ފޯ ނޭޝަންސް ކަޕްގައި ވާދަކުރާ ސިންގަޕޫރު ޓީމުތައް ވެސް ރާއްޖެ އަތުވެއްޖެ

ފޯ ނޭޝަންސް ކަޕް ވޮލީ ބޯޅަ މުބާރާތުގައި ވާދަކުރުމަށް ސިންގަޕޫރުގެ ފިރިހެން އަދި އަންހެން ވޮލީ ޓީމު ރާއްޖެ އަތުވެއްޖެ އެވެ.

އެ ޤައުމުގެ ވޮލީ ޓީމުތައް ރާއްޖެ އައިސްފައި ވަނީ ބުދަ ދުވަހުގެ ރޭގެ ވަގުތެއްގަ އެވެ. މީގެ ކުރިން ވަނީ މުބާރާތުގައި ވާދަކުރާ މެލޭޝިޔާގެ ފިރިހެން ޓީމާއި އަންހެން ޓީމުގެ އިތުރުން، އަފްޣާނިއްތާނުގެ ފިރިހެން ޓީމު ވެސް ރާއްޖެ އައިސްފަ އެވެ. އެ ދެ ޓީމު ރާއްޖެ އައީ އަންގާރަ ދުވަހު އެވެ. މުބާރާތުގެ ފިރިހެން ޑިވިޝަންގައި ވާދަކުރަނީ ރާއްޖޭގެ އިތުރުން މެލޭޝިޔާ، ސިންގަޕޫރު އަދި އަފްޣާނިސްތާން އެވެ. އަންހެން ޑިވިޝަންގައި އަފްޣާނިސްތާން ފިޔަވައި ދެން އޮތް ތިން ޓީމުން ވެސް ވާދަކުރެ އެވެ.

މުބާރާތުގެ ފުރަތަމަ މެޗު ކުޅެން ޖެހެނީ ވެސް ސިންގަޕޫރު ޓީމަށެވެ. ބުރާސްފަތި ދުވަހުގެ މެންދުރު ފިރިހެން ޑިވިޝަންގައި އެ ޓީމު ނިކުންނާނީ އަފްޣާނިސްތާނާ ދެކޮޅަށެވެ. އެ ޓީމުގެ ދެ ވަނަ މެޗު އޮންނާނީ ހުކުރު ދުވަހުގެ ރޭ ރާއްޖެއާ ދެކޮޅަށެވެ. ފަހު މެޗުގައި މެލޭޝިޔާއާ ދެކޮޅަށް ކުޅޭނީ ހޮނިހިރު ދުވަހުގެ ހަވީރު އެވެ. ސިންގަޕޫރުގެ އަންހެން ޓީމުގެ ފުރަތަމަ މެޗުގައި ހުކުރު ދުވަހުގެ ހަވީރު ނިކުންނާނީ ރާއްޖެއާ ދެކޮޅަށެވެ. ދެ ވަނަ މެޗުގައި ހޮނިހިރު ދުވަހުގެ މެންދުރު ކުޅޭނީ މެލޭޝިޔާއާ ދެކޮޅަށެވެ.