

ގާސިމް ވިދާޅުވީ ސިޔާސީ މަސައްކަތުގައި ކުރީގެ ރައީސް މުހައްމަދު ނަޝީދާއި ކުރީގެ ރައީސް މައުމޫނު އަބްދުލް ގައްޔޫމާއި އަދާލަތު ޕާޓީގެ ރައީސް އިމްރާން އަބްދުﷲ ކުރެއްވި މަސައްކަތް ފާހަގަ ކުރެއްވޭ ކަމަށެވެ. ނަޝީދު ކުރެއްވި މަސައްކަތް ވަރަށް ބޮޑު ކަމަށާއި އެއަށް ވުރެ ބޮޑަށް މަސައްކަތް ކުރެއްވި ބޭފުޅުން ވެސް އެބަ ތިއްބެވި ކަމަށެވެ.

"ނަމަވެސް އެއީ އަޅުގަނޑު ކަމަށް އަޅުގަނޑު ދަންނަވަން ނެތިން،" ގާސިމް ވިދާޅުވި އެވެ.

ކުރީގެ ރައީސް ނަޝީދަކީ އަލިގަދަ ތަރިއެއް ކަމަށް ގާސިމް ވިދާޅުވިއިރު، މައުމޫނު ކައްވަޅުގައި އޮންނަ ދުވަހު ވެސް ދިވެހި ރައްޔިތުން ފަހުރުވެރި ވާނެ ކަމަށެވެ.

ގާސިމް ވިދާޅުވީ 1984 ވަނަ އަހަރުން ފެށިގެން އެ މަނިކުފާނަކީ އިސްލާހީ މަސައްކަތް ކުރައްވަމުން ގެންދަވާ ބޭފުޅެއް ކަމަށެވެ.