ތައިލެންޑްގެ މަޝްހޫރު ނޫސްވެރިންނާއި ބްލޮގަރުންގެ ޓީމެއް ރާއްޖެއަށް
މި ޓީމުން 6 ދުވަސް ވަންދެން ރާއްޖޭގެ ފަތުރުވެރިކަމުގެ ޕްރޮޑަކްޓްތަކާއި މެހެމާންދާރީ ތަޖުރިބާކުރާނެ
ތައިލެންޑްގެ ނޫސްވެރިންނާއި ބްލޮގަރުންގެ ޓީމު
ރާއްޖޭއިން ފަތުރުވެރިންނަށް ލިބެންހުރި ދުނިޔޭގެ ފެންވަރުގެ މެހެމާންދާރީ އާއި ލަގްޒަރީ ހިދުމަތްތައް ތަޖުރިބާކުރުމުގެ ގޮތުން މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ ދައުވަތަކަށް ތައިލެންޑްގެ މަޝްހޫރު ނޫސްވެރިންނާއި ބްލޮގަރުންގެ ޓީމެއް ރާއްޖެ އަތުވެއްޖެއެވެ.
މި ޓީމު ރާއްޖެ އައިސްފައިވަނީ ފެބްރުއަރީ މަހުގެ 20 ވަނަ ދުވަހުއެވެ. އަދި މި ޓީމުން 6 ދުވަސް ވަންދެން ރާއްޖޭގެ ފަތުރުވެރިކަމުގެ ޕްރޮޑަކްޓްތަކާއި ތަފާތު ތަޖުރިބާތަކާއި މެހެމާންދާރީ ތަޖުރިބާކުރާނެއެވެ.
މި ދަތުރުގައި ތައިލޭންޑުގެ ފާހަގަކުރެވޭ 2 ނޫސްވެރިންނާއި 3 ބްލޮގަރުންނާއި 1 ޕީއާރު ރެޕްރެޒެންޓޭޓިވުން ޒިޔާރަތްކުރަނީ ރާއްޖޭގެ ޕުލްމަން މޯލްޑިވްސް މާމުއްޓާ، މާކިއުއާ މޯލްޑިވްސް ކޫއްޑޫ އަދި ރީތި ބީޗް ރިސޯޓަށެވެ. އަދި މަންޒިލުން ލިބެން ހުރި ތަފާތު ހިދުމަތްތަކާއި އުފެއްދުންތައް ތަޖުރިބާކޮށް، އެ ތަޖުރިބާތައް އޮންލައިން އާޓިކަލްތަކާއި ޕަބްލިކޭޝަންތަކާއި ސޯޝަލް މީޑިއާ ޕްލެޓްފޯމްތަކުގެ ޒަރިއްޔާއިން ތައިލޭންޑުގެ ބެލުންތެރިންނާ ހިއްސާކުރާނެއެވެ.
މީގެ ސަބަބުން ރާއްޖޭގެ ބްރޭންޑާއިމެދު މި މާކެޓުގައި އޮތް ހޭލުންތެރިކަން އިތުރުވެ، ރާއްޖެ އަކީ އެންމެ މަތީ ދަރަޖައިގެ މަންޒިލެއްގެ ގޮތުގައި ޕްރޮމޯޓް ކުރެވޭނެ ކަމަށް އެމްއެމްޕީއާރުސީން ބުނެއެވެ. މި ދަތުރުގައި ބައިވެރިވާ މީޑިއާ މެމްބަރުން ތައްޔާރުކުރާ އެކި ކޮންޓެންޓުގެ ޖުމްލަ އިމްޕްރެޝަންސް 6،179،000 އަށް ވުރެ ގިނަވާނެކަމަށް ބެލެވޭ ކަމަށްވެސް އެމްއެމްޕީއާރުސީން ބުނެއެވެ.
މި މީޑިއާ ދަތުރަކީ އެމްއެމްޕީއާރުސީއިން ދެކުނުއިރުމަތީ އޭޝިއާއަށް ގެންގުޅޭ މާކެޓިންގ ސްޓްރެޓެޖީގެ ދަށުން ހިންގާ ހަރަކާތެކެވެ. މި ސްޓްރެޓަޖީ ބިނާކޮށްފައިވަނީ ރާއްޖޭގެ ތަފާތު ތަޖުރިބާތަކާއި ހިދުމަތްތައް މި ސަރަހައްދުގެ ފަތުރުވެރިންގެ މެދުގައި މާކެޓްކުރުމަށެވެ. ތައިލޭންޑަކީ ރާއްޖެއަށް 38 ވަނައަށް އެންމެ ގިނައިން ފަތުރުވެރިން އަންނަ މާކެޓެވެ. އެމްއެމްޕީއާރުސީއިން މި އަހަރު ދެކުނު އިރުމަތީ އޭޝިއާ އިން އަންނަ ފަތުރުވެރިން އިތުރުކުރުމުގެ ގޮތުން ބޮޑެތި ޕްލޭންތަކެއް ރާވާފައިވާއިރު، އޭގެ ތެރޭގައި ސިލްސިލާ ކެމްޕޭންތަކާއި ޕްރޮމޯޝަންތަކެއް ހިންގުމަށް ވަނީ ހަމަޖެހިފައެވެ. އަދި މި ސަރަހައްދުގައި ބާއްވާ މާޓާ 2023، އެޑެކްސް އޯޝަން މިޝަން 2023ފަދަ ބޮޑެތި ފެއަރތަކުގައި ބައިވެރިވުމުގެ އިތުރުން ދެކުނު އިރުމަތީ އޭޝިއާ އަށް ހާއްސަކޮށް މޯލްޑިވްސް ރޯޑްޝޯއެއް ވެސް ހޯސްޓުކުރުމަށް ވަނީ ހަމަޖެހިފައެވެ.
