ޓެކްސް ދެއްކުމުން އިސްތިސްނާވާ 10 މަޝްރޫއު އާއްމުކޮށްފި
ރާއްޖޭގައި ހިންގާ ގިނަ މަޝްރޫއުތަކެއް މި ލިސްޓުގައި ހިމެނޭ
ތިލަމާލެ ބްރިޖުގެ މަސައްކަތް ކުރިއަށްދަނީ
އާމްދަނީން ޓެކްސް ނެގުމުގެ ގާނޫނުގެ ދަށުން އިސްތިސްނާ ދީފައިވާ 10 މަޝްރޫއެއްގެ ލިސްޓު، ފިނޭންސް މިނިސްޓްރީން އާއްމުކޮށްފިއެވެ.
އެ މިނިސްޓްރީން ނެރުނު އިއުލާނެއްގައި ވަނީ، ވިޔަފާރި މަޝްރޫއުތަކާއި ދާއިރާތަކުން ލިބޭ އާމްދަނީން ޓެކްސް ދެއްކުމުން ޚާއްސަ އިސްތިސްނާ ދިނުމާބެހޭ ގަވާއިދުގެ 7 ވަނަ މާއްދާއާއި އާމްދަނީން ޓެކްސް ނެގުމުގެ ގާނޫނުގެ 1-12 ވަނަ މާއްދާގެ ދަށުން އާމްދަނީން ޓެކްސް ދެއްކުމުން އިސްތިސްނާކުރުމަށް ރައީސުލްޖުމްހޫރިއްޔާ ކަނޑައަޅާ ފަރާތްތަކުގެ ދަފުތަރެއް ފިނޭންސް މިނިސްޓްރީން ދިވެހި ސަރުކާރުގެ ގެޒެޓުގައި ޝާއިއުކޮށް، އަދާހަމަކުރަން ޖެހޭކަމަށެވެ.
ފިނޭންސް މިނިސްޓްރީގެ މި ލިސްޓުގައި ރައީސުލްޖުމްހޫރިއްޔާ ކަނޑައަޅުއްވާފައިވާ 10 މަޝްރޫއެއް ވަނީ ހިމަނާފައެވެ. މި 10 މަޝްރޫއުވެސް ޓެކްސް ދެއްކުމުން އިސްތިސްނާވަނީ އެއީ ދިވެހި ސަރުކާރާއި އިންޑިއަން އެކްސްޕޯޓް އިމްޕޯޓް ބޭންކާ ދެމެދު ސޮއިކޮށްފައިވާ ޑޮލަރު ކްރެޑިޓް ލައިން އެގްރީމަންޓުގެ ދަށުން މި މަޝްރޫއާ ގުޅިގެން ދައްކަންޖެހޭ ޓެކްސް އިސްތިސްނާކުރުމަށް އެއްބަސްވެފައިވާ މަޝްރޫއުތަކަކަށް ވާތީއެވެ.
އާމްދަނީން ޓެކްސް ނެގުމުގައި އިސްތިސްނާވާ 10 މަޝްރޫއުގެ ތެރޭގައި އެފްކޮންސްއާއި ޖޭއެމްސީ ޕްރޮޖެކްޓްސްއާއި އެލް އެންޑް ޓީއިންސްފްރާސްޓްރަކްޗަރ އިންޖިނިއަރިންގ ލިމިޓެޑް އެންޑް ލެއާ އެސޯސިއޭޓްސް ސައުތު އޭޝިއާއާއި، ވިޝްވަރާޖް އެންވަޔަރަމަންޓާއި، އެސްއެމްސީ އިންފްރާސްޓްރަކްޗަރސްއިން ރާއްޖޭގައި ހިންގާ މަޝްރޫއުތައް ހިމެނެއެވެ. މީގެ ތެރޭގައި އައްޑޫގެ މަގު ހެދުމާއި ތިލަމާލެ ބްރިޖު އަދި ރަށްރަށުގެ ފެނާއި ނަރުދަމާގެ މަޝްރޫއުތައް ހިމެނެއެވެ.
ފިނޭންސް މިނިސްޓްރީންވަނީ ޓެކްސް ދެއްކުމުން އިސްތިސްނާވާ ފަރާތްތަކުގެ މައުލޫމާތުތައް އާއްމުކޮށް، އެ ފަރާތްތަކުގެ ދަފްތަރު އެ މިނިސްޓްރީގެ ވެބްސައިޓުގައި ޝާއިއުކޮށްފައެވެ.
