އޮމާނާއި ސައުދީއާއެކު އިގްތިސާދީ މަޝްވަރާތަކެއް ބާއްވައިފި
5 މާރިޗު 2023 | އާދީއްތަ 02:15އޮމާނާއެކު ހަކަތައިގެ ދާއިރާއިން ގުޅުން ބަދަހިކުރުމަށް މަޝްވަރާކުރި
ސައުދީއާއެކު ބޭއްވި މަޝްވަރާގެ ތެރެއިން
އޮމާނާއި ރާއްޖެއާ ދެމެދު އިގްތިސާދީ ދާއިރާއިންނާއި، ހަކަތައިގެ ދާއިރާއިން ގުޅުން ބަދަހިކުރުމަށް މަޝްވަރާކޮށްފިއެވެ.
މި މަޝްވަރާ ބައްދަލުވުން ބާއްވާފައިވަނީ ފިނޭންސް މިނިސްޓަރު އިބްރާހިމް އަމީރާއި ސަރުކާރުގެ އިސްވެރިން އޮމާނާއި ސައުދީއަށް ކުރެއްވި ދަތުރުފުޅުގެ ތެރެއިންނެވެ.
މި ދަތުރުފުޅުގައި އޮމާނަށް ވަޑައިގެން މިނިސްޓަރު އަމީރު ވަނީ އެގައުމުގެ ފިނޭންސް މިނިސްޓަރު ސުލްތާން ބިން ސާލިމް އަލް ހަބްސީއާ ބައްދަލުކުރައްވާފައެވެ. މި ބައްދަލުވުމުގައި މާލީ ދާއިރާއާ ގުޅުންހުރި މަޝްވަރާތައް ކުރިއަށްގެންދަވާފައިވެއެވެ. އަދި މި ދާއިރާއިން އިތުރަށް ގުޅުން ބަދަހިކުރެއްވުމަށް މަޝްވަރާކުރެއްވިއެވެ.
މިނިސްޓަރު އަމީރު ވަނީ އެގައުމުގެ މިނިސްޓަރ އޮފް އެނަރޖީ އެންޑް މިނަރަލްސް، ސާލިމް ބިން ނަސީރު އަލް އައުފީއާވެސް ބައްދަލުކުރައްވާފައެވެ. މި ބައްދަލުވުމުގައި ދެ މިނިސްޓަރުން ވަނީ ހަކަތައިގެ ދާއިރާއިން ދެގައުމުން ގުޅުން ބަދަހިކުރުމާ ގުޅޭގޮތުން މަޝްވަރާކުރައްވާފައެވެ.
މީގެ އިތުރުން، ސައުދީއަށް ވަޑައިގެން ސައުދީ ފަންޑް ފޮރ ޑިވެލޮޕްމެޓް (އެސްޑީއެފް)ގެ ސީއީއޯ ސުލްތާން އަލް މަރްޝަދްއާ ވެސް ބައްދަލުކުރައްވާފައިވެއެވެ. މި ބައްދަލުވުމުގައި ވަނީ އެސްޑީއެފްގެ ފަރާތުން ރާއްޖޭގައި ކުރިއަށްގެންދާ ޕްރޮޖެކްޓުތަކާ ގުޅޭގޮތުން މަޝްވަރާކުރައްވާފައެވެ.
