ކުޑަގިރި ޕިކްނިކް އައިލެންޑް ފެހި ކުރުމަށް ސްޓެލްކޯއިން ގަސް އިންދުމުގެ ޕްރޮގްރާމެއް ކުރިއަށް ގެންގޮސްފިއެވެ.

ބުދަ ދުވަހު ކުރިއަށްދިޔަ މި ޕްރޮގްރާމުގައި ސްޓެްކޯގެ 80 އަށްވުރެ ގިނަ މުވައްޒަފުން ވަނީ ކުޑަގިރީގައި ގަސް އިންދާފައެވެ. ކުޑަގިރި ހުޅުވައި އެ ރަށަށް މީހުން ޒިޔާރަތް ކުރަން ފެށުމުން އެ ފަރާތްތަކަށް ވަރަށް ބޭނުންތެރި ކަމަކަށް މި ޕްރޮޖެކްޓް ވާނެ ކަމަށް ސްޓެލްކޯއިން ބުނެއެވެ.

ކުޑަގިރީގެ އިތުރުން ވެސް ރާއްޖޭގައި ސްޓެލްކޯއިން ޚިދުމަތް ދޭ ރަށްތައް ފެހި ކުރުމަށް އެ ކުންފުނިން މަސައްކަތް ކުރެއެވެ. އެގޮތުން، ކޮންމެ އަހަރަކު ވެސް ގަސްއިންދުމުގެ ޕްރޮގްރާމްތައް އެ ކުންފުނީގެ އެކި އޮފީސްތަކުގައި ކުރިއަށްދެއެވެ.

ސްޓެލްކޯއިން އަންނަނީ ގަސް އިންދުމުގެ އިތުރުން ކުޑަގިރީގައި ގިނަ މަސައްކަތްތަކެއް ކުރަމުންނެވެ. މީގެ ތެރޭގައި އެ ރަށުގެ ކަރަންޓް ޑިސްޓްރިބިއުޝަނާއި ލައިޓް ޖެހުމާއި ކެފޭއެއް ހެދުމުގެ މަސައްކަތް ހިމެނެއެވެ.

ސްޓެލްކޯއިން ބުނި ގޮތުގައި އެ ކުންފުނިން ކުޑަގިރީގައި ކުރާ ހުރިހާ މަސައްކަތެއްވެސް ކުރަނީ ޤައުމީ މަސައްކަތެއް ކަމުގައި ދެކިގެން ކަމަށެވެ. އަދި އެ ކުންފުނީގެ މަސައްކަތްތައް ތާވަލާ އެއްގޮތަށް ޖުލައި 24 އާ ހަމައަށް ނިންމާލެވޭނެ ކަމަށް ވެސް އެ ކުންފުނިން ލަފާ ކުރެއެވެ.