އަމީނީ މަގު ނިމިގެންދާއިރު ފެން ހިންދާ ނިޒާމް ވެސް އައުވެގެންދާނެ - އަސްލަމް
ފެން ހިންދާ ނިޒާމުގެ ހޮޅިތަކާއި، ޕަމްޕްތައް އަޕްގްރޭޑް ކުރެވިގެންދާނެ
އަމީނީ މަގުގެ މަސައްކަތް ކުރިއަށްދަނީ - މަގު ނިމިގެންދާއިރު ފެން ހިންދާ ނިޒާމް އަޕްގްރޭޑް ކުރެވިގެންދާނެ
އަމީނީ މަގު ނިމިގެންދާއިރު ފެން ހިންދާ ނިޒާމް އަޕްގްރޭޑް ކުރެވިގެންދާނެ ކަމަށާއި، މައްސަލަ އަށް ހައްލެއް ލބިގެންދާނެ ކަަމަށް މިނިސްޓަރ އޮފް ނެޝަނަލް ޕްލޭނިންގ ހައުސިން އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.
މިނިސްޓަރު އަސްލަމް މިހެން ވިދާޅުވީ އަމީނީ މަގުގެ ފެންހިންދާ ނިޒާމާއި ގުޅޭގޮތުން ހެންވޭރު ހުޅަނގު ދާއިރާގެ މެންބަރު ހަސަން ލަތީފް ކުރެއްވި ސުވާލަށް ޖަވާބު ދެއްވަމުންނެވެ.
މެންބަރުގެ ސުވާލުގެ ޖަވާބުގައި މިނިސްޓަރު އަސްލަމް ވިދާޅުވީ، އީއައޭގައި ބުނަނީ، އީއައިއޭ ހެދި އިރު، އަމީނީ މަގުގެ ފެންހިންދުމާ ބެހޭގޮތުން ބޭނުންވާ ހުރިހާ ތަފްސީލެއް ލިބެން ނެތުމުން، އޭގެ ނަތީޖާ ކަނޑައެޅުމުގައި ގޮންޖެހުން ބޮޑުކަމަށެވެ. އަދި މި މަގުގައި އަޅާ ފެން ހިންދުމުގެ ނެޓްވޯކް، ފެން ހިނދޭނެ ގޮތަކަށް ހެދުން އެއީ މުހިންމު ކަމެއްގެ ގޮތުގައި ރިޕޯޓުގައި ފާހަގަކޮށްފައިވާ ކަމަށެވެ.
އަމީނީ މަގުގައި މިހާރުވެސް ފެންބޮޑުވާކަން ފާހަގަކޮށް އެކަމަށް ހައްލެއް ހޯދުން މުހިންމުކަމެއްގެ ގޮތުގައި ބަޔާންކޮށްފައިވާ ކަމަށް މިނިސްޓަރު އަސްލަމް ވިދާޅުވިއެވެ. އަދި އަމީނީ މަގުގައި މިހާރު އަޅާފައި އޮތް ފެން ހިންދާ ނިޒާމް، އެއީ ގްރެވިޓީ ފްލޯއަކުން މަގުމައްޗަށް އެޅޭ ފެން ޕަމްޕް ސްޓޭޝަންތަކަށް ގޮސް، އެ ޕަމްޕް ސްޓޭޝަނުން ޕަންޕްއައުޓް ކުރާގޮތަށް އިން ނިޒާމެއް ކަމަށާއި، އެ ނިޒާމަށް ބޮޑު ބަދަލެއް އަންނާނެ ކަމަށެވެ.
މިނިސްޓަރު ވިދާޅުވީ މިހާރު ހުރި ޕަމްޕްސްޓޭޝަންތަކުގެ އިތުރުން، އިތުރު ޕަމްޕްސްޓޭޝަނެއް ގާއިމްކުރެވިގެންދާނެ ކަމަށެވެ. މިހާރު ހުރި ޕަމްޕްސްޓޭޝަންތަކުގެ ޕަމްޕްތަކުގެ ކެޕޭސިޓީއަކީ 9 ކިލޯ ވޮޓް ކަމަށާއި، އަމީނީ މަގުގެ މަސައްކަތްނިމިގެން ދާއިރު ހުރިހާ ޕަމްޕެއް 21 ކިލޯ ވޮޓަށް ޕަމްޕިންގް ކެޕޭސިޓީ ބޮޑުކުރެވިގެންދާނެ ކަމަށެވެ. އެއިރުން ގަޑިއަކު 1000 ކިއުބިކް މީޓަރުގެ ފެން ޕަމްޕްސްޓޭޝަންތަކުން ބޭރުވާނެ ކަމަށެވެ.
މިނިސްޓަރު އަސްލަމް ވިދާޅުވީ އީއައިއޭ ހެދި އިރު މި މައުލޫމާތުތައް ލިބެން ނެތުމުން، އީއައިއޭ ކޮންސަލްޓެންޓް ފާހަގަކޮށްފައިވަނީ މިކަމަށް ރަނގަޅަށް އެޑްރެސްކުރަން ލަފާދެއްވާފައި ކަމަށެވެ. އަދި އެ ލަފަޔާ އެއްގޮތަށް މިހާރު މަސައްކަތް ދާކަމަށް މިނިސްޓަރު ވިދާޅުވިއެވެ.
ސުވާލު ކުރައްވާ މެންބަރަށް ގުޅިގެން ސުވާލުކުރުމަށް ދިން ފުރުސަތުގައި މެންބަރު ހަސަން ލަތީފް ވަނީ އާރުޑީސީ އަދި ޑިޒައިން ރިޕޯޓުގައި އިން ޕަމްޕްސްޓޭޝަންތަކުގެ އަދަދުތައް ދިމާނުވާތީ ސުވާލުކުރައްވާފައެވެ.
މެންބަރުގެ ސުވާލުގެ ޖަބާވުގައި މިނިސްޓަރު އަސްލަމް ވިދާޅުވީ، އަމީނީ މަގުގައި ހުންނާނީ 5 ޕަމްޕް ސްޓޭޝަން ކަމަށެވެ. އަދި އެއީ ފެން ހިންދުމަށް ފުދޭނެ އަދަދެއް ކަމަށް އިންޖިނިއަރުން ކަށަވަރުކޮށްދެއްވާކަމަށް އަސްލަމް ވިދާޅުވިއެވެ.
