އަންހެނުން ސިޔާސީ ދާއިރާއަށް ގެނައުމަށް ކުރާ ކޮންމެ ކަމަކަށް އަންހެނުން ސަޕޯޓްދޭންޖެހޭ: ރޮޒައިނާ
4 މާރިޗު 2023 | ހޮނިހިރު 14:27ހަމަހަމަކަން ހޯދުމަށް ހަމަހަމަކުރުމަށް އެހީތެރިކަން ބޭނުންވާކަމަށް ރޮޒައިނާ ވިދާޅުވި
އައްޑޫ މީދޫ ދާއިރާގެ މެމްބަރ ރޮޒައިނާ އާދަމް
އަންހެނުން ސިޔާސީ ދާއިރާއަށް ނެރުމުގައި ކުރާ ކޮންމެ ކަމެއްގައި އެންމެ ފުރަތަމަ އެކަމަކަށް ސަޕޯޓްދޭންޖެހޭ ބަޔަކީ އަންހެނުންކަމަށް އައްޑޫ މީދޫ ދާއިރާގެ މެމްބަރ ރޮޒައިނާ އާދަމް ވިދާޅުވެއްޖެއެވެ.
ޔޫއެންޑީޕީ މޯލްޑިވްސް އާއި އޮސްޓްރޭލިޔާ ސަރުކާރުގެ އެހީއާއެކު ކުރިޔަށްގެންދާ ޕްރެކްޓިސް ޕާލަމަންޓް ފޯރ ވިމެންގެ ފަސް ވަނަ ބެޗް ނިންމުމުގެ ރަސްމިއްޔާތުގައި ވާހަކަދައްކަވަމުން ރޮޒައިނާ ވިދާޅުވީ ޤާނޫނޫ އަސާސީން އަންހެނުންނާއި ފިރިހެނުންނަށްވެސް ސިޔާސީ އެކި މަގާމުތަކަށް ކުރިމަތިލުމުގެ ހަމަހަމަކަން ލިބިދީފައިވާކަމަށެވެ. ނަމަވެސް ނަތީޖާތަކަށް ބަލާއިރު އެކަން ހާސިލުވޭތޯ ސުވާލުއުފެދޭކަމަށް ރޮޒައިނާ ވިދާޅުވިއެވެ.
ހަމަހަމަކަން ހޯދުމަށް ހަމަހަމަކުރުމަށް އެހީތެރިކަން ބޭނުންވާކަން ފާހަގަކުރައްވަމުން ރޮޒައިނާ ވިދާޅުވީ ކައުންސިލުތަކަށް އަންހެނުންނަށް 33 އިންސައްތަ ގާނޫނަކުން ކަނޑައެޅުމުން ހަމަހަމަކަން ގެނައުމަށް ގާނޫނީ ގޮތުން ފިޔަވަޅެއް އެޅިގެންދިޔަކަމަށެވެ. ނަމަވެސް އެކަމާއި ގުޅޭގޮތުންވެސް ދެކޮޅު ޚިޔާލުތަކެއް ފާޅުކުރިކަމަށެވެ.
ސިޔާސީ ދާއިރާއަށް ނިކުންނަށް ތިބި އަންހެނުންނަށް ދެއްވާނެ މެސެޖާގުޅޭގޮތުން ވާހަކަދައްކަވަމުން ރޮޒައިނާ ވިދާޅުވީ އަންހެނުން ސިޔާސީ ދާއިރާއަށް ނިކުތުމަށް ނޫނެކޭ ނުބުނަންޖެހޭ ބަޔަކީ އަންހެނުންކަމަށެވެ. ލިބޭ ފުރުސަތުތަކުގެ ތެރެއިން އަންހެނަކު އެފަދަ މަގާމަކަށް އަތުވެއްޖެނަމަ އެކަމާއި އުފާކުރަންޖެހޭ ބަޔަކީވެސް އަންހެނުންކަމަށް ރޮޒައިނާ ވިދާޅުވިއެވެ.
ރޮޒައިނާ ވަނީ މި ޕްރޮގްރާމްގައި ބައިވެރިވި އަންހެނުން ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގައި ވާދަކުރުމަށް އެދިވަޑައިގަންނަވާފައެވެ.
ޕްރެކްޓިސް ޕާލަމެންޓް ސީރީޒްގައި މަދަނީ ތައުލީމުގެ މުހިންމު ބައިތަކާއި ރައްޔިތުންގެ މަޖިލީހުގެ މުހިންމު މަސައްކަތްތަކާއި ގުޅޭގޮތުން މައުލޫމާތު ފޯރުކޮށްދެއެވެ. އަދި ޕްރޮގްރާމްގެ ބައިވެރިންގެ މެދުގައި މަޖިލީޙުގެ ޖަލްސާއެއްގެ ނަމޫނާ މާދިރީއެއް ބާއްވައެވެ.
