އަމީނީ މަގު، ކޮއިމަލާ ހިނގުމުން ފެށިގެން ގާކޮއްޓާހަމައަށް ބަންދު

އަމީނީމަގުގެ ފަސްވަނަ ސެގްމަންޓުގެ މަސައްކަތް ކުރުމަށް މަގު ބަންދުކުރާ ސަރަހައްދު ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)ން އާންމުކޮށްފިއެވެ.

އާރުޑީސީން ކުރި ޓްވީޓެއްގައި ވަނީ، އަމީނީ މަގު ސެގްމަންޓު 5ގެ މަސައްކަތްތައް ކުރުމަށް މަގު ބަންދުކުރުމަށް މިހާރު ނިންމާފައިވަނީ އަމީނީ މަގާ ކޮއިމަލާ ހިނގުމާ ގުޅޭ ހިސާބުން ފެށިގެން ގާކޮށި ފުލެޓުގެ ޕާކިންޒޯނާ ހަމައަށް ކަމަށެވެ.

އަމީނީ މަގުގައި މިހާތަނަށް ހަތަރު ސެގްމަންޓުގެ މަސައްކަތް ވަނީ ކޮށްފައެވެ. މީގެ ތެރެއިން ތިން ސެގްމަންޓެއްގައި މިހާރު ވަނީ ތާރު އަޅައި ނިމިފައެވެ. އެއީ ހެންވޭރު ކޮޅުން ބޮޑުތަކުރުފާނު މަގާ އަމީނީ މަގު ދިމާވާ ހިސާބުން ފެށިގެން ސްޓެލްކޯއާ ހަމައަށެވެ. އަމީނީމަގު ތަރައްގީ ކުރުމުގެ މަޝްރޫއުގެ ދަށުން މިހާތަނަށް ތާރު އަޅާފައިވާ ސަރަހައްދު މި ހަފުތާ ތެރޭގައި ހުޅުވާލެވޭނެ ކަމަށް މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން ބުނެފިއެވެ.

ހަތަރުވަނަ ސެގްމަންޓުގެ މަސައްކަތް މިހާރު ކުރިއަށްދާއިރު އެ ސެގްމަންޓުގެ މައިގަނޑު ބޮޑެތި މަސައްކަތްތައް މިހާރު ނިމިފައިވާކަމަށް އާރުޑީސީން މައުލޫމާތުދެއެވެ.

އަމީނީމަގު ތަރައްގީ ކުރުމުގެ މަޝްރޫއުގެ ދަށުން މިހާތަނަށް ތާރު އަޅާފައިވާ ސަރަހައްދު މި ހަފުތާ ތެރޭގައި ހުޅުވާލެވޭނެ ކަމަށް މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން ބުނެއެވެ.