މާލޭގައި ކުއްޔަށް ހިފާފައިވާ ތަނެއްގައި މިހާރު ވުޒާރާ އެއް ނުހިނގާނެ: މިނިސްޓަރ އަސްލަމް

ދައުލަތުގެ ވުޒާރާއެއްގެ ހިންގުން މާލޭގައި ކުއްޔަށް ހިފާފައިވާ ތަނެއްގައި ހިނގާތަނެއް މިހާރު ނުހުންނާނެ ކަމަށާއި ސަރުކާރުގެ ވުޒާރާ އެއް ނަމަ ހުންނާނީ ސަރުކާރުގެ އިމާރާތެއްގައި ކަމަށް މިނިސްޓަރ އޮފް ނެޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ، މުހައްމަދު އަސްލަމް ވިދާޅުވެއްޖެއެވެ.

މިނިސްޓަރ އެފަދައިން ވިދާޅުވީ ހުޅުމާލޭގައި ސަރުކާރުން ބިނާކުރެއްވި، ޢުމަރު ޒާހިރު ބިލްޑިންގ ހުޅުވުމަށް ބުދަ ދުވަހު ބޭއްވި ރަސްމިއްޔާތުގައި ވާހަކަދައްކަވަމުންނެވެ. އެ އިމާރާތާއި އެކު މާލޭ ސިޓީގެ ބައެއްގެ ގޮތުގައި ހުޅުމާލެ ސިޓީ ވެގެން ގޮސްފައިވާ ކަމަށް އަސްލަމް ވިދާޅުވިއެވެ. އެ ތަނަކީ ވަކިން އޮތް "ދޮން ދަރި" އެއްގެ ގޮތުގައި ސިފަކުރެވޭކުރުން ނެތިގޮސް އެއީ މާލޭ އާއިލާގެ ބައެއްގެ ގޮތުގައި މިހާރު ބެލެވެން ފަށާފައިވާ ކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ ދައުލަތުގެ މިނިސްޓްރީތައް ހުޅުމާލޭ ސިޓީގައި ޤާއިމް ކުރުމަކީ ހުޅުމާލޭގައި ދިރިއުޅޭ ފަރާތްތަކުން އުފާކުރާނެ ކަމެއް ކަމަށެވެ. އެއީ ފުރަމާލެ ފުޅާވެގެންދާން މެދުވެރިވާ ސަބަބެއް ކަަމަށް ވެސް މިނިސްޓަރ ވަނީ ވިދާޅުވެފައެވެ.

މިނިސްޓަރ ވަނީ ކުރިއަށް އޮތްތަނުގައި ވިލިމާލެ އާއި ގުޅީފަޅުގެ އިތުރުން ތިލަފުށި ވެސް ހުޅުމާލެ އާއި އެއްގޮތަށް މާލެ އާއި ގުޅާލެވޭނެ ކަމަށް ވިދާޅުވެފައެވެ. އެ ހިސާބުން ހަގީގީ މާނައިގައި މާލެ ސަރަހައްދު "ގްރޭޓަރ މާލޭ އޭރިއާ" އަށް ވެގެންދާނެ ކަމަށް މިނިސްޓަރ ވިދާޅުވިއެވެ. ދައުލަތުގެ އިމާރާތެއް ހުޅުމަލޭގައި ބިނާކުރީ ސަރުކާރު އޮފީސްތައް ހިންގާ ދެ އިމާރާތެއް ބާވެ ބޭނުން ނުކުރެވޭ ވަރަށް ހަލާކުވުމުން ކަމަށް ވެސް މިނިސްޓަރ ވަނީ ވިދާޅުވެފައެވެ.

މިނިސްޓަރ ވަނީ ނިޝާން ޢިއްޒުއްދީނުގެ ޢިއްޒަތުގެ ވެރިޔާ އަލްމަރްޙޫމް ޢުމަރު ޒާހިރުގެ ނަންފުޅަށް ނިސްބަތްކޮށް، ސަރުކާރުގެ އޮފީސް ޢިމާރާތެއް ހުޅުވުމަކީ ޝަރަފެއް ކަަމަށް ފާހަގަކުރައްވާފައެވެ. މީގެ އިތުރުން މަސައްކަތަށް ފަރުވާތެރިކަން ބެހެއްޓެވުމާއި، ވެރިންނަށް ކިޔަމަންވުމާއި އެ ނޫން ވެސް ރަނގަޅު އެތައް ސިފައެއް އުމަރު ޒާހިރުގެ ކިބައިން ފެނިވަޑައިގަތް ކަަމަށާއި އުމަރު ޒާހިރު އަކީ ވަރަށް ގިނަ ކަންކަން ދަސްކޮށްދެއްވި ބޭފުޅެއް ކަމަށް އަސްލަމް ވިދާޅުވިއެވެ. އޭނާ ވިދާޅުވީ އުމަރު ޒާހިރު އަކީ ހިންގުންތެރި، ތަފާތު ބޭފުޅެއް ކަމަށެވެ.