ފީފާ އިން ހޮވާ އަހަރުގެ އެންމެ މޮޅު ފުޓުބޯޅަ ކުޅުންތެރިޔާ ހޮވުމަށް ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ވޯޓު ނުލައިކަން ހާމަވެއްޖެ އެވެ.

ކޮންމެ އަހަރަކު ވެސް ދޭ މި އެވޯޑުގައި އަހަރުގެ މޮޅު ކުޅުންތެރިޔާ ހޮވަނީ ޤައުމީ ޓީމުތަކުގެ ކެޕްޓަނުންނާއި، ކޯޗުންގެ ވެސް ވޯޓުލުމުންނެވެ. ޕޯޗުގަލްގެ ކެޕްޓަން ރޮނާލްޑޯ މިއަހަރުގެ އެވޯޑުގައި ވޯޓު ލައިފައެއް ނުވެ އެވެ. ރޮނާލްޑޯގެ ބަދަލުގައި ޕޯޗުގަލްގެ ފަރާތުން މި އެވޯޑުގައި ވޯޓު ދިނީ ޑިފެންޑަރު ޕެޕޭ އެވެ. ޕެޕޭގެ ގަދަ ތިނެއްގައި އެވޯޑު ކާމިޔާބު ކުރި އާޖެންޓީނާގެ ކެޕްޓަން ލިއޮނަލް މެސީ ހިމަނައިފައެއް ނުވެ އެވެ. ޕެޕޭ ވޯޓު ދިން ކުޅުންތެރިންގެ ލިސްޓުގެ ކުރީގައި ވަނީ ފްރާންސްގެ ޒުވާން ކުޅުންތެރިޔާ ކީލިއަން އެމްބާޕޭ އެވެ. ދެ ވަނަ އަދި ތިން ވަނައިގައި ޕެޕޭ ވޯޓު ދިނީ ކުރިން އޭނާއާއެކު ރެއާލް މެޑްރިޑުގައި ކުޅުނު ދެ ރަޙުމަތްތެރިން ކަމަށްވާ ކްރޮއޭޝިއާގެ ލޫކާ މޮޑްރިޗާއި، ފްރާންސްގެ ކަރީމް ބެންޒެމާ އަށެވެ.

ހޯމަ ދުވަހުގެ ރޭ ފްރާންސްގެ ޕެރިހުގައި ބޭއްވި ޙަފްލާއެއްގައި މެސީ ވަނީ ދެ ވަނަ ފަހަރަށް ފީފާގެ މޮޅު ކުޅުންތެރިޔާގެ އެވޯޑު ކާމިޔާބުކޮށްފަ އެވެ. މެސީ ވަނީ މި އެވޯޑުގެ ގަދަ ތިނެއްގައި ހަ އަހަރު ހިމެނިފަ އެވެ. އެއީ 2016، 2017، 2020، އަދި 2021 އެވެ.