ޕީއެސްޖީގެ ކޮންޓްރެކްޓް އައުކުރަން މެސީގެ ބައްޕަ މަސައްކަތް ފަށައިފި
17 ފެބުރުއަރީ 2023 | ހުކުރު 02:20މެސީ ހޯދުމަށް ކުރީގެ ކުލަބު ބާސެލޯނާއިން ވެސް ދަނީ މަސައްކަތް ކުރަމުން
މެސީ ޕީއެސްޖީގެ ޖާޒީގައި: އޭނާ ގަތުމަށް ޗެލްސީން ޝައުގުވެރިވޭ
ފްރާންސްގެ ޕީއެސްޖީއާއެކު އާޖެންޓީނާގެ ކެޕްޓަން ލަޔޮނަލް މެސީ ހަދާފައިވާ ކޮންޓްރެކްޓް އައުކުރުމުގެ މަސައްކަތް އޭނާގެ ބައްޕަ ފަށައިފި އެވެ.
މެސީގެ ބައްޕަ ޖޯޖް މެސީ އަކީ ހަތް ފަހަރު ދުނިޔޭގެ މޮޅު ކުޅުންތެރިޔާގެ މަގާމު ހޯދާފައިވާ ބާސެލޯނާގެ ކުރީގެ ކެޕްޓަންގެ އެޖެންޓްވެސްމެ އެވެ.
އުމުރުން މިހާރު 35 އަހަރުގެ މެސީ ކޮންޓްރެކްޓް އައުކުރުމުގެ ވާހަކަތައް ރަސްމީކޮށް ދެއްކުމަށް އޭނާގެ ބައްޕަ މިވަގުތު ހުރީ ފްރާންސްގެ ވެރިރަށް ޕެރިހުގަ އެވެ. މިކަން ދިރާސާކުރާ ފަރާތްތަކުން ބުނަނީ ޕީއެސްޖީއާއެކު މެސީ އިތުރު ދެ އަހަރު ސޮއިކުރާނެ ކަމަށެވެ. މީގެ ދެ އަހަރު ކުރިން ޕީއެސްޖީ އަށް މެސީ ސޮއިކުރީ ދެ އަހަރު ދުވަހަށެވެ. މި ކޮންޓްރެކްޓް ކުރިއަށް އޮތް ޖޫން މަހަށް ހަމަވާއިރު މެސީ އެނބުރި ބާސެލޯނާ އަށް ގެންދިއުމަށް އެކުލަބުން ވެސް ވަނީ މަސައްކަތް ފަށައިފަ އެވެ. ނަމަވެސް މެސީ ބާސެލޯނާ ދޫކޮށްލަން ޖެހުނީ އެކުލަބުގެ މިހާރުގެ މެނޭޖްމަންޓުގެ ސަބަބުން ކަމަށް ބަލައި މިހާރުގެ ރައީސް ޖޯން ލަޕޯޓާއާއި މެސީގެ އާއިލާއާ ގުޅުން ވަނީ ގޯސްވެފަ އެވެ. މިހެންވެ އަލުން ބާސެލޯނާ އަށް މެސީ ބަދަލުވުން އޮތީ ނޭނގުމެއްގެ ތެރޭގަ އެވެ.
ޕީއެސްޖީގައި މަޑުނުކުރާނަމަ މެސީ އެމެރިކާގެ އިންޓަމިއާމީ އަށް ވެސް ބަދަލުވެދާނެ ކަމަށް ގިނަ ބަޔަލު ލަފާކުރެ އެވެ. ސަބަބަކީ އޭނާގެ އާއިލާއިން އެމެރިކާގައި ދިރިއުޅުމަށް ލޯބިކުރާތީ އެވެ. އެކަމަކު އެމެރިކާ ލީގަށް ބަދަލުވުމަކީ ކެރިއަރު ނިންމާލުމުގެ ފިޔަވަޅަކަށްވާތީވެ މެސީ މިހާ އަވަހަށް އެމެރިކާ ލީގަށް ދާނެ ކަމަށް ގިނަ ބަޔަކުނުދެކެ އެވެ. މިއަށްވުރެ ބޮޑަށް މެސީ އަދި ހުރީ ޔޫރަޕުގައި މޮޅަށް ކުޅުމުގެ އުއްމީދުގައި ކަމަށްވުމުން އޭނާ ހޯދުމުގެ ރޭހަށް ފަހު ވަގުތު ބާސެލޯނާ ވެސް ގަދަކޮށް ވަންނާނެ ކަމަށް ތަޖުރިބާކާރުން ގަބޫލުކުރެ އެވެ.
