ދަނޑުވެރިޔާގެ ނަމުގައި އެޕްލިކޭޝަނެއް ތައާރަފުކުރަނީ
ރަމަޟާން މަހުގެ ފަހުން އެޕްލިކޭޝަން ރަސްމީކޮށް ތައާރަފު ކުރެވޭނެ
ކާށިދޫ ދަނޑުބިން
"ދަނޑުވެރިޔާ"ގެ ނަމުގައި އެޕްލިކޭޝަނެއް ތައާރަފުކުރުމަށް، މިނިސްޓްރީ އޮފް ފިޝަރީޒް އެންޑް އެގްރިކަލްޗަރއިން ނިންމައިފިއެވެ.
ދަނޑުވެރިންނަށް ހާއްސަކޮށްގެން އެޕލްިކޭޝަނެއް ތައާރަފުކުރުމަށް ނިންމާފައިވަނީ، ދަނޑުވެރިކަމާބެހޭ ތަފާތު އެކި ފަންނީ މައުލޫމާތު ދަނޑުވެރިންނާއި ހިއްސާކޮށް، އެފަރާތްތަކާއެކު މިހާރަށްވުރެ ގާތުން މަސައްކަތް ކުރުމަށް ކަމަށް މިނިސްޓްރީން ބުނެއެވެ.
މި އެޕްލިކޭޝަންގެ ޒަރީއާއިން ދަނޑުވެރިންނަށް އެ މިނިސްޓްރީއާ މުއާމަލާތުކުރުމުގެ ފުރުސަތު ލިބިގެންދާނެއެވެ. އަދި މިއެޕްލިކޭޝަންގެ ޒަރީއާއިން، މޫސުމީ ބަދަލުތަކާއި ދަނޑުތައް މުޑުވައްކުރުމުގެ މައުލޫމާތުތަކުގެ އިތުރުން، ދަނޑުވެރިން ބޭނުންވާ ހުރިހާ ފަންނީ މައުލޫމާތު ހިއްސާކުރެވޭނެއެވެ.
މިހާރު ކުރިއަށްދަނީ މިއެޕްލިކޭޝަން ބޭނުންކުރުމަށް ތަމްރީންކުރުމުގެ ޕްރޮގްރާމްތައް ކަމަށާއި ރަމަޟާން މަހުގެ ފަހުން އެޕްލިކޭޝަން ރަސްމީކޮށް ތައާރަފު ކުރެވޭނެ ކަމަށް ވެސް އެ މިނިސްޓްރީން ބުންޏެވެ.
ފިޝަރީޒް މިނިސްޓްރީން އެޕްލިކޭޝަން ތައާރަފުކުރުމަށް މަސައްކަތް ކުރަމުންދާއިރު، ފާއިތުވި ހަތަރު އަހަރު ދަނޑުވެރިންނަށް ލޯނުގެ ގޮތުގައި 6.88 މިލިއަން ރުފިޔާ ދޫކޮށްފައިވާ ކަމަށް އެ މިނިސްޓްރީން ބުނެއެވެ. ސަރުކާރުގެ ދަނޑުވެރި ނަފާ ލޯނު ޕްރޮގްރާމުގެ ދަށުން މިހާތަނަށް 25 ފަރާތަކަށް ލޯނު ވަނީ ދޫކޮށްފައެވެ. މީގެ ތެރޭގައި ހިމެނެނީ ތިން ކުންފުންޏަކާއި 20 ފިރިހެން ދަނޑުވެރިންނާއި 2 އަންހެން ދަނޑުވެރިންނެވެ.
މި ޕްރޮގްރާމުގެ ދަށުން ކުންފުނިތަކަށް މިހާތަނަށް ދޫކޮށްފައިވަނީ 3،520،820 (ތިން މިލިއަން ފަސް ލައްކަ ވިހި ހާސް އަށްސަތޭކަ ވިހި) ރުފިޔާގެ ލޯނެވެ. ފިރިހެން ދަނޑުވެރިންނަށް 3،216،909 (ތިން މިލިއަން ދެ ލައްކަ ސޯޅަ ހާސް ނުވަސަތޭކަ ނުވަ) ރުފިޔާގެ ލޯނު ދޫކޮށްފައިވާއިރު، އަންހެން ދަނޑުވެރިންނަށް ދޫކޮށްފައިވަނީ 150،000 (އެއްލައްކަ ފަންސާސް ހާސް) ރުފިޔާގެ ލޯނެވެ.
ދަނޑުވެރި ނަފާ ލޯނުގެ ޕްރޮގްރާމުގެ ދަށުން، ދަނޑުވެރިންނަށް ދޫކޮށްފައިވާ ޖުމްލަ ލޯނުގެ އަދަދު 6،887،729 (ހަ މިލިއަން އަށް ލައްކަ އައްޑިހަ ހަތް ހާސް ހަތްސަތޭކަ ނަވާވީސް) ރުފިޔާއަށް އަރައެވެ.
ދަނޑުވެރި ނަފާ ޕްރޮގްރާމުގެ ދަށުން ދެމުން އަންނަ ލޯނަކީ އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްއެމްއީ ބޭންކް) މެދުވެރިކޮށް، ދަނޑުވެރިންނަށް ހާއްސަކޮށްގެން ދެމުން އަންނަ ލޯނެކެވެ. މި ލޯނަށް އެންމެ ފުރަތަމަ ފުރުސަތު ހުޅުވާލީ 18 މާޗު 2019ގައެވެ.
މި ލޯނު ދިނުމުގައި ބަލަނީ ޓެކްނޮލޮޖީ ބޭނުންކޮށްގެން ޒަމާނީ ދަނޑުވެރިކަމުގެ މަޝްރޫއުތަކަށެެވެ. އެގޮތުން އަރބަން އެގްރިކަލްޗަރާއި ޕްރޮޓެކްޓެޑް އެގްރިކަލްޗަރާއި ވަރޓިކަލް ގާރޑެނިންގއާއި ޕޯލްޓްރީ ފާމިންގެ އިތުރުން، ގަސް މުޑުވައްކުރާ ނަރސަރީތައް ގާއިމްކުރުން ފަދަ ކަންކަން މީގެ ތެރޭގައި ހިމެނެއެވެ.
