ޝަނޫންގެ މައްޗަށް އުފުލި، މާރާމާރީއާއި ބިރުދެއްކުމުގެ ދައުވާވެސް ސާބިތުވި

ލ. މުންޑޫ، ނޫވިލު، އަލީ ޒިޔަދަމް މަރާލި މައްސަލާގައި، ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާ ސާބިތުވެ މަރަށް ހުކުމްކޮށްފައިވާ މުހައްމަދު ޝަނޫންގެ މައްޗަށް އުފުލި އިތުރު 2 ދައުވާއެއްވެސް ސާބިތުވެއްޖެއެވެ.

ޝަނޫންގެ މައްޗަށް މާރާމާރީ ހިންގުމުގެ ކުށުގެ ދައުވާ އުފުލާފައިވަނީ ޒިޔަދަމްގެ ހަށިގަނޑު ހޮސްޕިޓަލަށް ގެންދިޔަ މީހާއާ މާރާާމާރީ ހިންގައި، އޭނާގެ މޭމަތީގައި އަތް އަޅައި ކޮއްޕާލާފައިވާތީއެވެ. އެހެން އޭނާ ހެދުމުގެ ސަބަބުން އަލީ ޒިޔަދަމްގެ ހަށިގަނޑުވެސް ބިންމައްޗަށް ވެއްޓުނެވެ.

އެ ދައުވާ ސާބިތުވެ އޭނާ 1 މަސް ދުވަހަށް ޖަލަށް ލާން ވަނީ ހުކުމް ކޮށްފައެވެ.

އޭނާގެ މައްޗަށް، ބިރު ދެއްކުމުގެ ކުށުގެ ދައުވާ އުުފުލީ ޒިޔަދަމްގެ އާއިލާ މީހަކު ހޮސްޕިޓަލު ކައިރީގައި ހުއްޓައި އެމީހާއަށް އިންޒާރުދީ ބިރު ދައްކާފައިވާތީއެވެ.

އެ ދައުވާ ސާބިތުވެ އޭނާގެ މައްޗަށް 18 މަސް ދުވަހުގެ ޖަލު ހުކުމެއް ވަނީ އިއްވާފައެވެ.

މި ދައުވާތައް ސާބިތުވިނަމަވެސް، އޭނާ މި ދައުވާތަކާ ގުޅިގެން އޭނާ ތަންފީޒުކުރަންޖެހޭ އަދަބެއް ނޯންނާނެއެވެ. ސަބަބަކީ އޭނާ އެ ދައުވާތަކަށް ކަނޑައެޅުނު އަދަބަށްވުރެ ގިނަ ދުވަހު ބަންދުގައި ހޭދަކޮށްފައިވާތީއެވެ.

ޝަނޫންއަށް ކްރިމިނަލް ކޯޓުން ވަނީ މަރުގެ އަދަބު އިއްވާފައެވެ. އެއީ އޭނާގެ މައްޗަށް އުފުލާފައިވާ، ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާ ސާބިތުވެ، ޒިޔަދަމްގެ ހުރިހާ ވާރިސުންވެސް މަރަށް މަރު ހިފަން ބޭނުންވާކަމަށް ބުނެފައިވާތީއެވެ.