ރަންޔޫބީލް ފާހަގަކުރަން ވިކްޓަރީން ސަރަހައްދީ މުބާރާތެއް ބާއްވަނީ

ރާއްޖޭގެ ފުޓްބޯޅައިގެ އެންމެ ކާމިޔާބު ކުލަބު ކަމަށްވާ ވިކްޓަރީ ސްޕޯޓްސް ކުލަބަށް 50 އަހަރު ފުރުމުން، ރަންޔޫބީލް ފާހަގަ ކުރުމަށް ސަރަހައްދީ މުބާރާތެއް ބާއްވަން ނިންމައިފި އެވެ.

ތިނެއް ޖުލައި 1971 ވަނަ އަހަރު އުފެއްދި ވިކްޓަރީ އަށް މި އަހަރު 52 އަހަރު ފުރޭނެ އެވެ. އެ ކުލަބަށް 50 އަހަރުވިއިރު ވިކްޓަރީ އޮތީ އެފްއޭއެމްގެ ސަސްޕެންޝަނެއްގަ އެވެ. ސަބަބަކީ މެޗުތައް ނުކުޅެ ދޫކޮށްލުމާއި ކުޅުންތެރިންނަށް މުސާރަ ނުދޭ މައްސަލާގަ އެވެ. މިއާއެކު ދެ ވަނަ ޑިވިޝަނަށް ރެލިގޭޓްވި ކުލަބު އަލުން ފުރަތަމަ ޑިވިޝަނަށް ގެނައުމަށް މިދިޔަ އަހަރު ފެށި މަސައްކަތް ވަރުގަދަކޮށް، މި އަހަރު ވަނީ މޮޅު ކުޅުންތެރިން ހޯދަން ފަށައިފަ އެވެ.

ވިކްޓަރީގެ ޓެކްނިކަލް ޑައިރެކްޓަރު މުހައްމަދު އާދަމް ވިދާޅުވީ ރަންޔޫބީލް ފާހަގަ ކުރުމަށް އިންޑިޔާގެ ކުލަބެއް ގެނައުމަށް މަސައްކަތް ކުރަމުން އަންނަ ކަމަށެވެ. އަދި މުބާރާތް ބާއްވޭވުމަށް ފުޓްބޯޅަ ކަލަންޑަރުން ޖާގަ ހޯދުމަށް އެފްއޭއެމުން ދޭނެ ތާރީހެއް ހޯދުމަށް މަސައްކަތް ކުރަމުންދާ ކަމަށެވެ.

ވިކްޓަރީ އަކީ ރާއްޖޭގެ ފުޓްބޯޅައިގެ އެންމެ ދުވަސްވީ އަދި އެންމެ ކާމިޔާބު އެއް ކުލަބެވެ. ގިނަ ކުޅިވަރުތަކެއްގައި ވާދަކޮށް، އެތައް ކުޅުންތެރިންނެއް އުފެއްދި ކުލަބެކެވެ. ވިކްޓަރީގެ ހާއްސަ ކާމިޔާބީތަކުގެ ތެރޭގައި ގައުމީ ފުޓްބޯޅަ ތަށި ދެ ފަހަރު މިލްކުކުރުން ހިމެނެ އެވެ.