ބީބީ ރަނާސް އިން މިއަހަރަށް ބޭނުން ކުރާނެ ރަސްމީ ޖާޒީ ލޯންޗުކޮށްފި އެވެ.

މި ޖާޒީ ލޯންޗުކޮށްފައި ވަނީ އެކަމަށްޓަކައި ހޯމަ ދުވަހުގެ ހަވީރު ސިންތެޓިކް ޓްރެކުގައި ބޭއްވި ޚާއްސަ ރަސްމިއްޔާތެއްގަ އެވެ. މި ރަސްމިއްޔާތުގައި ވަނީ އެ ގްރޫޕުން މިއަހަރަށް ބޭނުން ކުރަން ނިންމާފައިވާ ރަސްމީ އޮފިޝަލް އަދި ދުވުންތެރިންގެ ޖާޒީ ލޯންޗުކޮށްފަ އެވެ. ބީބީ ރަނާސް އިން މައުލޫމާތު ދޭ ގޮތުގައި މި ޖާޒީ އަކީ މިއަހަރު އޮންނަ މޯލްޑިވްސް ހާފް މެރަތަންގައި އެ ގްރޫޕުން ބޭނުން ކުރާނެ ޖާޒީ އެވެ. މީގެ އިތުރުން އަހަރުގެ ބާކީ ބައިގައި ވެސް ޖާޒީ ބޭނުން ކުރަން ނިންމާފައިވާއިރު، ކުލަ އަށް ބަދަލު އައުމަކީ އެކަށީގެންވާ ކަމެއް ކަމަށް އެ ގްރޫޕުން ބުނެ އެވެ. ނަމަވެސް ޖާޒީގެ ޑިސައިން އަށް އެއްވެސް ބަދަލެއް ނުގެންނާނެ އެވެ. ބީބީ ރަނާސްގެ ފަރާތުން މޯލްޑިވްސް ހާފް މެރަތަންގައި 54 ދުވުންތެރިން ބައިވެރިވުމަށް ރަޖިސްޓްރީކޮށްފައިވާ ކަމަށް ވެސް އެ ގްރޫޕުން މައުލޫމާތު ދެ އެވެ.

ބީބީ ރަނާސް އަކީ މީގެ ހަތް އަހަރު ކުރިން ފެށިގެން ދުވުންތެރިންނަށް ފުރުސަތު ދެމުން އަންނަ ގްރޫޕް އެކެވެ. އެގޮތުން އެ ގްރޫޕުން އެއްވެސް ދުވުންތެރިޔެއްގެ އަތުން ފައިސާއެއް ނުނަގަ އެވެ. ހިލޭ ސާބަހަށް ކުރިއަށް ގެންދާ މި ގްރޫޕުން ވަނީ މަޖީދިއްޔާ ދުވުން، އޭޑީކޭ ދުވުން، މޯލްޑިވްސް ސްޕޯޓްސް ކޯޕަރޭޝަނުން ބޭއްވި ދުވުން އަދި ޓީއެފްޖީގައި 50 އަށް ވުރެ ގިނަ ދުވުންތެރިން ބައިވެރިކޮށްފަ އެވެ. މީގެ އިތުރުން ބީބީ ރަނާސް އިން މިއަހަރަށް ކަނޑައެޅި ލަނޑުދަނޑިތަކުގެ ތެރޭގައި އެ ގްރޫޕުން ބައިވެރިވާ ކޮންމެ ދުވުމެއްގައި މަދުވެގެން 50 ދުވުންތެރިން ބައިވެރި ކުރުމަށް ވަނީ ނިންމައިފަ އެވެ.