ކ. މާލެ
|
5 އޭޕްރިލް 2025 | ހޮނިހިރު 18:26
ކުޅުދުއްފުށި ސިޓީ
ކުޅުދުއްފުށި ސިޓީ
ސަން އޮންލައިން
ބަންދުގައި ހުރި މީހަކު މަރުވާން އުޅުން
ބަންދުގައި ހުރި މީހަކު އަމިއްލަަ އަށް މަރުވާން މަސައްކަތް ކުރި މައްސަލަ އެންއައިސީ އިން ބަލަނީ
މިހާދިސާ ހިނގާފައިވާ ގޮތުގެ ތަހުގީގެއް ފުލުހުންގެ ޕްރޮފެޝަނަލް ސްޓޭންޑަރޑްސް ކޮމާންޑުން ޚާއްސަ އިސްކަމެއް ދީގެން ދަނީ ކުރިއަށް ގެންދަމުން ކަމަށް ފުލުހުން ވަނީ ބުނެފަ

ކުޅުދުއްފުށި ސިޓީގެ ޕޮލިސް ސްޓޭޝަންގައި ހުރި މީހަކު އަމިއްލައަށް މަރުވާން އުޅުނު މައްސަލައި އާއި ގުޅިގެން އެކަން ހިނގައި ދިޔަ ގޮތް ބަލަމުން އަންނަ ކަމަށް ނެޝަނަލް އިންޓެގްރިޓީ ކޮމިޝަން (އެންއައިސީ) އިން ބުނެފިއެވެ.

އެންއައިސީން އެކްސްގައި ހިއްސާކުރި ޕޯސްޓެއްގައި ބުނެފައި ވަނީ ފުލުހުންގެ ބެލުމުގެ ދަށުގައި ހުރި މީހަކު ހުކުރު ދުވަހުގެ ރޭ 21:12 ހާއިރު އަމިއްލައަށް މަރުވާން މަސައްކަތް ކުރިކަމުގެ މައުލޫމާތު އެ ކޮމިޝަނަށް ލިބިފައިވާ ކަމަށެވެ. އަދި އެކަން ހިނގައި ދިޔަ ގޮތް ދެނެގަތުމަށް އެ ކޮމިޝަންގެ ކުއްލި ހާލަތުތަކާއި ގުޅިގެން އިޖާބަދޭ ޓީމުން ހަރަކާތްތެރިވަމުންދާ ކަމަށް އެންއައިސީޓީން ވަނީ ބުނެފައެވެ.

ހދ.ކުޅުދުއްފުށީ ކަސްޓޯޑިއަލްގެ ބަންދުގައި ހުރި ދިވެއްސަކު އަމިއްލަަ އަށް މަރުވާން މަސައްކަތް ކޮށްފައިވާކަން ފުލުހުން ހާމަކުރީ ހުކުރު ދުވަހުގެ ރޭގެ ވަގުތެއްގައެވެ.

ފުލުހުން އާއްމު ކުރި ބަޔާނެއްގައި ބުނެފައި ވަނީ ހދ.ކުޅުދުއްފުށި ޕޮލިސް ކަސްޓޯޑިއަލްގެ ހައްޔަރުގައި ހުރި މީހަކު 04 އެޕްރިލް 2025 ވަނަ ދަވަހުގެ ރޭ 21:12 އެހާކަށްހާއިރު އަމިއްލަ އަށް މަރުވާން މަސައްކަތް ކޮށްފައިވާ ކަމަށެވެ. އަދި އޭނާ އަށް ކުޅުދުއްފުށީ ހޮސްޕިޓަލްގައި ފަރުވާދެމުންދާ ކަމަށް ފުލުހުން ވަނީ ބުނެފައެވެ. އެ ހޮސްޕިޓަލުން ވަނީ އޭނާގެ ހާލު ސީރިއަސްކަމަށާއި އޭނާ އަށް ފަރުވާ ދެމުން ދަނީ ވެންޓިލޭޓަރުގައި ކަމަށް ބުނެފައެވެ.

އެ މީހާ އަކީ މަސްތުގެ ހާލަތުގައި ހުރެ ގޭގެ މުދަލަށް ގެއްލުން ދީ ހަމަނުޖެހުން ހިންގި މައްސަލައަކާއި ގުޅިގެން އެޕްރިލް 2 ވަނަ ދުވަހު ފުލުހުންގެ ބެލުމުގެ ދަށަށް ގޮސްފައިވާ މީހެއް ކަމަށް ފުލުހުން ވަނީ ބުނެފައެވެ. އެ ބަޔާނުން އެނގޭ ގޮތުން އޭނާ އަކީ 34 އަހަރުގެ ދިވެހި ފިރިހެނެކެވެ.

މި ހާދިސާ އާއި ގުޅިގެން އަޅަން ޖެހޭ ފިޔަވަޅުތައް އެޅުމާއި އެކު ހިއުމަން ރައިޓްސް ކޮމިޝަން އޮފް ދަ މޯލްޑިވްސް އާއި ނޭޝަނަލް އިންޓަގްރިޓީ ކޮމިޝަން އަށް މި ހާދިސާގެ މައުލޫމާތު ދީފައިވާނެ ކަމަށް އޭނާ ވަނީ ބުނެފައެވެ. އަދި އެ ހާދިސާގެ ތަހުގީގަށް މޭޖަރ ކްރައިމް އިންވެސްޓިގޭޝަންގެ ޓީމެއް ކުޅުދުއްފުއްޓަށް ފޮނުވުމަށް ނިންމާފައިވާ ކަމަށް ވެސް ފުލުހުންގެ ބަޔާނުގައި ވަނީ ބުނެފައެވެ.

މިހާދިސާ ހިނގާފައިވާ ގޮތުގެ ތަހުގީގެއް ފުލުހުންގެ ޕްރޮފެޝަނަލް ސްޓޭންޑަރޑްސް ކޮމާންޑުން ޚާއްސަ އިސްކަމެއް ދީގެން ދަނީ ކުރިއަށް ގެންދަމުން ކަމަށް ފުލުހުން ވަނީ ބުނެފައެވެ.

- ކޮމެންޓް