ކ. މާލެ
|
21 ފެބްރުއަރީ 2023 | އަންގާރަ 10:09
އަމީނީ މަގުގެ މަސައްކަތް ކުރިއަށްދަނީ - މަގު ނިމިގެންދާއިރު ފެން ހިންދާ ނިޒާމް އަޕްގްރޭޑް ކުރެވިގެންދާނެ
އަމީނީ މަގުގެ މަސައްކަތް ކުރިއަށްދަނީ - މަގު ނިމިގެންދާއިރު ފެން ހިންދާ ނިޒާމް އަޕްގްރޭޑް ކުރެވިގެންދާނެ
އިދުހާމް ނަޢީމް
އަމީނީ މަގު ފެން ހިންދާ ނިޒާމް
އަމީނީ މަގު ނިމިގެންދާއިރު ފެން ހިންދާ ނިޒާމް ވެސް އައުވެގެންދާނެ - އަސްލަމް
 
އަމީނީ މަގުގައި ފެން ހިންދުމަށް ބޭނުންކުރާނެ 5 ޕަމްޕް ސްޓޭޝަން ހުންނާނެ
 
އީއައިއޭ ރިޕޯޓުގައި ހުރި ކަންބޮޑުވުންތަކަށް ހައްލު ލިބިގެންދާނެ
 
ފެން ހިންދާ ނިޒާމުގެ ހޮޅިތަކާއި، ޕަމްޕްތައް އަޕްގްރޭޑް ކުރެވިގެންދާނެ

އަމީނީ މަގު ނިމިގެންދާއިރު ފެން ހިންދާ ނިޒާމް އަޕްގްރޭޑް ކުރެވިގެންދާނެ ކަމަށާއި، މައްސަލަ އަށް ހައްލެއް ލބިގެންދާނެ ކަަމަށް މިނިސްޓަރ އޮފް ނެޝަނަލް ޕްލޭނިންގ ހައުސިން އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.

މިނިސްޓަރު އަސްލަމް މިހެން ވިދާޅުވީ އަމީނީ މަގުގެ ފެންހިންދާ ނިޒާމާއި ގުޅޭގޮތުން ހެންވޭރު ހުޅަނގު ދާއިރާގެ މެންބަރު ހަސަން ލަތީފް ކުރެއްވި ސުވާލަށް ޖަވާބު ދެއްވަމުންނެވެ.

އަމީނީ މަގު ހެދުމުގެ ކޮންސަލްޓަންޓުގެ އީއައިއޭ ރިޕޯޓާއި ހަވާލާދޭއިރު އެ މަގު މިހާރު ހަދާގޮތަށް ހަދާ ނިމޭއިރު ފެންބޮޑުވުމުގެ މައްސަލައަށް އެކަށީގެންވާ ހައްލެއް ނާންނާނެއެވެ. ވީމާ އެ މަގުގެ ފެންބޮޑުވުން ހައްލުކުރުމަށް އޮތް ޕްލޭނަކީ ކޮބައިތޯ؟
ހެންވޭރު ހުޅަނގު ދާއިރާގެ މެންބަރު ހަސަން ލަތީފް

މެންބަރުގެ ސުވާލުގެ ޖަވާބުގައި މިނިސްޓަރު އަސްލަމް ވިދާޅުވީ، އީއައޭގައި ބުނަނީ، އީއައިއޭ ހެދި އިރު، އަމީނީ މަގުގެ ފެންހިންދުމާ ބެހޭގޮތުން ބޭނުންވާ ހުރިހާ ތަފްސީލެއް ލިބެން ނެތުމުން، އޭގެ ނަތީޖާ ކަނޑައެޅުމުގައި ގޮންޖެހުން ބޮޑުކަމަށެވެ. އަދި މި މަގުގައި އަޅާ ފެން ހިންދުމުގެ ނެޓްވޯކް، ފެން ހިނދޭނެ ގޮތަކަށް ހެދުން އެއީ މުހިންމު ކަމެއްގެ ގޮތުގައި ރިޕޯޓުގައި ފާހަގަކޮށްފައިވާ ކަމަށެވެ.

އަމީނީ މަގުގައި މިހާރުވެސް ފެންބޮޑުވާކަން ފާހަގަކޮށް އެކަމަށް ހައްލެއް ހޯދުން މުހިންމުކަމެއްގެ ގޮތުގައި ބަޔާންކޮށްފައިވާ ކަމަށް މިނިސްޓަރު އަސްލަމް ވިދާޅުވިއެވެ. އަދި އަމީނީ މަގުގައި މިހާރު އަޅާފައި އޮތް ފެން ހިންދާ ނިޒާމް، އެއީ ގްރެވިޓީ ފްލޯއަކުން މަގުމައްޗަށް އެޅޭ ފެން ޕަމްޕް ސްޓޭޝަންތަކަށް ގޮސް، އެ ޕަމްޕް ސްޓޭޝަނުން ޕަންޕްއައުޓް ކުރާގޮތަށް އިން ނިޒާމެއް ކަމަށާއި، އެ ނިޒާމަށް ބޮޑު ބަދަލެއް އަންނާނެ ކަމަށެވެ.

މިހާރު ގްރެވިޓީ ފްލޯގައި ފެން ދަތުރުކުރުމަށް އަޅާފައި ހުރި ހޮޅިތަކުގެ ވަށަމިނަކީ 150 މިލިމީޓަރާއި 300 މިލިމީޓަރު. ޕަމްޕް ސްޓޭޝަންތަކުން ފެން ބޭރުކުރުމަށް 160 މިލިމީޓަރާއި 280 މިލިމީޓަރާއި ދެމެދުގެ ހޮޅި އަޅާފައި ވަނީ. އައު ސްޓޯމްވޯޓަރ ނިޒާމުގައި މިހާރު 150 އާއި 300 މިލިމީޓަރުގެ ހުރި ހުރިހާ ގްރެވިޓީ ފްލޯގެ ހޮޅިތައް 315 މިލިމީޓަރަށް ވަށަމިން ބޮޑުކޮށްފައިވަނީ. އަދި ޕަމްޕް ކުރާ ހޮޅިތައް 160 އާއި 280 މިލިމީޓަރުން 314 މިލިމީޓަރުގެ ވަށަމިނުގެ ހޮޅިތަކަށް ވަނީ ބަދަލުކުރެވިފައި.
މިނިސްޓަރ އޮފް ނެޝަނަލް ޕްލޭނިންގ ހައުސިން އެންޑް އިންފްރާސްޓްރަކްޗަރ މުހައްމަދު އަސްލަމް

މިނިސްޓަރު ވިދާޅުވީ މިހާރު ހުރި ޕަމްޕްސްޓޭޝަންތަކުގެ އިތުރުން، އިތުރު ޕަމްޕްސްޓޭޝަނެއް ގާއިމްކުރެވިގެންދާނެ ކަމަށެވެ. މިހާރު ހުރި ޕަމްޕްސްޓޭޝަންތަކުގެ ޕަމްޕްތަކުގެ ކެޕޭސިޓީއަކީ 9 ކިލޯ ވޮޓް ކަމަށާއި، އަމީނީ މަގުގެ މަސައްކަތްނިމިގެން ދާއިރު ހުރިހާ ޕަމްޕެއް 21 ކިލޯ ވޮޓަށް ޕަމްޕިންގް ކެޕޭސިޓީ ބޮޑުކުރެވިގެންދާނެ ކަމަށެވެ. އެއިރުން ގަޑިއަކު 1000 ކިއުބިކް މީޓަރުގެ ފެން ޕަމްޕްސްޓޭޝަންތަކުން ބޭރުވާނެ ކަމަށެވެ.

އަމީނީ މަގުގެ މަސައްކަތް ކުރިއަށްދަނީ - އާރްޑީސީ

މިނިސްޓަރު އަސްލަމް ވިދާޅުވީ އީއައިއޭ ހެދި އިރު މި މައުލޫމާތުތައް ލިބެން ނެތުމުން، އީއައިއޭ ކޮންސަލްޓެންޓް ފާހަގަކޮށްފައިވަނީ މިކަމަށް ރަނގަޅަށް އެޑްރެސްކުރަން ލަފާދެއްވާފައި ކަމަށެވެ. އަދި އެ ލަފަޔާ އެއްގޮތަށް މިހާރު މަސައްކަތް ދާކަމަށް މިނިސްޓަރު ވިދާޅުވިއެވެ.

ސުވާލު ކުރައްވާ މެންބަރަށް ގުޅިގެން ސުވާލުކުރުމަށް ދިން ފުރުސަތުގައި މެންބަރު ހަސަން ލަތީފް ވަނީ އާރުޑީސީ އަދި ޑިޒައިން ރިޕޯޓުގައި އިން ޕަމްޕްސްޓޭޝަންތަކުގެ އަދަދުތައް ދިމާނުވާތީ ސުވާލުކުރައްވާފައެވެ.

އާރުޑީސީން އިއްޔެގަ އެބަ އިސްތިހާރުކުރައްވާ އަމީނީ މަގުގައި 5 ކެމަންޓް އޭރިއާއަކަށް ބަހާލެވިގެން، ކޮންމެ ކެޗްމަންޓް އޭރިއާއެއްގައި ޕަމްޕް ސްޓޭޝަނެއް އިންނާނެކަމަށް. އެހެންނަމަވެސް އަމީނީ މަގުގެ ސްޓޯމް ވޯޓަރ މެނޭޖްމަންޓް ޑިޒައިން ރިޕޯޓުގައި އަމީނީ މަގު 7 ކެޗްމަންޓް އޭރިއާއަކަށް ބަހާލެވިފައި ހުންނާނެކަމަށާއި، އެއިން ކޮންމެ ކެޗްމަންޓް އޭރިއާއެއްގައި ޕަމްޕް ސްޓޭޝަނެއް ހުންނާނެކަމަށް އެބަވޭ ޑިޒައިން ރިޕޯޓުގައި. ވަޒީރު ކިހިނެއްތޯ މި ދެއަދަދު ދިމާކުރައްވަނީ. އާރުޑީސީން ބުނަނީ 5 ޕަމްޕް ސްޓޭޝަންގެ ވާހަކަ، ޑިޒައިން ރިޕޯޓުގައި ބުނަނީ 7 ސްޓޭޝަންގެ ވާހަކަ.
ހެންވޭރު ހުޅަނގު ދާއިރާގެ މެންބަރު ހަސަން ލަތީފް

މެންބަރުގެ ސުވާލުގެ ޖަބާވުގައި މިނިސްޓަރު އަސްލަމް ވިދާޅުވީ، އަމީނީ މަގުގައި ހުންނާނީ 5 ޕަމްޕް ސްޓޭޝަން ކަމަށެވެ. އަދި އެއީ ފެން ހިންދުމަށް ފުދޭނެ އަދަދެއް ކަމަށް އިންޖިނިއަރުން ކަށަވަރުކޮށްދެއްވާކަމަށް އަސްލަމް ވިދާޅުވިއެވެ.

ކޮމެންޓް