މިއަހަރު ނިމުމުގެ ކުރިން އަލަށް އިމާރާތްކުރާ ބައެއް ޕޮލިސް ސްޓޭޝަންތަކާއި ޕޯސްޓްތައް ހުޅުވޭނެ - އިމްރާން
މި ޕްރޮޖެކްޓަކީ 61 ސްޓޭޝަން ހިމެނޭ ޕްރޮޖެކްޓެއް
ހޯމް މިނިސްޓަރު އިމްރާން އަބްދުﷲ
މިއަހަރު ނިމުމުގެ ކުރިން އަލަށް އިމާރާތްކުރާ ބައެއް ޕޮލިސް ސްޓޭޝަންތަކާއި ޕޯސްޓްތައް ހުޅުވޭނެ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
ހޯމް މިނިސްޓަރު މިހެން ވިދާޅުވީ ތޮއްޑޫ ދާއިރާގެ މެންބަރު ހަސަން ޝިޔާން ކުރެއްވި ސުވާލަށް ޖަވާބުދެއްވަމުންނެވެ. މިނިސްޓަރު އިމްރާން ވިދާޅުވީ އއ. ތޮއްޑޫގައި އެޅުމަށް ހަމެޖެހިފައިވާ ޕޮލިސް ޕޯސްޓަކީ އިންދިރާ ޕްރޮޖެކްޓްގެ ދަށުން އިންޑިއާގެ އެގްޒިމް ބޭންކުގެ ފައިނޭންސުގެ ދަށުން އެޅުމަށް ހަމެޖެހިފައިވާ ޕޮލިސް ޕޯސްޓެއް ކަމަށެވެ. މި ޕްރޮޖެކްޓްގެ މަސައްކަތް ގޮސްފައިވާ ހިސާބަކީ އެގްރީމެންޓުތަކުގައި ސޮއިކުރެވި، ކުރެހުންތައް އެއްކޮށް ފައިނަލް ކުރެވި ޑިޒައިންތައް ނިންމި އަދި ރާއްޖޭގެ ފަރާތުން އެޑްވާންސައް ދައްކަންޖެހޭ ޕޭމަންޓަށް ފިނޭންސަށް ޕޭމަންޓް ހެދުމަށް ޕޯސްޓް ކުރެވިފައިވާ ކަމަށެވެ. އަދި އުއްމީދުކުރައްވަނީ މި މަސް ނިމެންވާއިރަށް ލަސްވެގެން އެޑްވާންސް ޕޭމަންޓް ޕޭ ކުރެވޭނެކަމަށެވެ.
މީގެ އިތުރުން އެގްރީމެންޓް ބުނާގޮތުން އެޑްވާންސް ޕޭމަންޑް ޕޭ ކުރާތާ 15 ދުވަސްތެރޭގައި މަސައްކަތް އަމަލީ ގޮތުން ފަށަންޖެހޭ ކަމަށެވެ. އަދި މިހާރުވަނީ އެކަމަށް ކަނޑައަޅަންޖެހޭ ބިންތައް ކަނޑައެޅިފައި ކަމަށާއި، މި ޕްރޮޖެކްޓަކީ 61 ސްޓޭޝަން ހިމެނޭ ޕްރޮޖެކްޓެއް ކަމަށެވެ. އަދި މި ޕްރޮޖެކްޓް އަމަލީގޮތުން ފަށައިގަތުމާއެކު ސްޓޭޝަނަކުން ސްޓޭޝަނަކުން ފެށިގެންދާނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ފުލުހުންގެ ސްޓޭޝަންތަކުން ދެވޭ ހިދުމަތްތަކަށް ބަލާއިރު، ޕޯސްޓެއް ނަމަ އެތަނަކުން ދެވޭނެ ހިދުމަތުގެ ގޮތުގައި ފާހަގަކުރެވެނީ ޕޯސްޓެއް ގާއިމްކުރެވިފައި ހުރި ރަށުތެރެ ބެލެހެއްޓުމަށް ޕެޓްރޯލް ކުރުން އަދި ރިޕޯޓްކުރެވޭ މައްސަލަތަކަށް އަވަސްކޮށް އިޖާބަދެވޭނެ އިންތިޒާމް ހަމަޖެއްސުމުގެ އިންތިޒާމްވެގެންދާނެ ކަމަށެވެ. ނެއިބަރުހުޑް ޕޮލިސްގެ ހިދުމަތް ދޭން ހަމަޖެއްސި އިންވެސްޓިގޭޝަން އޮފިސަރެއް ހުރެ ތަހުގީގުކުރުމުގެ މަސައްކަތް ފެށިގެންދާނެ ކަމަށެވެ.
އޭގެ އިތުރުން ފޮރެންސިކް ސަރވިސް އަދި އިތުރު ހިދުމަތްތައް ހަމަޖައްސާ އެފަދަ ކަންކަމުގެ މައްޗަށް ހަމަޖެހިގެންދާނެ މަސައްކަތްތައް ކުރިއަށްދާނެ ކަމަށެވެ. އަދި މި 4 ހިދުމަތަކީ ޕޮލިސް ޕޮސްޓަކުން ދޭނެ ހިދުމަތްތައް ކަމަށް މިނިސްޓަރު ވިދާޅުވިއެވެ.
ތޮއްޑޫގައި ޕޮލިސް ޕޯސްޓެއް ގާއިމްކުރަން ނިންމާފައިވަނީ ފުލުހުންގެ އާ ގާނޫނާ އެކުގައި ހިދުމަތްތައް ބައްޓަންކުރެވިގެންދިޔަ އިރު އެކި ސަރަހައްދުތަކުގައި އަދި ރަށްތަކުގައި ހިދުމަތްދޭނެ ގޮތާމެދު ފުޅާ ދާއިރާއެއްގައި ފުލުހުން ތިބި މިންވަރަށް ބެލުމަށްފަހުގައި ރަށެއްގައި ގާއިމްކުރާނީ ކޮންކަހަލަތަނެއްތޯ ކަނޑައަޅެޅުމަށްފަހުގައި ކަމަށެވެ.
