ގައުމީ ޓީމުގެ ފޯވާޑް އިބްރާހީމް މަހުދީ (ފޭދޫ އިއްބެ) ކްލަބް އީގަލްސްއަށް ސޮއިކޮށްފިއެވެ.
މިދިޔަ ސީޒަންގައި މާޒިޔާއަށް ކުޅުނު އިއްބެ އީގަލްސްއާއެކު ސޮއިކުރީ ތިން އަހަރުގެ އެއްބަސްވުމެއްގައެވެ. ފޭދޫ އިއްބެ ފުރަތަމަ ޑިވިޝަންގެ ފުޓްބޯޅައަށް ތައާރަފްވީ ޓީސީންނެވެ. ޓީސީގައި މޮޅަށް ކުޅެ ލީގު ހޯދި ޓީމްގައި ހިމެނުނެވެ. ޓީސީ ދޫކޮށް މާޒިޔާއަށް ބަދަލުވުމަށްފަހު އެޓީމުގައިވެސް ފޭދޫ އިއްބެ ތަފާތު ދެއްކިއެވެ. އެކަމަކު މާޒިޔާގެ ސްކޮޑް ވަރުގަދަވުމުން، ގަވާއިދުން ކޮންމެ މެޗެއްގެ ފުރަތަމަ އެގާރައިގެ ޖާގަ ހޯދުމުގައި ހުރަސްތައް ކުރިމަތިވިއެވެ. މާޒިޔާއިން މުހިއްމު ކުޅުންތެރިންގެ އެއްބަސްވުން އާކުރިއިރު އިއްބެ ހިމެނުނީ ކްލަބްގައި މަޑުނުކުރި ކުޅުންތެރިންގެ ތެރޭގައެވެ.
ފޭދޫ އިއްބެ އީގަލްސްއަށް ސޮއިކުރިއިރު, އީގަލްސްގެ ޒުވާން ފޯވާޑް ހަންނަ ވަނީ މާޒިޔާއަށް ބަދަލުވެފައެވެ. ގައުމީ ޓީމުގައިވެސް ހިމެނޭ ހަންނަގެ އިތުރުން ހުސައިން ޝިފާއު ޔޫސުފާއި, އަހުމަދު ނުއުމާންވެސް ވަނީ އީގަލްސް ދޫކޮށް މާޒިޔާއަށް ބަދަލުވެފައެވެ. އެކަމަކު އީގަލްސްއިންވެސް ވަނީ ރަނގަޅު އެވްރެޖް ސްކޮޑެއް އެކުލަވާލާފައެވެ. ކޯޗަކީ އިހުސާން އަބްދުލްޣަނީ (ސާންތި)އެވެ.
