ރައީސް، ޓިމޯރ-ލެސްޓޭގެ ރައީސާ ބައްދަލުކުރައްވައިފި
6 މާރިޗު 2023 | ހޯމަ 02:12ދެޤައުމުގެ ދެމެދުގައި އޮތް ސިޔާސީ ގުޅުން އިތުރަށް ބަދަހިކުރެއްވުމަށް ދެބޭފުޅުންވެސް މަސައްކަތްޕުޅު ކުރައްވާނެކަމުގެ ޔަޤީންކަން ދެއްވި
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު، ޑިމޮކްރެޓިކް ރިޕަބްލިކް އޮފް ޓިމޯރ-ލެސްޓޭގެ ރައީސް ޑރ. ހޯސޭ ރާމޯސް-ހޯރޓާއާ ބައްދަލުކުރައްވައިފިއެވެ.
މިބައްދަލުކުރެއްވުން ބާއްވާފައިވަނީ މިހާރު ކުރިއަށްދާ އދ. ގެ އެންމެ ކުޑަކޮށް ތަރައްޤީވެފައިވާ ޤައުމުތަކުގެ 5 ވަނަ ކޮންފަރެންސްގެ ހަވާސާގެ ތެރެއިންނެވެ.
އާދީއްތަ ދުވަހު ބޭއްވި މި ބައްދަލުވުމުގައި ރައީސް ޞާލިހު އާއި ޓިމޯރ-ލެސްޓޭގެ ރައީސް ވަނީ ސަރަހައްދީ އަދި ބައިނަލްއަގްވާމީ މަސްލަހަތު ހިމެނޭ ކަންކަމާ ބެހޭ ގޮތުން މަޝްވަރާ ކުރައްވައި، އެއް އަމާޒެއް ހާސިލުކުރުމަށް ގުޅިގެން މަސައްކަތް ކުރުމަށް އެއްބަސްވެވަޑައިގެންފައެވެ. އަދި ދެ ޤައުމުގެ ލީޑަރުން ވަނީ ދެ ޤައުމުގެ ދެމެދުގައި އޮތް ގާތް ގުޅުމުގެ މައްޗަށް އަލިއަޅުއްވާލައްވާ ވާހަކަފުޅު ދައްކަވާފައެވެ.
މި ބައްދަލުކުރެއްވުން ނިންމަވާލައްވަމުން ރައީސް އާއި ޓިމޯރ-ލެސްޓޭގެ ރައީސް ވަނީ ދެ ޤައުމުގެ މަސްލަހަތު ހިމެނޭ ކަންކަމުގައި އެކުގައި މަސައްކަތްކުރައްވާނެކަމުގެ ޔަޤީންކަން އަރުއްވާފައެވެ. އަދި، ދެޤައުމުގެ ދެމެދުގައި އޮތް ސިޔާސީ ގުޅުން އިތުރަށް ބަދަހިކުރެއްވުމަށް ދެބޭފުޅުންވެސް މަސައްކަތްޕުޅު ކުރައްވާނެކަމުގެ ޔަޤީންކަން ވެސް އެރުއްވެވިއެވެ.
