އަމީނީ މަގުގެ ހަތަރުވަނަ ސެގްމަންޓުގެ މަސައްކަތް ފަށައިފި
10 ފެބުރުއަރީ 2023 | ހުކުރު 08:19މިހާރު ލަފާ ކުރާ ގޮތުގައި މި މަޝްރޫއުގެ މަސައްކަތް ނިމޭނީ އަންނަ ސެޕްޓެމްބަރު މަހު
އަމީނީ މަގުގެ މަސައްކަތް ކުރިއަށްދަނީ
އަމީނީ މަގު ޒަމާނީ ފެންވަރަށް ތަރައްގީކުރުމުގެ މަޝްރޫއުގެ ދަށުން, ތިން ސެގްމަންޓުގައި ތާރު އެޅުން ފިޔަވައި އެހެން ހުރިހާ މަސައްކަތެއް ނިންމައި، ހަތަރުވަނަ ސެގްމަންޓުގެ މަސައްކަތް ފަށައިފިއެވެ.
އާރުޑީސީން ވަނީ މި ސެގްމަންޓުގެ މަސައްކަތް ކުރިއަށްގެންދިއުމަށް ސިނަމާލެ ފްލެޓުތަކާ ހިސާބަށް މަގު ބަންދުކޮށްފައެވެ. ނަމަވެސް ފުރަތަމަ ތިން ސެގްމަންޓުގެ މަސައްކަތް ނިމިފައިވާތީ އެ ސަރަހައްދުވަނީ ހުޅުވާލައިފައެވެ.
އެ ކުންފުނިން ބުނި ގޮތުގައި މި މަޝްރޫއުގެ ދަށުން މިހާރު ކުރިއަށްދަނީ ހަތަރުވަނަ ސެގްމަންޓުގެ ފެނާއި ނަރުދަމާ އެޅުމުގެ މަސައްކަތެވެ.
އަމީނީ މަގަކީ ކާރުބާރު ބޮޑު މަގަކަށްވުމާ ގުޅިގެން އާރުޑީސީން އެ މަގުގެ މަސައްކަތް ކުރަމުން އަންނަނީ ސެގްމަންޓުތަކަށް ބަހާލައިގެންނެވެ. އެގޮތުން، ކޮންމެ ސެގްމަންޓެއްގައި ވެސް ތާރު އެޅުން ނޫން ހުރިހާ މަސައްކަތެއް ނިންމުމަށްފަހު އެ ސެގްމަންޓުތައް ހުޅުވަމުން ގެންދާނެއެވެ. އެ މަގުގައި ތާރު އެޅުމުގެ މަސައްކަތް ފަށާނީ މިހާރު ކުރިއަށްދާ ސެގްމަންޓުތަކުގެ ތެރެއިން ބިލަބޮންގ ހައި އިންޓަނޭޝަނަލް ސްކޫލާ ހަމައަށް ހުރި ސެގްމަންޓުތަކުގެ މަސައްކަތް ނިމުމުންނެވެ. އެގޮތުން އަންނަ މާޗު މަހު ނުވަތަ އޭޕްރިލް މަހުގެ ކުރީކޮޅު، ފުރަތަމަ ބައިގައި ތާރު އަޅަން ފެށޭވަރު ވާނެ ކަމަށް އާރުޑީސީން ވަނީ މީގެ ކުރިން ލަފާކޮށްފައެވެ.
މި މަޝްރޫއުގެ ދަށުން ތާރު އެޅުމަށް ބޭނުންވާ ހުރިހާ ސާމާނެއް ވެސް އާރުޑީސީން މިހާރު ވަނީ މާލެ ގެނެސްފައެވެ.
ޕްލޭނިންގ މިނިސްޓަރު މުޙައްމަދު އަސްލަމް ވިދާޅުވެފައިވާ ގޮތުގައި އަމީނީމަގު ހަދަން އިނީޝިއަލީ ކޮންޓްރެކްޓުގައި ސޮއިކުރީ މި ހިނގާ ފެބްރުއަރީ މަސް ނިމެންވާއިރަށް މަސައްކަތް ނިންމަން ކަމަށް ވީނަމަވެސް މިހާރު ލަފާ ކުރެވޭނީ ސެޕްޓެމްބަރުގައި ނިމޭނެ ކަށެވެ. އެގޮތުން މަސައްކަތުގެ ކޮންޓްރެކްޓަރުގައި ސޮއިކުރުމަށްފަހުގައި އެންމެ ބޮޑަށް ދިމާވި މައްސަލައަކީ ޕްރޮވިޝަންލުމަށްޓަކައި އެމްޑަބްލިއުއެސްސީއަށް ބޭނުންވާ ހޮޅިތައް ސަޕްލައި ޗެއިންގައި ހުރި ދަތިތާއެކު ލިބުމުގައި ހުރިދަތިތައް ކަމަށް އޭނާ ވިދާޅުވިއެވެ. އެކަންކަމަށް ރިއާޔަތްކޮށްފައި ރިވައިސްޑް ކޮމްޕްލީޝަން ތާރީހެއް ކަނޑައަޅާފައި ވާނެ ކަމަށައި، އެއީ 27 ސެޕްޓެމްބަރު 2023 ކަމަށް މިނިސްޓަރު ވިދާޅުވިއެވެ.
އަމީނީ މަގު ޒަމާނީ ފެންވަރަށް ތަރައްގީކޮށް، ތާރު އެޅުމުގެ އަމަލީ މަސައްކަތް އާރްޑީސީން ފެށީ 12 ސެޕްޓެމްބަރު 2022ގައެވެ. އެ މަސައްކަތް ކުރިއަށްދިޔައިރު އަމީނީ މަގަކީ ފެނާއި ނަރުދަމާގެ މައި ހޮޅިތަކުގެ އިތުރުން އެހެން ނެޓްވޯރކްތަކުގެވެސް މައި ހޮޅިތައް ވަޅުލާފައިވާ މަގަކަށްވުމުން، އެ މަގު ޒަމާނީ ފެންވަރަށް ތަރައްގީކުރަން ދަތިތައް ހުރިކަން އާރްޑީސީން ފާހަގަކުރިއެވެ.
މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން އާރްޑީސީއާ މި މަސައްކަތް ހަވާލުކުރީ 84.4 މިލިއަން ރުފިޔާއަށެވެ.
މި މަޝްރޫއުގެ ދަށުން، އަމީނީމަގުގެ 1.7 ކިލޯމީޓަރުގެ ސަރަަހައްދެއްގައި ތާރު އެޅުމަށް ވަނީ ހަމަޖެހިފައެވެ. އަދި އެ މަގުގެ ފެން ހިންދާ ނިޒާމު ޑިޒައިންކޮށްފައިވަނީ އަމީނީމަގުގެ ދެފަރާތުންވެސް މަގު ނިމެންދެން އެއްކޮޅުން އަނެއް ކޮޅަށް ކާނު އަޅާ ގޮތަށެވެ. މަގުގައި ފެންބޮޑުވުމުގެ މައްސަލައަށް ދާއިމީ ހައްލެއް ގެނައުމަށްޓަކައި އިތުރު ޕަމްޕް ސްޓޭޝަންތައްވެސް ބަހައްޓާނެއެވެ.
މީގެ އިތުރުން، އިމާރާތްކުރުމުގެ މަސައްކަތްތައް ކުރަމުންދާއިރު ބޭރުކުރާ ފެނަށް ޚާއްސަ ޑީވޯޓަރިންގ ނެޓްވޯކް އަޅާނެއެވެ. މީގެ ސަބަބުން ދުވާރުމަތީގައި ހޮޅި އަޅައިގެން އިމާރާތްތަކުން ފެން ބޭރުކުރުން ނިމުމަކަށް އަންނާނެއެވެ.
އަމީނީމަގު ތަރައްގީކުރުމުގެ މަޝްރޫއުގައި، ނުކުޅެދުންތެރިކަން ހުންނަފަރާތްތަކަށް ހިނގާބިނގާވެ އުޅުމަށް ފަސޭހަވާނެ ގޮތަށް، ދުވާރުގައި ބްރެއިލް ބްލޮކް ޖެހުމާއި ވީލްޗެއަރ އެކްސެސް ގާއިމްކުރުން ހިމެނެއެވެ. އަދި ސްޓޭކް ހޯލްޑަރުންގެ ކޭބަލްތައް އެޅުމަށްޓަކައި ކޭބަލްޓްރޭ މަގުގެ ދެފަޅީގައި އެޅުމާއެކު، އެޗްވީ ކޭބަލަށް ޚާއްސަކޮށްގެން ޖަންގުޝަންތަކެއްވެސް ބަހައްޓާނެއެވެ.
