400ށް ވުރެ ގިނަ ދަރިވަރުންނާއެކު ތިލަދުންމަތީ އިންޓަރ ސްކޫލް ފެތުމުގެ މުބާރާތް 2023 ކުޅުދުއްފުށީގައި ފަށައިފި

ސްވިމިން އެސޯސިއޭޝަން އޮފް މޯލްޑިވްސްއިން އިންތިޒާމުކޮށްގެން ބާއްވާ ތިލަދުންމަތީ އިންޓަރ ސްކޫލް ފެތުމުގެ މުބާރާތް 2023 ބުދަ ދުވަހު ކުޅުދުއްފުށީގައި ފަށައިފި އެވެ.

ސްވިމިންގ އެސޯސިއޭޝަން އޮފް މޯލްޑިވްސްއިން އިންތިޒާމުކޮށްގެން، ސްކޫލް މަދްރަސާތަކުގެ ދަރިވަރުންގެ ފެތުމުގެ ހުނަރުވެރިކަމާއި ޤާބިލުކަން އިތުރުކޮށް ފެތުމުގެ ދާއިރާއިން ހުނަރުވެރި ޒުވާނުން ބިނާކުރުމުގެ މަޤްޞަދުގައި ފެށި މިމުބާރާތުގައި އުތުރުގެ ތިން އަތޮޅުގެ އިތުރުން ގދ އަތޮޅުން އަދި މާލޭގެ ސްކޫލުތަކުންވެސް ބައިވެރިވެ އެވެ. އެގޮތުން ޖުމްލަ 22 ސްކޫލަކުން 432 ދަރިވަރުން މުބާރާތުގައި ބައިވެރިވެފައިވެއެވެ.

ފެތުމުގެ މުބާރާތް ފެށުމުގެ ރަސްމިއްޔާތުގައި އެސޯސިއޭޝަންގެ ރައީސް އާއި ކުޅުދުއްފުށީ މޭޔަރު ބައިވެރިވެޑައިގެންނެވި އެވެ.

މި މުބާރާތުގައި ވާދަކުރާ އުމުރުފުރާތަކަކީ 12 އަހަރުން ދަށް 14 އަހަރުން ދަށް 16 އަހަރުން ދަށް 18 އަހަރުން ދަށް އަދި 20 އަހަރުން ދަށެވެ.

މިމުބާރާތް ކުރިއަށް ގެންދަނީ ބޮޑު މުހައްމަދު ކަލޭފާނު ބަނދަރުގައެވެ. މާޗު 1ން 4ށް ކުރިއަށްގެންދާ މިމުބާރާތަކީ މިގޮތަށް ބާއްވާ ފުރަތަމަ މުބާރާތެވެ.