ނޭޓޯގެ ސެކްރެޓަރީ ޖެނެރަލް ސްޓޮލްޓެންބަރގް ދައުރު އިތުރުނުކުރައްވާނެ: ތަރުޖާމާން

ނޭޓޯގެ ސެކްރެޓަރީ ޖެނެރަލް, ޖެންސް ސްޓޮލްޓެންބަރގް, އޮކްޓޯބަރު މަހު ރާވާފައިވާ ގޮތަށް ދައުރު ނިންމާލައްވާނެ ކަމަށް އެ އިއްތިހާދުގެ ތަރުޖަމާނު، އޮއާނާ ލުންގެސްކޫ ވިދާޅުވެއްޖެއެވެ.

ސްޓޮލްޓެންބަރގްގެ މެންޑޭޓް ތިން ފަހަރު އިތުރުކޮށްފައިވާއިރު، އޭނާ ވަނީ ޖުމްލަ ގާތްގަނޑަކަށް ނުވަ އަހަރު ދުވަހު ޚިދުމަތް ކުރައްވާފައިކަން ފާހަގަކުރައްވާ ވާހަކަދައްކަވަމުން އޮއާނާ ވަނީ މިއަހަރުގެ އޮކްޓޫބަރު މަހު ސްޓޮލްޓެންބަރގްގެ ދައުރު ހަމަވުމުން އިތުރު ދައުރެއް އޭނާ ނުހޯއްދަވާނެ ކަމަށް ވިދާޅުވެފައެވެ.

ނޭޓޯގެ ތަރުޖަމާން މިކަން ހާމަކުރައްވާފައި މިވަނީ ޔޫކްރެއިން ރަޝީއާ ހަނގުރާމައާ ގުޅިގެން ކުރަމުންދާ މަސައްކަތްތަކާ ގުޅިގެން ސްޓޮލްޓެންބަރގްގެ ދައުރު އިތުރުކުރާނެ ކަމުގެ ޚަބަރުތައް ފެތުރިފައި ވަނިކޮށެވެ.

ސްޓޮލްޓެންބަރގް އަކީ އިގުތިސާދީ މާހިރެކެވެ. އަދި އޭނާ އަކީ ނޯވޭގެ ލޭބަރ ޕާޓީގެ ލީޑަރުކަންވެސް ކުރައްވާފައިވާ ބޭފުޅެކެވެ. ސްޓޮލްޓެންބަރގް ވަނީ 2000 ވަނަ އަހަރުން 2001 ވަނަ އަހަރަށް އަދި 2005 ވަނަ އަހަރުން 2013 ވަނަ އަހަރަށް ނޯވޭގެ ބޮޑުވަޒީރުކަންވެސް ކުރައްވާފައެވެ. އަދި އެއަށްފަހު ޖެހިގެން އައި އަހަރު އޭނާ ނޭޓޯގެ ސެކްރެޓަރީ ޖެނެރަލްގެ މަގާމާ ހަވާލުވެވަޑައިގެންނެވިއެވެ.

އޭގެ ކުރިން ސްޓޮލްޓެންބަރގް ވަނީ ނޯވޭގެ ފައިނޭންސް މިނިސްޓަރު ކަމާއި އެނާޖީ މިނިސްޓަރުކަން ވެސް ކުރައްވާފައެވެ.

ނޭޓޯގެ މެމްބަރުން ބޭނުން ވަނީ އެއިއްތިހާދުގެ 75 ވަނަ އަހަރީ ދުވަހުގެ ސަމިޓްގެ ޗެއަރކަން ކުރެއްވުމުގެ ފުރުސަތު ސްޓޮލްޓެންބަރގް އަށް ދިނުމަށް ކަމަށް ރިޕޯޓުތައް ބުނެއެވެ. އެ ސަމިޓް ބާއްވަން ހެމަޖެހިފައި ވަނީ 2024 ވަނަ އަހަރުގެ އޭޕްރިލް މަހުއެވެ.

ސްޓޮލްޓެންބަރގް އަށް ފަހު ދެން އެމަގާމާ ހަވާލުވެވަޑައިގަންނަވާނީ ކޮން ބޭފުޅެއްކަމެއް އަދި ނިންމަވާފައި ނެތްނަމަވެސް، ސްޕެއިންގެ ބޮޑުވަޒީރު ޕެޑްރޯ ސަންޗޭޒް އާއި އިނގިރޭސި ޑިފެންސް ސެކްރެޓަރީ ބެން ވަލެކް އެއީ މިމަގާމަށް ވާދަކުރައްވާ ދެ ކެނޑިޑޭޓުން ކަމަށް ރޮއިޓަރސް އިން ވަނީ ރިޕޯޓުކޮށްފައެވެ.