އަންހެން ސެކިއުރިޓީން ފިރިހެނުން ނެރެން ޖެހުމަކީ އިޖްތިމާއީ މިންގަނޑާއި ޚިލާފު ބަލަން އުނދަނގޫ މަންޒަރެއް: ރޮޒައިނާ
28 ފެބުރުއަރީ 2023 | އަންގާރަ 06:536 ފެބްރުއަރީގައި ފިރިހެން މެންބަރުން މަޖިލީހުން ނެރުމަށް އަންހެން މުވައްޒަފުން ހަރަކާތްތެރިވުމުން އާއްމުންގެ ފާޑުކިޔުން އަމާޒުވި
މެންބަރު ރޮޒައިނާ އާދަމް
އަންހެން ސެކިއުރިޓީން ފިރިހެނުން ނެރެން ޖެހުމަކީ އިޖްތިމާއީ މިންގަނޑާއި ޚިލާފު ބަލަން އުނދަނގޫ މަންޒަރެއް ކަމަށް އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެއެވެ.
ރޮޒައިނާ އެފަދައިން ވިދާޅުވީ އަންހެން ސެކިއުރިޓީއިންނަށް މަޖިލީހުން ފިރިހެން މެންބަރުން ނުނެރެވޭ ގޮތަށް މަޖިލީހުގެ ގަވާއިދަށް ބަދަލު ގެނައުމަށް މަޖިލީހަށް ހުށަހަޅާފައިވާ ގަރާރު ހުށަހަޅުއްވާ ދެއްވަމުންނެވެ. ރޮޒައިނާ ވަނީ އަންހެން ސެކިއުރިޓީ އިންނަށް ފިރިހެނުން މަޖިލީހުން ނެރެވޭ ގޮތަށް އޮތުމަކީ އެއީ މިންތީގެ ހަމަހަމަކަން ހޯދާ ދިނުން ކަމަށް ދެކެވަޑައިނުގަންނަވާ ކަމަށް ވިދާޅުވެފައެވެ. ރާއްޖެއިން ބޭރުގައި އަމަލު ކުރާ އުސޫލުތަކަށް ބަލާ އިރު ވެސް އަންހެނުން ބަލާ ފާސްކުރަނީ އަންހެނުން ކަމަށާއި، ފިރިހެނުން ބަލާ ފާސްކުރަނީ ފިރިހެނުން ކަމަށް އޭނާ ވިދާޅުވިއެވެ. އަންހެން ސެކިއުރިޓީ އިން ފިރިހެނުން ނެރެން އުޅުމުން ފެންނަނީ އިޖުތިމާއީ މިންގަނޑާއި ޚިލާފު، ބަލަން އުނދަނގޫ މަންޒަރެއް ކަމަށް އޭނާ ވަނީ ވިދާޅުވެފައެވެ.
ރޮޒައިނާ ވިދާޅުވީ ގަވާއިދުގެ ތެރެއިން އަންހެން ސެކިއުރިޓީއިންނަށް ފިރިހެނުން ގައިގައި އަތްލެވޭ ގޮތަށް އޮތުމަކީ ކުރިއަށް އޮތްތަނުގައި އިތުރު މައްސަލަތަކެއް މެދުވެރިވެދާނެ ކަމެއް ކަމަށެވެ. ރޮޒައިނާ ވަނީ މަޖިލީހުގައި އެފަދަ ކަންކަމުގައި އަމަލުކުރަން ވާނީ ބަައިނަލްއަގުވާމީ ގޮތުން ވެސް ބަލައިގަންނަ އެންމެ ރަނގަޅު އުސޫލުތަކާއި އެއްގޮތަށް ކަމަށް ވެސް ވިދާޅުވެފައެވެ.
ރޮޒައިނާ ހުށަހެޅުއްވި އެ ގަރާރަކީ މަޖިލީހުގެ ގަވާއިދުގެ 23 ވަނަ މާއްދާގެ (ބ) އަށް ބަދަލު ގެނައުމަށް ހުށަހެޅުއްވި ގަރާރެކެވެ. އެ ގަރާރު ހުށަހަޅަނީ މަޖިލީހުގެ ސެކިއުރިޓީ ބެލެހެއްޓުމަށް ގެންގުޅޭ އުސޫލުތައް އެހެން މުއައްސަސާތަކުގައި ވެސް އެފަދަ ކަންކަން ކުރުމުގައި ގެންގުޅޭ އުސޫލުތަކާއި އެއްގޮތަށް، ހަރުދަނާކުރުމަށް ޓަކައި ކަމަށް ރޮޒަައިނާ ވަނީ އެ ގަރާރުގައި ވިދާޅުވެފައެވެ. އެގޮތުން މަޖިލީހުގެ ގަވާއިދުގެ 167 ވަނަ މާއްދާގެ ދަށުން، ރައްޔިތުންގެ މަޖިލީހުގެ ހިންގުމުގެ އުސޫލަށް ބަދަލު ގެނައުމަަށް ރައްޔިތުންގެ މަޖިލީހުގެ ގަވާއިދު އިސްލާހު ކުރަން ރޮޒައިނާ ވަނީ ހުށަހަޅުއްވާފައެވެ.
6 ފެބްރުއަރީ 2023ގައި މަޖިލީސް ފެށުމުގެ ގޮތުން ބޭއްވި ޖަލްސާގައި ނިޒާމް ގެއްލި، މަޖިލީހުގެ ބައެއް މެންބަރުންގެ ނަން އިއްވުމާއި ގުޅިގެން އެ މެންބަރުން މަޖިލީހުގެ މާލަން ދޫކޮށް ވަޑައިގަތުމަށް ދެކޮޅުހެއްދެވުމުން އެ މެންބަރުން މަޖިލީހުން ނެރުމުގައި މަޖިލީހުގެ ސެކިއުރިޓީ އިން މަސައްކަތް ކޮށްފައެވެ. އަދި އެކަމަށް އާއްމުން ވަނީ ވަަރަށް ބޮޑަށް ފާޑު ވެސް ކިޔާފައެވެ.
