ހައްޖު ކޯޓާ އިތުރަށް ހޯދުމުގެ މަސައްކަތް ދަނީ ކުރަމުން - އިސްލާމިކް މިނިސްޓަރު
މިއަހަރު ކޯޓާ އިތުރަށް ލިބިގެންދާނެކަމަށް ބެލެވޭ
ދިވެހި ހައްޖުވެރިން
ހައްޖަށް މީހުން ގެންދިއުމަށް ލިބިފައިވާ ކޯޓާ އިތުރުކުރުމުގެ މަސައްކަތް ކުރަމުންދާ ކަމަށް އިސްލާމިކް މިނިސްޓަރު ޑރ. އަހުމަދު ޒާހިރު އަލީ ވިދާޅުވެއްޖެއެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ނައިފަރު ދާއިރާގެ މެންބަރު އަހުމަދު ޝިޔާމް ކުރެއްވި ސުވާލަށް ޖަވާބުދެއްވަމުން މިނިސްޓަރު ޑރ. އަހުމަދު ޒާހިރު އަލީ ވިދާޅުވީ ހައްޖަށްދާން ބޭނުންވާ މީހުންގެ ވަރަށް ބޮޑު ލިސްޓެއް ހައްޖު ކޯޕަރޭޝަންގައި އެބައޮތް ކަމަށެވެ. ފައިސާ ދެއްކި ފަރާތްތައް ކިއުގައި އެބަހުރި ކަމަށާއި، ކޮވިޑާއި ގުޅިގެން މީހުން ހައްޖަށް ނުގެންދެވޭތާ 2 އަހަރު ދުވަސްވެއްޖެ ކަމަށެވެ.
އަދި އެންމެ ފަހުން ފުރުސަތު ލިބުނު ފަހަރުވެސް ލިބިވަޑައިގެންނެވީ 400 ޖާގަ ކަމަށާއި، އެހެންކަމުން އެ ލިސްޓުގައި ތިބި ފަރާތްތައް ވަރަށް ބޮޑަށް ފަހަތަށް ހިނގައްޖެ ކަމަށެވެ.
މިނިސްޓަރު ވިދާޅުވީ ކޯޓާ އިތުރަށް ލިބިއްޖެނަމަ އެ ލިސްޓު ވަރަށް އަވަހަށް ނިމިގެންދާނެ ކަމަށެވެ. އަދި ސަރުކާރުން މަސައްކަތް ކުރަމުންދަނީ މިއަހަރަށް ކަނޑައަޅާފައިވާ ކޯޓާ އިތުރުކުރެވޭތޯ ކަމަށާއި، ރައީސް އިބްރާހީމް މުހައްމަދު ޞާލިހު އެ މަސައްކަތް ކުރައްވާ ކަމަށެވެ. މިނިސްޓަރު ވިދާޅުވީ އުއްމީދުކުރައްވަނީ ކޯޓާ އިތުރުވެގެންދާނެ ކަމަށެވެ.
ކޮވިޑް-19 ގެ ހާލަތުގެ ކުރިން ހައްޖުވެރިން ހައްޖުވުމަށް ފުރުސަތުދިން އަދަދަށް މިއަހަރު ފުރުސަތު ދޭނެކަން ސައުދީ ސަރުކާރުން ވަނީ ހާމަކޮށްފައެވެ. ސައުދީގެ މިނިސްޓަރ އޮފް ހައްޖު އެންޑް އުމްރާ ޑރ. ތައުފީގް އަލް ރަބީއާ ވަނީ 3 އަހަރަށްފަހު ލުއިތަކެއް ދޭން ނިންމަވާފައިވާކަން އިއުލާންކުރައްވާފައެވެ.
އޭނާ ވިދާޅުވީ މިއަހަރުގެ ހައްޖުގެ އަޅުކަމަށް ދުނިޔޭގެ އެކި ކަންކޮޅުތަކުން ހައްޖަށް މީހުން ފޮނުވުމުގެ ހުއްދަ އޮތް މިޝަންތަކަށް ފުރުސަތު ދެވިގެންދާނެ ކަމަށެވެ. އަދި ކޮވިޑްގެ ކުރިން ދިން އަދަދަށް ފުރުސަތު ދެވިގެންދާނެ ކަމަށާއި، ހުރިހާ އުމުރުފުރާއެއްގެ މީހުންނަށް ވެސް ފުރުސަތު ދޭން ނިންމަވާފައިވާކަމަށެވެ.
ޑރ. ތައުފީގު ވިދާޅުވީ ހައްޖުވެރިންނަށް ރަނގަޅު ތަޖުރިބާއެއް ހޯދައިދިނުމަށް ގިނަ މަސައްކަތްތަކެއް ކޮށްފައިވާނެ ކަމަށެވެ. މިގޮތުން ވިސާގެ މުއްދަތު 30 ދުވަހުން 90 ދުވަހަށް އިތުރުކޮށްފައިވާކަމަށާއި އިތުރު ފެސިލިޓީތައް ގާއިމްކުރުމުގެ މަސައްކަތް ކުރަމުންދާކަމަށް އޭނާ ވިދާޅުވިއެވެ.
ކޮވިޑް-19ގެ ކުރިން 2019 ވަނަ އަހަރުގެ ހައްޖުގެ އަޅުކަމުގައި 2.5 މިލިއަން މުސްލިމުން ބައިވެރިވެފައިވެއެވެ. 2009 ވަނަ އަހަރުން 2019 ވަނަ އަހަރުގެ ނިޔަލަށް ސައުދީ ސަރުކާރުން ވަނީ އެވަރޭޖްކޮށް 2.3 މިލިއަން މުސްލިމުންނަށް ހައްޖުގެ އަޅުކަން އަދާކުރުމަށް ފުރުސަތު ދީފައެވެ.
