ސްޕެނިޝް ލަލީގާގައި ލިއޮނެލް މެސީގެ ލަނޑުތަކުން ބާސެލޯނާ މޮޅުވިއިރު، ތަފާތުބޮޑު ނަތީޖާއަކުން އެޓްލެޓިކޯ މޮޅުވެއްޖެއެވެ.
ހޮނިހިރު ދުވަހުގެރޭ ކުޅުނު މެޗުން ބާސާ މޮޅުވީ ޑިޕޯޓިވޯ އަލަވޭސްއާ ވާދަކޮށް 0-2 ގެ ނަތީޖާއަކުންނެވެ.
އަލަވޭސް ދަނޑުގައި ކުޅުނު މި މެޗު ފެށިގެން ރަނގަޅަށް ކުޅުނީ އަލަވޭސް އިންނެވެ. އެގޮތުން އެޓީމުން ވަނީ ބާސާގެ ހާފަށް ބާރުބޮޑުކޮށް ލަނޑު ޖެހުމަށް ފުރުސަތަކެއް ތަނަވަސްކޮށްފައެވެ.
މެޗުގެ 37 ވަނަ މިނެޓުގައި ބާސާ އަށް ވަނީ ޕެނަލްޓީއެއް ލިބިފައެވެ. އެހެންނަމަވެސް ލިއޮނެލް މެސީ ފޮނުވާލި ޕެނަލްޓީ އަލަވޭސްގެ ކީޕަރު ޕޮޗިއޯ ވަނީ ހުށިޔާރުކަމާއެކީ ދިފާއުކޮށްފައެވެ.
ފުރަތަމަ ހާފް ނިމުނީ 0-0 ގެ ނަތީޖާއިން ދެޓީމު އެއްވަރުވެގެންނެވެ.
އެހެންނަމަވެސް ދެވަނަ ހާފް ފެށިގެން ބާސާއިން ވަނީ އެޓީމުގެ ކުޅުން ރަނގަޅުކޮށްފައެވެ. އެގޮތުން އެޓީމުން ވަނީ ލަނޑު ޖެހުމަށް ރަނގަޅު ފުރުސަތުތައް ދެވަނަ ހާފްގައި ހޯދާފައެވެ.
ބާސާ އިން މެޗުގެ ލީޑު ނެގީ 55 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ ޖޯޑީ އަލްބާގެ އެހީތެރިކަމާއެކު މެސީއެވެ. މި ލަނޑަށްފަހުވެސް ބާސާއިން ދިޔައީ އަލަވޭސްގެ ހާފަށް ބާރުބޮޑުކުރަމުންނެވެ.
އެގޮތުން 66 ވަނަ މިނެޓުގައި މެސީ ވަނީ އިތުރު ލަނޑެއް ކާމިޔާބުކޮށް ބާސާއަށް ލީޑު ފުޅާކޮށްދީފައެވެ. މެޗުގެ 74 ވަނަ މިނެޓުގައި މެސީއަށް ވަނީ ހެޓްރިކް ފުރިހަމަކުރުމަށްވެސް ފުރުސަތެއް ލިބި ބޭކާރުވެފައެވެ. އޭނާ ކުރިޔަށް ފޮނުވާލި ހަމަލާ ދިޔައީ ގޯލު ދަނޑިމަތިން ބޭރަށެވެ.
ލީގުގައި ބާސާ ދެ މެޗު ކުޅެފައިވާއިރު، އެޓީމު ވަނީ ދެ މެޗުވެސް ކާމިޔާބުކޮށްފައެވެ. އަލަވޭސް ވަނީ ލީގުގައި އެޓީމު ކުޅުނު ދެ މެޗުންވެސް ބަލިވެފައެވެ.
ހޮނިހިރު ދުވަހުގެ ރޭ އެޓްލެޓިކޯ މެޑްރިޑް މޮޅުވީ ލަސްޕާމަސްއާ ވާދަކޮށް 1-5 ގެ ތަފާތުބޮޑު ނަތީޖާއަކުންނެވެ.
ލަސްޕާމަސް ދަނޑުގައި ކުޅުނު މި މެޗު ފެށިގެން ތިންވަނަ މިނެޓުގައި އެޓްލެޓިކޯ އިން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ އެންހަލް ކޮރެއާއެވެ. އޭގެ ދެ މިނެޓު ފަހުން ޔަނިކް ކަރަސްކޯ ކާމިޔާބުކުރި ލަނޑަކުން އެޓްލެޓިކޯ އިން ވަނީ ލީޑު ފުޅާކޮށްފައެވެ.
މި ލަނޑުތަކަށްފަހުވެސް އެޓްލެޓިކޯއިން ދިޔައީ ލަސްޕާމަސްގެ ހާފަށް ބާރުބޮޑުކުރަމުންނެވެ. އެގޮތުން ލީޑު އިތުރަށް ފުޅާކުރުމަށްވެސް ފުރުސަތުތަކެއް އެޓީމަށް ވަނީ ލިބި ބޭކާރުވެފައެވެ.
ފުރަތަމަ ހާފް ނިމުނީ 0-2 ގެ ނަތީޖާއިން ލަސްޕާމަސްގެ މައްޗަށް އެޓްލެޓިކޯ ކުރީގައި އޮވެގެންނެވެ.
ދެވަނަ ހާފް ފެށިގެން ލަސްޕާމަސް އިން ވަނީ ނަތީޖާގެ ފަރަގު ކުޑަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ޖޮނަތަން ކެލެރީއެވެ. އެހެންނަމަވެސް 62 ވަނަ މިނެޓުގައި ކޮކޭ ވަނީ އެޓްލެޓިކޯއަށް ލީޑު ފުޅާކޮށްދީފައެވެ. އެޓްލެޓިކޯއިން ޖެހި ހަތަރުވަނަ ލަނޑުވެސް ކާމިޔާބުކުރީ ކޮކޭއެވެ.
މެޗު ފަހު ވަގުތުކޮޅު ތެރޭގައިވެސް އެޓްލެޓިކޯއަށް ހުސް ގިނަ ފުރުސަތުތައް ލިބިފައިވެއެވެ. އެޓީމުން މެޗުގައި ޖެހި ފަސްވަނަ ލަނޑު 88 ވަނަ މިނެޓުގައި ކާމިޔާބުކޮށްދިނީ ތޯމަސް ޕާޓޭއެވެ.
މި ނަތީޖާއާއެކު އެޓްލެޓިކޯ ވަނީ ކުޅުނު ދެ މެޗުން ހަތަރު ޕޮއިންޓް ހޯދާފައެވެ. މެޗުން ބަލިވި ލަސްޕާމަސް ވަނީ ކުޅުނު ދެ މެޗުންވެސް ބަލިވެފައެވެ.
