ބަޔާން މެޗުގެ ކުރިން އެމްބާޕޭ ޕީއެސްޖީގެ ފަރިތަކުރުންތަކަށް
14 ފެބުރުއަރީ 2023 | އަންގާރަ 02:17އެމްބާޕޭގެ އިތުރުން މެސީ އާއި ވެރާޓީ ވަނީ މެޗުގެ ސްކޮޑުގައި ހިމަނާފައި
ޕީއެސްޖީން ކުރިއަށް ގެންދިޔަ ފަރިތަކުރުމުގައި މެސީ
ޔުއެފާ ޗެމްޕިއަންސް ލީގުގެ ގަދަ 16 ގައި ބަޔާން މިއުނިކާ ދެކޮޅަށް ނުކުންނަ މެޗުގެ ކުރިން ޕެރިސް ސެއިންޓް ޖާމަން (ޕީއެސްޖީން) ކުރިއަށް ގެންދިޔަ ފަރިތަކުރުންތަކުގައި ކީލިއަން އެމްބާޕޭ ބައިވެރިވެއްޖެ އެވެ.
އެމްބާޕޭ އަށް އަނިޔާވެފައި ވަނީ ފްރާންސް ލީގުގައި ޕީއެސްޖީން މޮންޓްޕެލިއޭއާ ދެކޮޅަށް ކުޅުނު މެޗުގަ އެވެ. އަނިޔާ އަށް ފަހު ޕީއެސްޖީން ކުރިއަށްގެންދިޔަ މެޑިކަލް ޓެސްޓުތަކަށްފަހު ބުނީ އެމްބާޕޭ ކުޅުމާ ދުރުގައި ތިން ހަފްތާ ވަންދެން ހުންނަން ޖެހޭނެ ކަމަށެވެ. އެމްބާޕޭ އަށް ލިބުނީ ފައިގެ ކުޑަކަޅުވާ މަސްގަނޑުގެ އަނިޔާއެކެވެ. އަނިޔާގެ ސަބަބުން މަސްގަނޑުގެ ޓިޝޫތަކަށް ވެސް ވަނީ ގެއްލުން ލިބިފަ އެވެ. އެއާއެކު އެމްބާޕޭ ކުޅުމާ ދުރުގައި ހުންނަން ޖެހުނުއިރު، ބަޔާނާ ދެކޮޅަށް ކުޅޭ މެޗު ގެއްލިދާނެ ކަމުގެ ބިރު އޮތީ ބޮޑުވެފަ އެވެ. އެއާއެކު ޕީއެސްޖީ އަށް ވަނީ ބޮޑު ނުތަވަނަސްކަމެއް ވެސް ކުރިމަތިވެފަ އެވެ.
އަންގާރަ ދުވަހުގެ ރޭ ދަންވަރު ބަޔާނާ ދެކޮޅަށް ކުޅޭ މެޗުގެ ކުރިން، ހޯމަ ދުވަހު ޕީއެސްޖީން ކުރިއަށް ގެންދިޔަ ފަރިތަކުރުންތަކުގައި އެމްބާޕޭ ވަނީ ބައިވެރިވެފަ އެވެ. މީގެ އިތުރުން އަނިޔާގެ ސަބަބުން މޮނާކޯއާ ދެކޮޅަށް ނުކުޅެވުނު ލިއޮނަލް މެސީ ވެސް ވަނީ ފަރިތަކުރުންތަކުގައި ބައިވެރިވެފަ އެވެ. ބަޔާން މެޗަށް ޕީއެސްޖީން އެކުލަވާލި ސްކޮޑުގައި މި ދެ ކުޅުންތެރިންގެ އިތުރުން މާކޯ ވެރާޓީ ވެސް ވަނީ ހިމަނައިފަ އެވެ.
ގަދަ 16 ގައި އަމިއްލަ ދަނޑުގައި ޕީއެސްޖީން ބަޔާނާ ދެކޮޅަށް ނުކުންނާނީ އަންގާރަ ދުވަހުގެ ރޭ ރާއްޖެ ގަޑިން އެކެއް ޖަހާއިރު އެވެ.
