އެމެރިކާގެ ރައީސް ކުއްލި ދަތުރުފުޅެއްގައި ޔޫކްރެއިނަށް ވަޑައިގެންފި
20 ފެބުރުއަރީ 2023 | ހޯމަ 12:23ބައިޑަންގެ ކުއްލި ދަތުރުފުޅުގެ ބޭނުމަކީ އެމެރިކާގެ ސަޕޯޓް ހާމަކޮށްދެއްވުން
ބައިޑަންއާއި ޒެލެންސްކީ
ކުރިން އިއުލާންކޮށްފައިނުވާ ކުއްލި ދަތުރުފުޅެއްގައި އެމެރިކާގެ ރައީސް ޖޯބައިޑަން, ޔޫކްރެއިންގެ ވެރިރަށް ކިއިވްއަށް ވަޑައިގެންފިއެވެ.
ބައިޑަންއާއެއު ހުންނެވި ފޮޓޯއެއް ޓްވީޓް ކުރައްވަމުން ޒެލެންސްކީ ވަނީ, ކިއިވްއަށް މަރުހަބާ ވިދާޅުވާކަމަށާއި، ރައީސްގެ މިދަތުރުފުޅުންވެސް ޔޫކްރެއިން ރައްޔިތުންނަށް އެމެރިކާއިން ދޭ ފުރިހަމަ ސަޕޯޓް ހާމަވާކަން ފާހަގަކުރައްވާކަމަށް ވިދާޅުވެފައެވެ.
މިއީ މީގެ އެއްއަހަރު ކުރިން ރަޝިޔާއިން ޔޫކްރެއިން އަށް ހަމަލާތައް ދޭންފެށިފަހުން ބައިޑެން ޔޫކްރެއިން އަށް ކުރައްވާ ފުރަތަމަ ދަތުރުފުޅެވެ.
ރައީސް ޒެލެންސްކީވެސް ވަނީ މިދިޔަ ޑިސެމްބަރުމަހު އެމެރިކާއަށް ކުއްލި ދަތުރުފުޅެއް ކުރައްވާފައެވެ. އެއީ ޔޫކްރެއިނަށް އިތުރު ހަތިޔާރާއި އެހީ ފޯރުކޮށްދިނުމަށް ކޮންގްރެސްގެ ކިބައިން އެދިވަޑައިގެންނެވުމަށެވެ.
ބައިޑަން ޔޫކްރެއިނަށް ވަޑައިގެންނެވީ ޕޮލަންޑަށް ވަޑައިގެންނެވުމަށްފަހު ރޭލު މަގުން ކަމަށް، ނިއުޔޯކް ޓައިމްސްއިން ރިޕޯޓްކޮށްފައިވެއެވެ.
ސަލާމަތީ ސަބަބުތަކަށްޓަކައި ބައިޑެން ވޮޝިންގޓަންއިން ފުރާވަޑައިގެންނެވީވެސް ކުއްލި ގޮތަކަށެވެ. އަދި ޕޮލަންޑް ހިމެނޭގޮތުން، އިރުމަތީ ޔޫރަޕަށް ކުރައްވަން އޮތް ދަތުރުފުޅުގައި ޔޫކްރެއިނަށް ވަޑައިގަންނަވާނެކަން ނުވަތަ ނޫންކަން ވައިޓް ހައުސްއިން ކަށަވަރުކޮށްދީފައެއް ނުވެއެވެ.
ބައިޑަންއަށް މަރުހަބާ ވިދާޅުވުމަށް ޒެލެންސްކީގެ އަރިހުގައި އަނބިކަނބަލުން އޮލޭނާ ޒެލެންސްކީވެސް ބައިވެރިވެ ވަޑައިގެންފައިވެއެވެ.
ފަހުން ޒެލެންސްކީގެ އަރިހުގައި ނޫސްވެރިންނާ ބައްދަލުކުރައްވައި ބައިޑަން ދެއްކެވި ވާހަކަފުޅުގައި ވަނީ، ނާއިބު ރައީސަކަށް ހުންނެވިއިރު ހަ ފަހަރު ޔޫކްރެއިނަށް ވަޑައިގެންވިކަން ފާހަގަކުރައްވައި، އޭރުވެސް އަދި އެނބުރި އެ ގައުމަށް ވަޑައިގަންނަވާނެކަން އެނގިވަޑައިގަންނަވާ ކަމަށް ވިދާޅުވެފައެވެ. އަދި އެމެރިކާއިން ދޭ އިތުރު 500 މިލިއަން ޑޮލަރުގެ އެހީގެ ޕެކޭޖެއް އަންގާރަ ދުވަހު އިއުލާން ކުރައްވާނެ ކަމަށް ވިދާޅުވެފައި ވެއެވެ.
ހަނގުރާމައަށް އަހަރެއް ފުރެން ތައްޔާރުވެފައިވާ މި ދަނޑިވަޅާ ދިމާކޮށް އެމެރިކާގެ ރައީސްގެ ދަތުރުފުޅުގެ ސަބަބަބުން ޔޫކްރެއިންގެ އާންމު ރައްޔިތުންގެ ހިތްވަރު ވަރަށް ބޮޑަށް އާވެގެން ގޮސްފައިވާކަމަށް ޚަބަރުތައް ބުނެއެވެ.
ބައިޑެންގެ ޔޫކްރެއިން ދަތުރުފުޅު ނިންމަވާލެއްވުމަށްފަހު ހަމަ މިއަދު ޕޮލަންޑަށް ވަޑައިގަތުމަށް ވަނީ ހަމަޖެހިފައެވެ.
