ޖަލުތަކުގައި ލާއިންސާނީ އަނިޔާ ލިބިފައިވާ ގައިދީންގެ ފުރަތަމަ އަޑުއެހުން މިމަހުގެ 25 ގައި
14 ފެބުރުއަރީ 2023 | އަންގާރަ 02:14ފުރަތަމަ އަޑުއެހުން ކުރިޔަށްދާނީ ފެބްރުއަރީ 10ން މަރޗް 5ށް މާފުށީ ޖަލުގައި
މާފުށި ޖަލު
ރާއްޖޭގެ ޖަލުތަކުގައި ގައިދީންނަށް ދީފައިވާ ލާއިންސާނީ އަނިޔާތަކާއި ގުޅޭގޮތުން ބާއްވާ ފުރަތަމަ އަޑުއެހުން މި ފެބްރުއަރީ މަހުގެ 25 ވަނަ ދުވަހުން ފެށިގެން 10 ދުވަސްވަންދެން ކުރިޔަށްދާނެ ކަމަށް އިންތިގާލީ އިންސާފުގެ އޮމްބަޑްސްޕާސަން އޮފީހުން ބުނެފިއެވެ.
މި އަޑުއެހުންތަކާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން އިންތިގާލީ އިންސާފުގެ އޮމްބަޑްސްޕާސަން އޮފީހުގެ ބިޔުރޯ އެގްޒެކެޓިވް މުހައްމަދު ސަރާހު ވިދާޅުވީ ގައިދީންނަށް އަމާޒުކޮށްގެން ކުރިޔަށްގެންދާ އަޑުއެހުންތައް ކުރިޔަށްދާނީ ދެބަޔަކަށް ބަހާލައިގެންކަމަށެވެ. ފުރަތަމަ އަޑުއެހުން މާފުށީ ޖަލުގައި ކުރިޔަށްގެންދާއިރު ދެވަނަ އަޑުއެހުން ކުރިޔަށްގެންދާނީ މާލޭ ޖަލުގައެވެ.
ފުރަތަމަ އަޑުއެހުން ކުރިޔަށްދާނީ ފެބްރުއަރީ 10ން މަރޗް 5ށް މާފުށީ ޖަލުގައެވެ. މިއަޑުއެހުންތަކަކީ އާންމުކޮށް ހުޅުވާނުލާ ކުރިޔަށްގެންދާ އަޑުއެހުންތަކެކެވެ. އަދި މިއަޑުއެހުންތަކުގައި ގައިދީން ދައްކާ ވާހަކަތަކަކީ ސިއްރު ހިފެހެއްޓޭނެ ވާހަކަތަކެއް ކަމަށް ސަރާހު ވިދާޅުވިއެވެ.
މާފުށީ ޖަލުގައި ކުރިޔަށްގެންދިޔުމަށް ހަމަޖެހިފައިވާ އަޑުއެހުމާއި ގުޅޭގޮތުން ސަރާހު ވިދާޅުވީ އެއަޑުއެހުމުގައި ބައިވެރިވާން ބޭނުންވާ ގައިދީންނަށް އެފުރުސަތު ނޮވެމްބަރު މަހު ހުޅުވާލިކަމަށެވެ. އެކަމަށް އެދި 149 ގައިދީއަކު ޝައުގުވެރިކަން ފާޅުކޮށްފައިވާއިރު މިއަޑުއެހުންތަކުގައި ބައިވެރިކުރަނީ އޭގެތެރެއިން 39 ގައިދީއެއްކަމަށް ސަރާހު ވިދާޅުވިއެވެ. އެއީ ކަނޑައަޅާފައިވާ މެންޑޭޓަށް ފެތޭ ބައިވެރިންކަމަށް ސަރާހު ވިދާޅުވިއެވެ.
މިއަޑުއެހުންތައް ކުރިޔަށްގެންދާއިރު ގައިދީންނަށް ނަފްސާނީ ގޮތުން ދިމާވެދާނެ ކަންކަމަށްވެސް ތައްޔާރަށް އޮތްކަމަށް ސަރާހު ވިދާޅުވިއެވެ. އެގޮތުން ކުރީބައިގައި މައުލޫމާތު ދިނުމުގެ ސެޝަންތަކެއްވެސް ކުރިޔަށްގެންދެވިފައިވާކަމަށް ވިދާޅުވިއެވެ.
އަޑުއެހުންތައް ކުރިޔަށްދާ ގޮތާއި ގުޅޭގޮތުން ޕްރޮގްރާމްގައި ވާހަކަދައްކަވަމުން އެއޮފީހުގެ ޑިރެކްޓަރ ޖެނެރަލް އާރިޒާ ރަޝީދު ވިދާޅުވީ އަޑުއެހުންތަކުގައި ގައިދީންނަށް ލިބިފައިވާ އަނިޔާތަކާއި ގުޅޭގޮތުން ބަޔާންތައް ނަގާއިރު އެކަންކަމުގައި ޝާމިލުފާ އިތުރު ފަރާތްތައް ތިބިނަމަ އެފަރާތްތަކުގެ މައްސަލަތައްވެސް ބަލާނެކަަމަށެވެ. މައްސަލަތައް ބެލިގެންދާނީ ވިކްޓިމް އެޕްރޯޗަކުން ކަމަށް އާރިޒާ ވިދާޅުވިއެވެ.
މިއަޑުއެހުންތައް ބޭއްވުމުގެ މައިގަނޑު މަގްސަދަކީ މިފަދަ މައްސަލަތަކުގެ ހަގީގަތް ދެނެގަނެ މައްސަލަތައް ހިނގާ ސަބަބުތަކާއި އަމަލުތައް ދެނެގަނެ ހިނގާ ޒާތާއި ފުޅާމިން ދެނެގަތުންކަމަށް ސަރާހު ވިދާޅުވިއެވެ.
އަދި ރާއްޖޭގެ ޖަލުތަކުގައި އަމަލުކުރަމުންދަނީ ހެދިފައިވާ ގާނޫނުތަކާއި ގަވާއިދުތަކާއި ރާއްޖެއިން ބައިވެރިވެފައިވާ ބައިނަލްއަގްވާމީ މުއާހަދާތަކާއި އެއްގޮތަށްތޯ ބަލާނެކަމަށް ސަރާހު ވިދާޅުވިއެވެ.
މިއަޑުއެހުންތައް ނިންމާލުމަށްފަހު ރިޕޯޓެއް ތައްޔާރުކުރެވޭނެކަމަށާއި ރިޕޯޓާއެކު ޑޮކިޔުމެންޓްރީއެއްވެސް ތައްޔާރުކުރެވިގެންދާނެކަމަށް ސަރާހު ވިދާޅުވިއެވެ. ރިޕޯޓްގައި ދައުލަތުގެ އިދާރާތަކަށް ދެން އަމަލުކުރަންވީ ގޮތާއި ކަންކަން އިސްލާހުކުރަންވީ ގޮތާއި ގުޅޭގޮތުން ޚިޔާލުތައް ކަމާބެހޭ އިދާރާތަކަށް އަރުވާނެކަމަށް ވިދާޅުވިއެވެ.
މާލޭ ޖަލުގައި އަޑުއެހުން ބާއްވާނެ ތާރީޚެއް ފަހުން އިއުލާންކުރެވޭނެކަމަށް އެއޮފީހުން ބުނެއެވެ.
އިންތިޤާލީ އިންސާފުގެ އޮމްބަޑްސްޕަރސަންގެ އޮފީހަކީ، އިންތިޤާލީ އިންސާފުގެ ޤާނޫނުން ވުޖޫދުވެފައިވާ އޮފީހެކެވެ. މި ގާނޫނަކީ 1953 ޖަނަވަރީ 1 އިން ފެށިގެން 2018 ނޮވެންބަރު 17 އާ ދެމެދު ހިނގާދިޔަ މުއްދަތުގެ ތެރޭގައި ނިޒާމީ ސިފައެއްގައި ރޭވިގެން، ދައުލަތުގެ މުއައްސަސާއަކުން ނުވަތަ އެއިން ތަނެއްގެ އިސް ހިންގުންތެރިއަކު، ރައްޔިތުންގެ އިންސާނީ ޙައްޤުތަކާއި އަސާސީ މިނިވަންކަމާ ޚިލާފަށް ހިންގާފައިވާ ޢަމަލުތައް ބަލައި، ތަޙްޤީޤުކޮށް، ޙަޤީޤަތް ހާމަކޮށް، އެފަދަ ކަންކަމުގެ ސަބަބުން އަނިޔާ ލިބިފައިވާ ފަރާތްތަކަށް މި ޤާނޫނުގެ ދަށުން ފޯރުކޮށްދޭ ޙައްލުތައް މެދުވެރިކޮށް އިންސާފު ހޯދައިދިނުމުގެ ނިޒާމެއް އެކަށައެޅުމުގެ ޤާނޫނެވެ.
މިއޮފީހަށް އަމިއްލަ ނަމުގައި ދަޢުވާކުރުމާއި، ދަޢުވާ ލިބިގަތުމުގެ ބާރު ލިބިފައިވާ، އަމިއްލަ ނަމުގައި މުޢާމަލާތުކުރުމުގެ ހައިސިއްޔަތު ލިބިފައިވާ އަދި ވަކި ސިއްކައެއް އޮންނަ މުސްތަޤިއްލު ޤާނޫނީ ޝަޚްޞެކެވެ. އޮމްބަޑްސްޕަރސަންގެ އޮފީހުން މަސައްކަތްކުރަން ވާނީ، މިނިވަންކަމާއި މުސްތަޤިއްލުކަމާއެކު، ތަޢައްޞުބުން އެއްކިބާވެތިބެ، މި ޤާނޫނުގެ މަޤްޞަދުތައް ހާސިލުވާނެ ގޮތުގެމަތިންކަމުގައި ޤާނޫނުގައި ބަޔާންކޮށްފައިވެއެވެ.
