ދިވެހިރާއްޖޭގެ ފަތުރުވެރިކަމުގެ ސިނާއަތުގެ ބައްޕަ ކަމުގައި ގިނަ ބަޔަކު ފާހަގަކުރާ މުހައްމަދު އުމަރު މަނިކު (އެމްޔޫ މަނިކު) އަވަހާރަވުމާ ގުޅިގެން، އެމަނިކުފާނުގެ ހަނދާނުގައި މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އިން ތައުޒިޔާގެ ދަފްތަރެއް ހުޅުވާލައިފިއެވެ.

މިދިޔަ ހޮނިހިރު ދުވަހު ސިންގަޕޫރުގެ މައުންޓް އެލިޒަބެތު ހޮސްޕިޓަލުގައި އަވަހާރަވި އެމްޔޫ މަނިކަކީ، ރާއްޖޭގެ ފަތުރުވެރިކަން ތަޢާރަފްކޮށް ތަރައްޤީ ކުރުމުގައި އެންމެ އިސް ދައުރެއް އަދާކުރެއްވި ފަރާތެވެ. އުމުރުން 78 އަހަރުގައި އަވަހާރަވި އިރު، އެމަނިކުފާނު ވަނީ ގާތްގަނޑަކަށް މަހެއްހާ ދުވަސް ވަންދެން އެ ހޮސްޕިޓަލުގައި ފަރުވާ ހޯއްދަވާފައެވެ.

މަޓީން ނެރުނު ބަޔާނެއްގައި ބުނެފައިވާ ގޮތުގައި، އަވަހާރަވި އިރު އެ އެސޯސިއޭޝަންގެ ޗެއަރމަންގެ މަޤާމުގައި ހުންނެވި އެމްޔޫ މަނިކުގެ ހަނދާނުގައި ހުޅުވާލާ ތައުޒިޔާގެ ދަފްތަރުގައި ސޮއިކުރުމުގެ ފުރުސަތު ސެޕްޓެމްބަރު 7 އިން 14 އަށް ހުޅުވާލެވިފައިވާކަމުގައެވެ.

ދަފްތަރުގައި ސޮއިކުރެވޭނީ މަޓީގެ އޮފީސް ހުންނަ ފަސްމީރު ބިލްޑިންގގެ ހަތަރުވަނަ ފަންގިފިލާގައެވެ. ހުކުރު ދުވަސް ފިޔަވައި ކޮންމެ ދުވަހަކު ހެނދުނު 9:00 އިން ހަވީރު 5:00 އާ ހަމައަށް ދަފްތަރުގައި ސޮއިކުރުމުގެ ފުރުސަތު ހުޅުވާލެވިފައިވާ ކަމަށް މަޓީން މައުލޫމާތު ދީފައިވެއެވެ.

އޮގަސްޓް މަހުގެ 30 ވަނަ ދުވަހު އަވަހާރަވި، މުޙަންމަދު ޢުމަރު މަނިކަށް ވަނީ ފަތުރުވެރިކަމުގެ ދާއިރާއިން 1982 ވަނަ އަހަރު ޢާންމު ޚިދްމަތުގެ ހިތްވަރު ދިނުމުގެ އިނާމު ލިބިވަޑައިގެންފައެވެ. އަދި މިރޮނގުން ޝަރަފުވެރި ކަމުގެ އިނާމު 2002 ވަނަ އަހަރު ވަނީ ލިބިވަޑައިގެންފައެވެ. އޭގެއިތުރުން، މިނިވަން 25ގެ ޢާންމު ޚިދްމަތުގެ އިނާމުވެސް ވަނީ އެމަނިކުފާނަށް ލިބިވަޑައިގެންފައެވެ.

މުޙައްމަދު ޢުމަރު މަނިކުގެ އަގުހުރި މަސައްކަތްތައް ފާހަގަކުރައްވާ، 2011 ވަނަ އަހަރު ދިވެހި ދައުލަތުން އެމަނިކުފާނަށް ވަނީ ނިޝާން މުލީގޭ ޝަރަފުގެ ޢިއްޒަތް (ނ.މ.ޝ.ޢ) އަރުވާފައެވެ. މި ނިޝާން އަރުވާފައިވަނީ ދިވެހި ދައުލަތަށާއި، ޤައުމާއި ރައްޔިތުންނަށް އެމަނިކުފާނު ކޮށްދެއްވާފައިވާ އަގުހުރި ޚިދުމަތްތަކުގެ އަގު ވަޒަންކުރެއްވުމުގެ ގޮތުންނެވެ.

ފަތުރުވެރިކަމުގެ ދާއިރާގައި އެމްޔޫ މަނިކު ކުރެއްވި އަގުހުރި މަސައްކަތްތަކާއި، ދިވެހި އިޤްތިޞާދަށް ގެނެސްދެއްވި ކުރިއެރުންތައް ފާހަގަކޮށް، ގިނަ ފަރާތްތަކުން ވަނީ އެމަނިކުފާނުގެ ހަނދާނަށް ތައުޒިޔާ ރައްދުކޮށްފައެވެ.