ސީރިޔާގެ ރައީސް ބައްޝާރުލް އަސަދު ރަސްމީ ދަތުރުފުޅެއްގައި އޮމާންއަށް ވަޑައިގެންފިއެވެ. މިއީ ފެބްރުއަރީ 6ވަނަ ދުވަހު ސީރިޔާއަށާއި ތުރުކީއަށް ބިންހެލުން އައި ފަހުން ބައްޝާރުލް އަސަދު ގައުމުން ބޭރަށް ކުރެއްވި ފުރަތަމަ ދަތުރުފުޅެވެ.

"އެރެބް ސްޕްރިންގ" އޭކިއުނު މުޒާހަރާތައް ސީރިޔާގައިވެސް ކުރިޔަށް ދިޔައިރު، މުޒާހަރާތަކާ ދެކޮޅަށް ސީރިޔާ ސަރުކާރުން ހަރުކަށި ފިޔަވަޅު އަޅަމުން ގެންދާތީ 2011 ވަނަ އަހަރު ސީރިޔާ އަރަބި ލީގުން ސަސްޕެންޑްކުރުމަށްފަހު ވެސް ސީރިޔާއާއެކު އާދައިގެ ގުޅުންތައް ދަމަހައްޓާފައިވާ މަދު އަރަބި ގައުމުތަކުގެ ތެރޭގައި އޮމާން ހިމެނެއެވެ.

އަސަދުގެ އޮފީހުން ބުނެފައިވާގޮތުގައި އޮމާނުން ބައްޝާރުލް އަސަދަށް މަރުހަބާ ވިދާޅުވެފައިވަނީ ލީޑަރ، ސުލްތާން ހައިތަމް ބިން ތާރިގެވެ. އަދި އިތުރަށް ބުނެފައިވާގޮތުގައި އޮމާނުން ގެންގުޅޭ އެހެން ގައުމުތަކުގެ ޒާތީ މައްސަލަތަކާ ނުބެހުމުގެ ޕޮލިސީއަށް ރައީސް އަސަދު ވަނީ ތައުރީފްކުރައްވާފައެވެ. މީގެ އިތުރުން އަރަބި ގައުމުތަކުގެ މެދުގައި އޮންނަ ގުޅުންތައް ބަދަހިކޮށް ދެމެހެއްޓުމަށްޓަކައި އޮމާންފަދަ ގައުމުތަކުގެ ދައުރު މުހިންމުކަމަށް ވިދާޅުވެފައިވާ ކަމަށްވެސް އަސަދުގެ އޮފީހުން ބުނެފައިވެއެވެ.

ފާއިތުވި ދެތިން އަހަރުގެ ތެރޭގައި ބައްޝާރުލް އަސަދު ވަނީ ރަޝިޔާ، އީރާން، އަދި ޔުނައިޓަޑް އެރެބް އެމިރޭޓްސްއަށް ޒިޔާރަތްކުރައްވާފައެވެ.

ސީރިޔާގެ ދާޚިލީ ހަނގުރާމަ ފެށުމާ ގުޅިގެން އަސަދުގެ ސަރުކާރާ ގުޅުން ކަނޑާލާފައިވާ އަރަބި ގައުމުތަކުގެ ތެރެއިން ޔޫއޭއީގެ ފޮރިން މިނިސްޓަރ އަބްދުﷲ ބިން ޒައިދު އާލް ނަހްޔާން ވަނީ، ބިންހެލުން އައުމަށްފަހު ރައީސް އަސަދާ ބައްދަލުކުރައްވާފައެވެ. އަދި އެހެން ބައެއް ގައުމުތަކުން ވަނީ އެހީގެ ތަކެތި ފޮނުވާފައެވެ. މީގެ ތެރޭގައި ސައޫދީ އަރަބިއްޔާ އަދި މިސްރު ހިމެނެއެވެ.

އުރުދުންގެ ޚާރިޖީ ވަޒީރުވެސް މިދިޔަ ހަފުތާގައި ދިމިޝްގަށް ޒިޔާރަތްކުރައްވައި ރައީސް އަސަދާ ބައްދަލުކުރައްވާފައި ވެއެވެ. މިއީ ސީރިޔާގެ ދާޚިލީ ހަނގުރާމަ ފެށުނުފަހުން އުރުދުންގެ އިސް ބޭފުޅަކު އެގައުމަށް ޒިޔާރަތްކުރެއްވި ފުރަތަމަ ފަހަރެވެ.

2020 ވަނަ އަހަރު، 8 އަހަރުގެ މެދުކެނޑުމަކަށްފަހު އޮމާނުން ވަނީ ސީރިޔާއަށް އެމްބެސެޑަރު އަނބުރާ ފޮނުވާފައެވެ.