ރައްޔިތުންގެ މަޖިލީހުގެ ރައީސްގެ މަގާމުން އަބްދުﷲ މަސީހް އިސްތިއުފާ ދެއްވަން ޖެހޭ ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.
ރާއްޖެޓީވީ އަށް އުމަރު ނަސީރު ރާއްޖެ ޓީވީއަށް ފޯނުން ދެއްވި އިންޓަވިއުގައި އުމަރު ވިދާޅުވީ މަސީހް އިސްތިއުފާ ދެެއްވުމަށްފަހު ރައްޔިތުންގެ މަޖިލީހުގެ ރައީސްގެ މަގާމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ގެނައުމަށް ވޯޓު ދެއްވަން ޖެހޭ ކަމަށެެވެ. އޭނާ ވިދާޅުވެފައިވަނީ ގާސިމް އިބްރާހިމަށް މީގެ ކުރިންވެސް މަޖިލީހުގެ މައްސަލަތައް ހައްލު ކުރައްވާފައިވާ ކަމަށެވެ.
އުމަރު ވިދާޅުވީ ހާއްސަ މަޖިލީހުގައި ގާސިމް އަދާކުރެއްވި ދައުރުގެ ސަބަބުން، މަޖިލީހުގެ މައްސަލަ ހައްލު ކުރެވިދާނެ ކަމަށް ގަބޫލު ކުރައްވާ ކަމަށާއި ހުރިހާ ފަރާތްތަކާ ގުޅިގެން މައްސަލަ ހައްލު ކުރެއްވޭނީ ގާސިމަށް ކަމަށެވެ.
އުމަރު ނަސީރު މި މޭރުމުން ވާހަކަ ދައްކަވާފައި މިވަނީ ރައްޔިތުންގެ މަޖިލީހުގެ ރައީސް އަބްދުﷲ މަސީހް ގެ އިތުބާރު ނެތް ކަމުގެ މައްސަލަ ރައްޔިތުންގެ މަޖިލީހަށް މިއަދު ހުށަހެޅުއްވުމާ ގުޅިގެންނެވެ. އެ މައްސަލަ ހުށައަޅުއްވާފައިވަނީ 45 މެމްބަރުންގެ ސޮޔާއެކު އެވެ.
ރައްޔިތުންގެ މަޖިލީހުގެ ރައީސްގެ އިތުބާރު ނެތް ކަމުގެ މައްސަލަ ހުށަހެޅުވީ ސަރުކާރު ހިންގާ މައި ޕާޓީ ޕީޕީއެމްގެ މަޖިލިސް މެމްބަރުންނާއި ސަރުކާރާ އިދިކޮޅު އެމްޑީޕީ އާއި ޖުމްހޫރީ ޕާޓީގެ މެމްބަރުންގެ ސޮޔާއެކު އެވެ.
މަޖިލީހުގެ 45 މެމްބަރުން ސޮއިކުރެއްވުމުން، ދެން އިތުރަށް މި މައްސަލަ ހުއްޓިވިދާނެ ކަމަށް ގަބޫލު ނުކުރައްވާ ކަމަށް އުމަރު ވިދާޅުވި އެވެ. އަދި ސުޕްރީމް ކޯޓާއި މިނިވަން މުއައްސަސާތަކުން ވެސް މިނިވަންކަމާއެކު އަމަލުކުރެއްވުމަށް އުމަރު ގޮވާލެއްވި އެވެ.
މަސީހުގެ އިތުބާރު ނެތްކަމުގެ މައްސަލައަށް ފަހު، ރައީސް ޔާމީންގެ އިތުބާރު ނެތްކަމުގެ މައްސަލަ ހުށަހެޅުމަކީ ވެސް އެކަށީގެންވާ ކަމެއް ކަމަށް އުމަރު ވިދާޅުވި އެވެ.
