އިންޓަރނޭޝަނަލް ފަންޑް ފޯރ އެގްރިކަލްޗަރަލް ޑިވެލޮޕްމަންޓް (އިފާޑު) އާ ދިވެހި ސަރުކާރު ގުޅިގެން ފިޝަރީޒް މިނިސްޓްރީން ކުރިޔަށްގެންދާ "މޯލްޑިވްސް އެގްރިބިޒްނަސް ޕްރޮގްރާމް" ގެ ދަށުން ރަޖިސްޓްރީވާން ބޭނުންވާ ފަރާތްތަކަށް އެކަމުގެ ފުރުސަތު ހުޅުވާލައިފިއެވެ.
މި ޕްރޮގްރާމް އަމާޒުކޮށްފައިވަނީ އެންމެ އުތުރުގެ ތިން އަތޮޅުކަމުގައިވާ ހއ ، ހދ، އަދި ށ އަތޮޅުގެ 26 ރަށަކަށެވެ. މި ޕްރޮގްރާމަކީ ދަނޑުވެރިކަމުގައި ބޭނުންކުރާ ޒަމާނީ ޓެކްނޮލޮޖީ ބޭނުންކޮށްގެން ތިމާވެއްޓާއި ރައްޓެހި އަދި ދެމެހެއްޓެނެވި ދަނޑުވެރިކަން ކުރެވޭނެ ގޮތްތައް ދަނޑުވެރިންނަށް ތަޢާރަފްކޮށްދިނުމުގެ މަގްސަދުގައި ހިންގޭ ޕްރޮގްރާމެކެވެ. އަދި މިޕްރޮގްރާމްގެ އެއް މަގްސަދަކީ ދަނޑުވެރިންނާއި ވިޔަފާރިވެރިން ގުޅުވައިދީ ވިޔަފާރީގެ ގޮތުން ގުޅުން ދެމެހެއްޓެނެވި ގޮތެއްގައި ގާއިމުކޮށްދިނުމެވެ.
މި ޕްރޮޖެކްޓްގެ ދަށުން ދަނޑުވެރިކަމުގެ ވިޔަފާރިވެރިންގެ ރަޖިސްޓްރީއެއް އެކުލަވާލަން ވަނީ ހަމަޖެހިފައެވެ. ފިޝަރީޒް މިނިސްޓްރީން ބުނީ މިރަޖިސްޓްރީގެ ޒަރީޢާއިން ރާއްޖޭގައި ދަނޑުވެރިކަމުގެ ވިޔަފާރީގައި ހަރަކާތްތެރިވާ ފަރާތްތަކުގެ ޑޭޓާ ބޭސް އެއް ގާއިމުކުރެވިގެންދާނެކަމަށެވެ. އަދި ޕްރޮޖެކްޓްގެ ތެރެއިން ދަނޑުވެރި ވިޔަފާރިތަކުގެ ރަޖިސްޓްރީގެ އަލީގައި ދަނޑުވެރިންނާއި ވިޔަފާރިވެރިން ގުޅުވައިދެވި ވިޔަފާރީގެ މުއާމަލާތު ކުރެވޭނެ ޕްލެޓް ފޯމެއް ގާއިމުކުރެވިގެންދާނެ ކަމަށް ބުނެފައި ވެއެވެ.
އެހެންކަމުން މިޑާޓާ ބޭސްގައި ރަޖިސްޓްރީވާން ބޭނުންވާ ފަރާތްތަކަށް އެފުރުސަތު ހުޅުވާލާފައިވާކަމަށް ފިޝަރީޒް މިނިސްޓްރީން ބުނެއެވެ.
