ކުޑަގިރި ޕިކްނިކް އައިލެންޑް ދިއްލާލައިފި

ކ. ކުޑަގިރީގައި ތަރައްގީކުރާ ޕިކްނިކް އައިލެންޑް ހުޅުވުމަށް ކުރަމުން އަންނަ މަސައްކަތުގެ ދަށުން, އެ ރަށް ފުރަތަމަ ފަހަރަށް ދިއްލާލައިފިއެވެ.

ކުޑިގިރިއަކީ މާލޭގައި ދިރިއުޅޭ ރައްޔިތުން ޕިކްނިކް ދިއުމަށް ރަށެއް ނެތުމުގެ ސަބަބުން ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވެވަޑައިގެންވި ވައުދުފުޅުގެ ދަށުން ތަރައްގީކުރާ ރަށެކެވެ. އެރަށުގެ މަސައްކަތްތައް ސަރުކާރުން ވަނީ ސަރުކާރުގެ އެކި ކުންފުނިތަކާ ހަވާލުކޮށްފައެވެ. މީގެ ތެރޭގައި ސްޓެލްކޯއާއި އެމްޓީސީސީއާއި އެޗްޑީސީ ހިމެނެއެވެ.

Advertisement

ސަރުކާރުން ސްޓެލްކޯއާ ހަވާލުކުރީ ކުޑަގިރީގެ ކަރަންޓުގެ މަސައްކަތެވެ. އެ މަސައްކަތް އެއްކޮށް ނިމިފައިވާއިރު ފުރަތަމަ ފަހަރަށް އެ ރަށަށް ވަނީ ކަރަންޓުވެސް ދީފައެވެ. ސްޓެލްކޯއިން ވަނީ ކުޑަގިރީގައި ކަރަންޓު ނެޓްވޯރކެއް ގާއިމުކުރުމުގެ އިތުރުން، މަގުބައްތީގެ ގޮތުގައި ހިތްގައިމު ގާރޑްން ލައިޓްތަކެއް ހަރުކޮށްފައެވެ.

ކުޑަގިރީގެ ކަރަންޓު ނެޓްވޯރކް ގާއިމްކުރުމަށްޓަކައި 3000 މީޓަރުގެ ކޭބަލް ވަޅުލައި، ޑިސްޓްރިބިއުޝަން ފޮށި ހަރުކޮށް، ހަދަން ޖެހޭ ހުރިހާ ކަނެކްޝަނެއް މިހާރު ހަދައި ނިމިފައިވާކަމަށް ސްޓެލްކޯއިން ބުނެއެވެ. 

އެ ކުންފުނިން މިހާރު ކުރަމުން އަންނަނީ ކުޑަގިރިއަށް ޒިޔާރަތްކުރާ ފަތާތްތަކަށް ކެފޭއެއްގެ ޚިދުމަތް ދިނުމަށްޓަކައި އަޅަންޖެހޭ ކެފޭ އެޅުމުގެ މަސައްކަތެވެ. މި މަސައްކަތް އެ ކުންފުންޏާ ހަވާލުކޮށްފައިވަނީ މިދިޔަ ޖޫން މަހުގެ 28ގައެވެ. މި މަސައްކަތް މި މަހުގެ 26ގެ ކުރިން ނިންމުމަށްޓަކައި، ގިނަ އަދަދެއްގެ މުވައްޒަފުން ރެއާއި ދުވާލު މަސައްކަތްކުރަމުން އަންނަކަމަށް ސްޓެލްކޯއިން ބުނެއެވެ.

ސްޓެލްކޯއިން ވަނީ ކުޑަގިރި ޕިކްނިކް އައިލެންޑަކީ އެ ރަށަށް ޒިޔާރަތް ކުރާ މީހުންނަށް ހިތްފަސޭހަ މާހައުލަކަށް ހެދުމަށްޓަކައި އެރަށުގައި ގަސްވެސް އިންދާފައެވެ. މި ޕްރޮގްރާމުގައި ސްޓެލްކޯގެ 80 އަށްވުރެ ގިނަ މުވައްޒަފުން ބައިވެރިވިއެވެ.

ކުޑަގިރި ޕިކްނިކް އައިލެންޑް ހުޅުވަން ނިންމާފައިވަނީ ޖުލައި 26ގައެވެ. އެ ދުވަހަށް ރަށުގެ ހުރިހާ މަސައްކަތެއް ނިންމުމަށް ކުންފުނިތަކުން އަންނަނީ މަސައްކަތްކުރަމުންނެވެ. މި މަސައްކަތްތައް ރައީސުލްޖުމްހޫރިއްޔާގެ ނައިބު ފައިސަލް ނަސީމް ވަރަށް ގާތުން ބައްލަވަމުން ގެންދަވާކަމަށް ކުންފުނިތަކުން މައުލޫމާތުދެއެވެ.