އެންމެ ކުޑަމިނުން އިންސާނީ މައްސަލަތައް ހައްލުކުރުމަށް "ކޮންމެވެސް ހިސާބަކުން" ސީރިއާ އާއި މަޝްވަރާ ކުރަން ޖެހޭ - ސައުދީ
12 އަހަރު ކުރިއާއި މިހާރާއި ތަފާތު ކަމަށް ފައިސަލް ވިދާޅުވި
ސައުދީ އަރަބިއްޔާގެ ފޮރިން މިނިސްޓަރު ޕްރިންސް ފައިސަލް ބިން ފަރުހާން އަލް ސައުދު
ސީރިއާ އެކަހެރިކުރުމަކީ ފައިދާއެއް ނުކުރާ ކަމެއް ކަމަށާއި ރެފިއުޖީން އެނބުރި އައުން ހިމެނޭ ގޮތަށް އިންސާނީ މައްސަލަތައް އެންމެ ކުޑަމިނުން ހައްލުކުރުމަށް "ކޮންމެވެސް ހިސާބަކުން" ދިމިޝްގުއާ މަޝްވަރާ ކުރަން ޖެހޭ ކަމަށް ސައުދީ އަރަބިއްޔާގެ ފޮރިން މިނިސްޓަރު ވިދާޅުވެއްޖެއެވެ.
ހޮނިހިރު ދުވަހު މިއުނިކްގައި ބޭއްވި ސަލާމަތީ ފޯރަމެއްގައި ޕްރިންސް ފައިސަލް ބިން ފަރުހާން އަލް ސައުދު ވިދާޅުވީ ސީރިއާގެ 12 އަހަރުގެ ދާޚިލީ ހަނގުރާމައިގެ ކުރީކޮޅު ސައުދީ އަރަބިއްޔާ ހިމެނޭ ގޮތަށް އަރަބި ގައުމުތަކުން ބައްޝާރުލް އަސަދާ ދެކޮޅަށް ހަނގުރާމަވެރިންނަށް ތާއީދުކުރި އިރާއި މިހާރު ތަފާތުވާންޖެހޭ ކަމަށެވެ.
މިނިސްޓަރު ވިދާޅުވީ ސިޔާސީ ހައްލަކަށް "މެކްސިމަލިސްޓް ލަނޑުދަނޑިތަކާ" ދިމާލަށް މަގެއް ނެތުމުން، އަވަށްޓެރި ގައުމުތަކުގައި ސީރިއާގެ ރެފިއުޖީންގެ މައްސަލައާއި އާންމުންނަށް ކުރިމަތިވެފައިވާ ތަކުލީފުތަކަށް ހައްލެއް ހޯދުމަށް އެހެން ގޮތެއް ހޯދައިދިނުމަށް މަސައްކަތް ކުރަމުންދާ ކަމަށާއި ހާއްސަކޮށް ސީރިއާއަށް އައި ބާރުގަދަ ބިންހެލުމާއި ގުޅިގެން އެކަން ކުރައްވަމުން ގެންދަވާ ކަމަށެވެ.
ބިންހެލުމާ ގުޅިގެން އެމިރޭޓާއި އުރުދުންއަށް ޒިޔާރަތްތަކަށް ފަހު ދިމިޝްގަށް ޒިޔާރަތް ކުރައްވާނެ ކަމަށް ރިޕޯޓްތައް ބުނާ ވާހަކަތަކާ ބެހޭ ގޮތުން ސުވާލު ކުރުމުން ޕްރިންސް ފައިސަލް ވިދާޅުވީ އަޑުތައް ފެތުރިފައިވާ ވާހަކަތަކާ މެދު އެއްޗެއް ވިދާޅުނުވާނެ ކަމަށެވެ.
ބިންހެލުމުގައި އެހީތެރިވުމުގެ މަސައްކަތުގެ ތެރެއިން ސީރިއާގެ ސަރުކާރުން ކޮންޓްރޯލް ކުރާ ސަރަހައްދަށް ސައުދީގެ އެހީގެ މަތިންދާބޯޓުތައް ފޮނުވާފައި ވަނީ ފުރަތަމަ އެހީ ފޮނުވީ ހަމައެކަނި އެގައުމުގެ އިދިކޮޅު ފަރާތްތަކުގެ ބެލުމުގެ ދަށުގައިވާ ހުޅަނގު އުތުރު ސަރަހައްދަށެވެ.
ހުޅަނގުން ތާއިދު ނުކުރާ އަސަދަށް ފާއިތުވި އަހަރުތަކުގައި އޭނާއާ ގުޅުން އާންމުވެފައިވާ އަރަބި ގައުމުތަކުގެ ތާއީދު ބޮޑުވަމުން އަންނައިރު، ޚާއްސަކޮށް އީރާނުގެ ނުފޫޒާ ދެކޮޅަށް ސީރިއާގައި އަރަބިންގެ ނުފޫޒު ފޯރުވުމަށް އަމާޒު ހިފާފައިވާ ޔުނައިޓެޑް އަރަބް އެމިރޭޓްސްގެ ތާއީދު ލިބެއެވެ.
އަސަދު ވަނީ އީރާނާއި އީރާނުގެ ތާއީދާއެކު ލުބުނާނުގެ ހިޒްބުﷲ ފަދަ ޝިޔައީ މުސްލިމް ޖަމާއަތްތަކާ އެކު ރަޝިޔާގެ ތާއީދާއެކު ސީރިއާގެ ބޮޑު ބައެއްގެ ކޮންޓްރޯލް އަނބުރާ ހޯދާފައެވެ.
ސީރިއާއަށް ދަތިކުރުމުގެ ފިޔަވަޅުތައް އަޅާފައިވާ އެމެރިކާއިން ދެކޮޅުވެރިކަން ކުރިމަތިވި ނަމަވެސް، ޔޫއޭއީން ދަނީ ދިމިޝްގާއި އަލުން ގުޅުމަށް ޕްރެޝަރު ކުރަމުންނެވެ.
