ވައިކަރަދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ގޮނޑި އަދާލަތަށް، ކައުންސިލުގެ ގޮނޑި އެމްޑީޕީއަށް
4 މާރިޗު 2023 | ހޮނިހިރު 15:56މި ދެ އިންތިޚާބުގައިވެސް ވާދަކޮށްފައިވަނީ އެމްޑީޕީ އާއި އަދާލަތު ޕާޓީން
ވައިކަރަދޫ ބައި އިލެކްޝަންގައި ވޯޓުލަނީ
ހދ. ވައިކަރަދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ގޮނޑި އަދާލަތުގެ ކެންޑިޑޭޓް, އަދި ކައުންސިލްގެ އަންހެން މެންބަރުގެ ގޮނޑި އެމްޑީޕީގެ ކެންޑިޑޭޓް ކާމިޔާބުކޮށްފިއެވެ.
މި ދެ އިންތިޚާބުގައިވެސް ވާދަކޮށްފައިވަނީ އެމްޑީޕީ އާއި އަދާލަތު ޕާޓީންނެވެ.
އިލެކްޝަންސް ކޮމިޝަން (އީސީ)ން އާންމުކޮށްފައިވާ ވަގުތީ ނަތީޖާތަކަށް ބަލާއިރު ވައިކަރަދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބައި އިލެކްޝަން އަދާލަތު ޕާޓީގެ ކެންޑިޑޭޓް ފާތުމަތު ޒުނައިނާ ކާމިޔާބުކުރީ 376 ވޯޓުންނެވެ. އިންތިޚާބުގައި ވާދަކުރި އެމްޑީޕީ ކެންޑިޑޭޓް ރަމްޒިއްޔާ އިބްރާހީމަށް ލިބިފައިވަނީ 163 ވޯޓެވެ.
ހދ. ވައިކަރަދޫ ކައުންސިލްގެ އަންހެން މެންބަރު އިންތިޚާބު ކުރުމަށް ބޭއްވި ބައި އިލެކްޝަންގެ ވަގުތީ ނަތީޖާއަށް ބަލާއިރު އިންތިޚާބު ކާމިޔާބުކުރި އެމްޑީޕީގެ ކެންޑިޑޭޓް ފާތުމަތު ޝިޒުނާ އަށް ލިބިފައިވަނީ 283 ވޯޓެވެ. އަދާލަތު ޕާޓީގެ ކެންޑިޑޭޓު ފާތުމަތު ނަޒްލާ އަށް ލިބިފައިވަނީ 258 ވޯޓުންނެވެ.
މިއިންތިޚާބުގައި 1361 މީހުންނަށް ވޯޓުލުމުގެ ހައްގު ލިބިފައިވާއިރު ވޯޓުލާފައިވަނީ 576 މީހުންނެވެ.
