މާލެ ސަރަހައްދުގައި ތަރައްގީކުރަމުންދާ ޕިކްނިކް އައިލެންޑް ފެނިގެންދާނީ ވަރަށް ފެހި ތަނެއްގެ ގޮތުގައި ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.

މާލެ ސަރަަހައްދުގައި ދިރިއުޅޭ ރައްޔިތުންނަށް ދަތުރުދެވޭނެ ރަށެއް މާލެ ކައިރިން ކަނޑައެޅުމަކީ މި ސަރުކާރުގެ މުހިންމު ވައުދެކެވެ. މިގޮތުން ކ. ކުޑަގިރި ހިއްކައި އެ ރަށް ތަރައްގީކުރުމުގެ މަސައްކަތް ސަރުކާރުން ހަވާލުކޮށްފައިވަނީ އެމްޓީސީސީއާއެވެ.

އެމްޓީސީސީއާއި ސަރުކާރުގެ އެކި އިދާރާތައް ގުޅިގެން އެރަށުގައި ވަސީލަތްތައް ގާއިމްކުރުމުގެ މަސައްކަތް ކުރަމުންދާއިރު، އެރަށް ފެހިކުރުމަށް ސްޓެލްކޯގެ ފަރާތުން ވަނީ ގަސް އިންދާފައެވެ. އެރަށް ފެހި ކުރުމުގެ މަސައްކަތް ކުރަމުންދާއިރު، އެރަށް ދަތުރު ދިއުމަށް ހިތްގައިމު ނޫންކަމަށް ބުނެ މީހަކު ސޯޝަލް މީޑިއާގައި ކުރި ޓްވީޓެއް ރީޓްވީޓް ކުރައްވާ އާޒިމް ވިދާޅުވީ ޕިކްނިކް އައިލެންޑް ފެހި ކުރުމުގެ މަސައްކަތަކީ އެންމެ ބޮޑު އިސްކަމެއް ދޭ އެއް ކަންތައް ކަމަށެވެ. އިރާދަކުރެއްވިއްޔާ ގުޑަގިރި ޕިކްނިކް އައިލެންޑް ވަރަށް ފެހި ތަނެއްގެ ގޮތުގައި ރައްޔިތުންނަށް ފެނިގެންދާނެ ކަމަށާއި، ގަސްތައް ހެދެން ވަގުތު ނަގާނެ ކަމަށް އާޒިމް ވިދާޅުވިއެވެ.

ޕިކްނިކް އައިލެންޑް ހެދުމަށް އެމްޓީސީސީއާއި ޕްލޭނިންގ މިނިސްޓްރީއާއިއެކު ސޮއިކޮށްފައިވަނީ 2 ސެޕްޓެމްބަރު 2021ގައެވެ. މި މަޝްރޫއު ސަރުކާރުން އެމްޓީސީސީއާއި ހަވާލުކުރީ 41.49 މިލިއަން ރުފިޔާއަށެވެ.

ކުޑަގިރިއަކީ ތިލަފުށީ ކައިރީގައި އޮންނަ ފަޅެކެވެ. މި ފަޅު އޮންނަނީ ފެރީގައި ތިރީހަކަށް މިނެޓުން އަދި ލޯންޗުގައި ދިހަވަރަކަށް މިނެޓުން ދެވޭ ހިސާބުގައެވެ. ކުޑަގިރި ތަރައްގީކުރަން ފެށުމުގެ ކުރިން ސަރުކާރުން ފުރަތަމަ ނިންމީ ކ. އެނބޫދޫފަޅުގައި ހިއްކާފައިވާ ރަށެއް ޕިކްނިކް އައިލެންޑަކަށް ހެދުމަށެވެ. އެހެންނަމަވެސް ފަހުން ސަރުކާރުގެ ނިންމުން ބަދަލުކޮށް، ކުޑަގިރީގައި ޕިކްނިކް އައިލެންޑް ހަދާގޮތަށް ނިންމިއެވެ.

މިނިވަންދުވަހާ ދިމާކޮށް ކުޑަގިރި ޕިކްނިކް އައިލެންޑް އާންމުނަށް ހުޅުވާލުމަށް ސަރުކާރުން އަމާޒުހިފާފައިވާއިރު ދާދިފަހުން ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު އަދި ނާއިބުރައީސް ފައިސަލް ނަސީމްވެސް ވަނީ ކުޑަގިރީގެ މަސައްކަތްތައް ކުރިއަށްގޮސްފައިވާ ހިސާބު ބައްލަވާލައްވާފައެވެ.

އެގޮތުން އެރައިވަލް ޖެޓީއާއި، އެރަށަށް ދަތުރުދާ ފަރާތްތަކަށް މެހްމާންދާރީ އަދާކުރުމަށް ތަރައްޤީކުރާ ރިސެޕްޝަން އާއި، މިސްކިތް ޢިމާރާތާއި ޕަވަރހައުސްގެ އިތުރުން އެކޮމޮޑޭޝަން ބްލޮކްގެ މަސައްކަތް ބައްލަވާލެއްވިއެވެ.

މީގެ އިތުރުން ފެނާއި ނަރުދަމާ ޤާއިމްކުރުމުގެ މަސައްކަތްވެސް ބައްލަވާލެއްވުމަށްފަހު ކުޑަގިރި ތުނޑީ ސަރަޙައްދަށް ވަޑައިގެން ކޭމްޕް އައިލެންޑް ތަރައްޤީކުރުމަށް ކުރަމުންދާ މަސައްކަތްތައްވެސް ރައީސުލްޖުމްހޫރިއްޔާ ބައްލަވާލެއްވިއެވެ

ކުޑަގިރިއަަށް ކަރަންޓު ފޯރުކޮށްދިނުމުގެ މަސައްކަތް ސްޓެލްކޯއާއި ހަވާލުކޮށްފައިވާއިރު، އެކުންފުނިން މިހާރު ވަނީ ކަރަންޓް ޑިސްޓްރިބިއުޝަން ނެޓްވޯރކް ގާއިމްކުރުމަށް ބޭނުންވާ 3000 މީޓަރުގެ ކޭބަލް ވަޅުލައި ނިންމާފައެވެ. އަދި މަގުބައްތި ޖެހުމުގެ މަސައްކަތްވެސް ސްޓެލްކޯއާއި ވަނީ ހަވާލުކޮށްފައެވެ. އަދި ފެނަކައިން ގެންދަނީ އެރަށުގައި މިސްކިތެއް ބިނާކުރުމުގެ މަސައްކަތް ކުރަމުންނެވެ.