ކުލަބް ވޯލްޑް ކަޕްގެ ފައިނަލަކީ ރެއާލަށް ސީޒަންގެ ޓާނިން ޕޮއިންޓް: އަންޗެލޮޓީ
11 ފެބުރުއަރީ 2023 | ހޮނިހިރު 06:37އަންޗެލޮޓީ ބުނީ ފައިނަލް މެޗު ކާމިޔާބުކޮށް ރެއާލަށް ތަށި އުފުލާލެވިއްޖެ ނަމަ، އެއީ ސީޒަންގެ ބާކީ ބަޔަށް ލިބޭނެ ވަރަށް ބޮޑު ހިތްވަރެއް ކަމަށް
ރެއާލް އިން ކުރިއަށް ގެންދިޔަ ފަރިތަކުރުމުގައި ކޯޗު އަންޗެލޮޓީ
ފީފާ ކުލަބް ވޯލްޑް ކަޕްގެ ފައިނަލަކީ ރެއާލް މެޑްރިޑަށް ސީޒަންގެ ޓާނިން ޕޮއިންޓު ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފި އެވެ.
އަންޗެލޮޓީ މިހެން ބުނީ ކުލަބް ވޯލްޑް ކަޕްގެ ފައިނަލްގައި ސައުދީ އަރަބިޔާގެ އަލް ޙިލާލާ ދެކޮޅަށް ކުޅޭ މެޗުގެ ކުރިން އޮތް ޕްރެސް ކޮންފަރެންސްގަ އެވެ. އަންޗެލޮޓީ ބުނީ މިހާރު ކުރިއަށްދާ ސީޒަނަކީ ރެއާލަށް ވަރަށް އުނދަގޫ ސީޒަނެއް ކަމަށާއި، ޚާއްސަކޮށް ޓީމުގައި އަނިޔާގެ މައްސަލަތަކެއް ހުރުމުން ސީޒަން ދަނީ އުނދަގޫ ގޮތަކަށް ކަމަށެވެ. އަންޗެލޮޓީ ބުނީ ފައިނަލް މެޗު ކާމިޔާބުކޮށް ރެއާލަށް ތަށި އުފުލާލެވިއްޖެ ނަމަ، އެއީ ސީޒަންގެ ބާކީ ބަޔަށް ލިބޭނެ ވަރަށް ބޮޑު ހިތްވަރެއް ކަމަށެވެ. އޭނާ ބުނީ އެކަމުގެ ސަބަބުން ސްޕެނިޝް ލީގާއު، ޔުއެފާ ޗެމްޕިއަންސް ލީގު އަދި ކޮޕަ ޑެލް ރޭ މުބާރާތުގައި ކުޅުމަށް ކުޅުންތެރިންނަށް އިތުރު "ބޫސްޓެއް" ލިބޭނެ ކަމަށެވެ.
މީގެ އިތުރުން އަންޗެލޮޓީ ބުނީ ސެމީ ފައިނަލްގައި އަލް އަހްލީއާ ދެކޮޅަށް ނުކުޅެވުނު ނަމަވެސް، ފައިނަލްގައި ކުޅެވޭ ވަރަށް ކެޕްޓަން ކަރީމް ބެންޒެމާ އާއި ޑިފެންޑަރު އެޑާ މިލިޓާއޯ ފިޓުވެއްޖެ ކަމަށެވެ. އޭނާ ބުނީ އެ ދެ ކުޅުންތެރިން ވެސް ފަރިތަކުރުންތަކުގައި ބައިވެރިވެފައިވާ ކަމަށާއި، ފައިނަލްގެ ފުރަތަމަ 11 ގައި ފެންނާނެ ވަރުވާނެ ކަމަށެވެ. އިތުރަށް އަންޗެލޮޓީ ބުނީ އަލް ޙިލާލްގެ ކޯޗު ރާމޯން ޑިއާޒް އަކީ މޮޅަށް ކުޅުނު ފޯވާާޑެއް ކަމަށެވެ. އަންޗެލޮޓީ ބުނީ ޑިއާޒް އޭނާ ކުޅުނު ކޮންމެ ޓީމެއްގައި ވެސް ވަނީ އުފާވެރި ހަނދާންތަކެއް ދޫކޮށްފައި ކަމަށާއި، މިއީ ކޯޗެއްގެ ގޮތުގައި ދެމީހުންގެ ކުރިމަތިލުމެއް ފެންނަ ފުރަތަމަ ފަހަރު ކަމަށެވެ. އަންޗެލޮޓީ ބުނީ ޑިއާޒް އަށް އޭނާ ވަރަށް ބޮޑަށް އިހުތިރާމް ކުރާ ކަމަށާއި، އަބަދު ވެސް އެކަން އެގޮތުގައި އޮންނާނެ ކަމަށެވެ.
މިއަހަރުގެ ފީފާ ކުލަބް ވޯލްޑް ކަޕްގެ ފައިނަލްގައި އަލް ޙިލާލާ ދެކޮޅަށް ރެއާލުން ނިކުންނާނީ ހޮނިހިރު ދުވަހުގެ ރޭ ރާއްޖެ ގަޑިން 12 ޖަހާއިރު އެވެ.
