ހަފްތާ ބަންދުގައި ކުޑަގިރިއަށްދާން މިހާރު ބުކިން ހައްދާކަށް ނުޖެހޭ!
ކުޑަގިރިއަށް އޮތް ޑިމާންޑު ބޮޑު
ކުޑަގިރި އާންމުންނަށް ހުޅުވާލުން
މާލެ ސަރަހައްދުގައި ދިރިއުޅޭ ރައްޔިތުން ދަތުރު ދިއުމަށް ތަރައްގީ ކުރި، ކުޑަގިރި ޕިކްނިކް އައިލެންޑަށް ހަފުތާ ބަންދުގައި ބުކިން ނަހައިދައި ދެވޭ ގޮތް ހަދައިފިއެވެ.
ކުޑަގިރި ހުޅުވައި އެންމެ ފުރަތަމަ އަމަލު ކުރަމުން އައީ ދަތުރު ދިއުމުގެ ކުރިން ކޮންމެ ދުވަހަކު ވެސް ބުކިން ހައްދަން ޖެހޭ ގޮތަށެވެ. ނަމަވެސް އަންނަ ހުކުރު ދުވަހުން ފެށިގެން ހަފުތާ ބަންދުތަކުގައި ދެން ކުޑަގިރިއަށްދާން ބުކިން ހައްދަން ނުޖެހޭނެ ކަމަށް ކުޑަގިރިން ބުންޏެވެ.
އެޗްޑީސީގެ ޕީއާރު މެނޭޖަރ އަހުމަދު މިމްރާހު "ރާއްޖެ އެމްވީ" އަށް ވިދާޅުވީ މިގޮތަށް ނިންމީ ވީހާވެސް ގިނަ މީހުންނަށް ފުރުސަތު ދިނުމުގެ ގޮތުން ކަމަށެވެ. އެގޮތުން، ކުރިން ބުކިން ހައްދަން ޖެހޭ ގޮތަށް އޮތުމުން ބުކިން ފުލްވެ، ބުކިން ހައްދާ ދުވަހު ދިމާވާ ކަމެއްގެ ސަބަބުން ބައެއް މީހުންނަށް ނުދެވި އެ ޖާގަ ގެއްލޭ ކަމަށެވެ. އޭނާ ވިދާޅުވި ގޮތުގައި ބުކިން ހެއްދުމަށްފަހު ދަތުރު ދެވެނީ 40-50 އިންސައްތަ މީހުންނަށެވެ.
މިމްރާހު އިތުރަށް ވިދާޅުވީ ބުކިން ހައްދަން ނުޖެހޭގޮތަށް ހެދުމުން ގިނަ ބަޔަކަށް ކުޑަގިރިއަށް ދަތުރު ދިއުމުގެ ފުރުސަތު ލިބިގެންދާނެ ކަމަށެވެ.
ހަފުތާ ބަންދުގައި ކުޑަގިރިއަށް ދިއުމަށް ދުރާލާ ބުކިން ނުހެއްދިނަމަވެސް، ދަތުރުގޮސް ބޭނުންކުރާ އަށި އަދި ރޫމްރައް ފަދަ ތަންތަން ނަގަން، ކުޑަގިރި އެޕްލިކޭޝަނުން ބުކިން ހަދަން ޖެހޭނެއެވެ.
ކުޑަގިރިއަށް ހަފުތާ ބަންދުގައި ފެރީ އޮންނާނެ ވަގުތުތައް ވެސް މިހާރު ވަނީ އާއްމު ކޮށްފައެވެ. އެގޮތުން، މާލެއިން ކުޑަގިރިއަށް ހަތަރު ގަޑިއެއްގައި ފެރީ އޮންނައިރު ހުޅުމާލެއިން ކުޑަގިރިއަށް ދިއުމަށް ވެސް ހަތަރު ގަޑިއެއްގައި ފެރީ އޮންނާނެއެވެ.
ހަފުތާ ބަންދާއި ސަރުކާރު ބަންދު ދުވަސްތަކުގައި ކުޑަގިރިއަށް ދިއުމަށް ފީއެއް ނުނަގާނެއެވެ. ނަމަވެސް ސަރުކާރު ބަންދު ނޫން ދުވަސްތަކުގައި ރަށަށް ދަތުރުކުރުމާއި އަދި ރަށަށް އެރުމަށް ފީއެއް ނަގައެވެ. އެގޮތުން ދެކޮޅު ފެރީ ދަތުރާއި އެންޓްރެންސް ފީއަށް ބޮޑު މީހެއްގެ އަތުން 100 ރުފިޔާ ނަގާއިރު 2 އަހަރާއި 12 އަހަރާއި ދެމެދުގެ ކުދިންނަށް 50 ރުފިޔާ ނަގައެވެ. 2 އަހަރުން ދަށުގެ ކުދިންނަކަށް ފީއެއް ނުނަގާނެއެވެ.
ކުޑަގިރީގައި 13 ކުޑައަށްޓާއި، 4 ބޮޑު އަށި ހުންނައިރު އެ ތަންތަން ހިފުމަށް ބުކިން ހައްދަން ޖެހޭނެއެވެ. މީގެތެރެއިން ކުޑަ އަށްޓެއް ވިއްސަކަށް މީހުންގެ ގްރޫޕަކަށް ބޭނުންކުރެވޭއިރު ދުވަހެއްގެ އެއްބަޔަށް ކުޑައަށި ނަގާނަމަ 250 ރުފިޔާ، އަދި މުޅި ދުވަހަށް ނަގާނަމަ 500 ރުފިޔާގެ ފީއެއް ނަގާނެއެވެ. ބޮޑު އަށްޓެއް ސާޅީހަކަށް މީހުންގެ ގްރޫޕަކަށް ބޭނުން ކުރެވޭއިރު ވަކި ގްރޫޕަކުން އެއްކޮށް ނަގާނަމަ ބައި ދުވަހަށް 650 ރުފިޔާ އަދި މުޅި ދުވަހަށް ނަގާނަމަ 1200 ރުފިޔާ ދައްކަން ޖެހޭނެއެވެ.
މީގެ އިތުރުން ބޮޑު އަށްޓެއް ދެ ގްރޫޕަށް ބަހާނަމަ ބައި ދުވަހަށް ގްރޫޕަކުން ދައްކަން ޖެހޭނީ 250 ރުފިޔާއެވެ. އަދި މުޅި ދުވަހަށް ނަގާނަމަ ގްރޫޕަކުން ދައްކަން ޖެހޭނީ 450 ރުފިޔާއެވެ.
ކުޑަގިރިއަށް ދަތުރު ދިއުމަށް ބޮޑު ޑިމާންޑެއް އޮވެއެވެ. އެގޮތުން، ބުކިން އަށް ހުޅުވާލުމާއެކު ކުޑަ ވަގުތުކޮޅެއްގެ ތެރޭގައި މިހާރު ވެސް ބުކިންފުލްވާ ކަމަށް މިމްރާހު ވިދާޅުވިއެވެ.
